¹ ''Naghambire yinu yi kukwenu podiyo mwe kadi mwakuwe. ² Nanyi hakumuvukume panunda dho masynagogue. Ene viri ne kuna kwiya apa keheyuno gho kumupagha kughayara eshi kuna kutapa muyambo gho thirughana thaNyambi. ³ Nanyi hakutende yinu yi pamurandu kadi hamudimuka Tate endi me. ⁴ Naghambire yinu yi kukwenu podiyo apa dhakwiya viri, nanyi mwakuvuruke eshi namutongwere kuhatera wo. Kadi nakumutongwera kuhatera yi kumatangero, yoyishi nenu nakarire. ⁵ Ene pano ame kuna kwendi yu ghanituma, ene noghotji temba ghanipura me, 'Kupi ghuna kuyenda?' ⁶ Ene pamurandu naghambire yinu yi kukwenu, ghupata wayarire mumutjima dhenu. ⁷ Ene ghushemwa nakumutongwera, hasha kukwenu mukayende. Ngeshi kadi shoniyende, Muhengaghuri kadi ghakwiya kukwenu, ene ngeshi nakuyende,nanyi nakumutume kukwenu. ⁸ Apa ghakwiya, aye Muhengaghuri nanyi nakuneghedhe kaye kughuyi gho diharwero, kuhatera ghuyi, no kuhatera matheko- ⁹ kuhatera maharwero, yoyishi kadi hatawa mumwange; ¹⁰ kuhatera ghuwa, yoyishi ame kuna kuyenda kwaTate, no kadi mwakunimona karo me; ¹¹ no kuhatera matheko, yoyishi mupiterithigho kaye ne ghana mutheki. ¹² Nidi noyinu yoyingi yo kughamba kukwenu, enekadi shomuyitjwathane pano. ¹³ Ene apa ye, Mupepo gho Ghushemwa, wakwiya, nanyi wakumuneghedhe mughushemwa ghoghuhe, nokadi ghakughamba papendi. Ene nanyi ghakughambe kehe yino ghakuyuva, no nanyi ghakumutongwere yinu eyi yakwiya. ¹⁴ Nanyi ghakunifumaneke me, yoyishi nanyi ghakushimbe koyi yakara eshi yange no nanyi ghakuyimutongwere kukwenu. ¹⁵ Kehe yino ghakara nayo tate ne yange. Podiyo, nakughamba eshi Mupepo nanyi wakushimbe koyi yakara eshi yange no nanyi ghakuyi mutongwere. ¹⁶ Muruvedhe rorufupi kadi shomunimoneme, no kunyima dhoruvedhe rorufupi nanyi mwakunimone.'' ¹⁷ Podiyo hamwe hakathishongerowendi ghaghambire kukwagho,''Nye nane yi ghana kughamba kukwetu, 'Ruvedhe rorufupi kadi shomunimone no kunyima dhoruvedhe rorufupi nanyi mwakunimone,'ndani, 'Yoyishi amekuna kuyenda kwaTate'?'' ¹⁸ Podiyo haghambire,''Nye yi ghana kughamba, 'Ruvedhe rorufupi'? Kadi tuna dimuka eyi ghana kughamba.'' ¹⁹ Jesusi ghayimonine eshi hashanine hamwipure, no ghaghambire kukwagho,''Eyi ne yomuna kukwipura ndi, eyi natamba yinaghamba, 'Muruvedhe rorupu kadimwakunimona karo, no karo muruvedhe rorufupi kadi shomunimone'? ²⁰ Ghushemwa, ghushemwa, nakughamba kukwenu, nanyimwakudire no kukukwetjura, ene kaye ne nanyikakuhafe. Nanyi mwakuyare ghupata, ene kuguva kwenu nanyi kwakukutjindje kuruhafo. ²¹ Ngeshi mbuyama kuna kushamuruka kukara noghupata pamurandu virine dhineya, ene pakumana kushamuruka mwanuke, kadi wakuvurukakaro tjitju yoyishi ruhafo roya katughuru ghanereka muno mukaye. ²² Podiyo mudi no ghupata, ene nanyi nakumumone karo, no mutjima wenu ne nanyi wakuhafe, no kadiko yu ghakushimba ruhafo rwenu. ²³ Mudiyuwa dyo kadi mwakuniromba keheyino. Ghushemwa, ghushemwa,nakumutongwera, ngeshi hamurombo keheyino kwaTate mudina dyange, nanyi ghakuyimupe mwe. ²⁴ Kate popano kadiko yimwaromba mudinadyange. Murombe no muna kuyiwana, podiyo ruhafo rwenu rwakuyarere. ²⁵ ''Naghambire yinu yi mumatadhi, ene viri ne kuna kwiya apakadi nakukona kughamba kukwenu mumatadhi, ene nanyi nakumutongwere ghukenu kuhatera Tate. ²⁶ Mudiyuwa diya nanyimwakarombe mudina dyange no kadi nakughamba kukwenu eshi nanyi nakuraperere kwaTate papenu, ²⁷ Tate papendi ghamuhaka yoyishi amwe mwanihakire no pamurandu mwanitawire eshi ame natundire kwaTate. ²⁸ Natundire kwaTate, no neyire mukaye. Karo, ame kunakuthiya kaye no kunakuhuka kwaTate.'' ²⁹ Hakathishongero wendi haghambire, ''Kenge, pano kuna kughamba thiwana no kadi ghuna kurughnitha matadhi. ³⁰ Pano yuna dimuka eshi wadimuka yinu yoyihe, nokadi ghuna shana keheyuno ghakwipure mepwero. Pamurandu ghoyi, tuna tawa eshi owe kwaNyambi watunda.'' ³¹ Jesusi ghawahuthire,''Munatawa keho pano? ³² Mone, viri ne dhinakumu, kemo, nayekaro ghana kumu, apa hakumu hanyaghura, keheyuno kudighumbo dyendi, no nanyimunithiye pithange. Ngambi kemo ame kadi pithange yoyishi Tate ne nange ghadi. ³³ Naghambire yinu yi kukwenu yoyishi mukare no thiraro mumwange. Mukaye mu mudi mayereko, mukare no ghutanavu, natjwathana kaye.''