¹ ''Mwatawedhera mitjima dhenu hadhishedhaghure. ² Mutawe mwaNyambi, mutawe mumwange name. Mundhugho dhaTate mwakara mangonda ghomengi. ³ Ngo kadi kemo, ngo namutongwere, ame kuna kuyenda ni kamuroyithere dyango dyenu, nanyi nakahuke karo no kuna kunamutambura nothinda, podiyo eshi oku nidi namwe karo. ⁴ Mwadimuka ndhira dhoku nakuyenda.'' ⁵ Thomas ghaghambire kwaJesusi, ''Fumu, kadi tuna dimuka oku ghuna kuyenda, ngepi dishotudimuke ndhira?'' ⁶ Jesusi ghaghambire kukwendi, ''Ame ne yame no ndhira, ghushemwa, no moyo; kadiko ghokwiya kwaTate kupira kupitera mumwange me. ⁷ Ngo mwa nidimukire me, ngo mwadimuka naTate naye. Kutunda pano muna mudimuka no mwamumona ye.'' ⁸ Philip ghaghambire kwaJesusi, ''Fumu, tuneghedhe Tate, noyo yina kurikanya kukwetu.'' ⁹ Jesusi ghaghambire kukwendi,''Nakara nenu rure no shime kadi mwanidimuka, Philip? Kehe yu ghanimona me ghamona Tate. Ngepi di shoghambe, 'Tuneghedhe twe Tate'? ¹⁰ Mwayitawa eshi ame ne mwaTate nakara naTatene mumwange me? Manando agha naghambanga kukwenu kadi naghaghambanga kutunda mumangcamu ghange, ene Tate yu ghatunga mumwange ne kuna kurughana yirughana yendi. ¹¹ Mutawe mumwange eshi ame ne monidi mwaTate, no naTate ne mumwange, endi mutawe pamurandu ghoyirughana pithayo. ¹² Ghushemwa, ghushemwa, nakumutongwera mwe, kuheyu gho kutawa mumwange nanyi ghakutende eyi narughananga me, no nanyi ghakutende yoyikuru yirughana kupitakana yi yoyishi ame kuna kuyenda kwaTate. ¹³ Kehe pa mwarombanga mudina dyange, ame kuyitenda podiyo Tate ghamuhafithe mwaMwana. ¹⁴ Ngeshi murombe keheyino mudina dyange, nanyi ni yitende. ¹⁵ Ngeshi mwanihaka me, nanyi mwakukumithemo dhimuragho dhange, ¹⁶ no nanyi nakuraperere kwaTate, nanyi ghakumupe yihengaghura podiyo ghakukare nenu kuroruheya ¹⁷ muMupepo gho ghushemwa. Kaye ne kadi wakukona kamutambure ye yoyishi kadi hamumona nokadi hamudimuka ye. Ene mwe mwamudimuka ye, ngeshi yene kupara nenu no nanyi ghakukare nenu. ¹⁸ Kadi nakumuthiya pithenu; nanyi nakahuke kukwenu. ¹⁹ Paruvedhe rorufupi no kaye kadi kakunimona karo, ene mwe nanyi mwakunimone. Yoyishi me ne kupara, namwe karo nanyi mwakupare. ²⁰ Diyuwa dyo nanyi mwakudimuke eshi ame ne mwaTate nakara, namwe ne mumwange mudi me, no ame mumwenu. ²¹ Keheyu gho kukara no miragho dhange no kudhitura ne yoghanihaka me, no keheyu ghanihaka mbaghana muhaka naye Tate, name mbona muhaka no nanyi nakukuneghe kukwendi.'' ²² Judas (kadi Iscariot) ghaghambire kwaJesusi,''Fumu, nye wakukuneghera ghothinda kukwetu kadi kukaye?'' ²³ Jesusi ghamuhuthire no kughamba kukwendi,''Ngeshikeheyuno ghanihaka, nanyi ghakupungure manando ghange. Tate nanyi ghakumuhake, no nanyi twakwiye kukwendi, no nanyi twakutende dighumbo dyetu nendi. ²⁴ Kehe yu ghadhira kunihaka me kadi wakutura manando ghange. Manando gha mwayuva ne kadi kukwange ghatunda ene kwaTate yu ghanituma me. ²⁵ Naghamba yinu yi kukwenu, oku me ne nenu nakutunga. ²⁶ Ngambi kemo, Muhengaghuri- Ghokupongoka Mupepo oghu ghakutuma Tate mudina dyange- nanyi ghakumuhonge yoyihe no nanyi ghakumuvurukithe yoyihe eyi naghambire kukwenu. ²⁷ Kuna kumuthiya muthiraro; Nakumupa thiraro thange. Kadi nakutapa yi thika kaye omu katapanga. Mwatawedhera mitjima dhenu dhimushedhaghure, no kadi muyape. ²⁸ Mwayuvire eyinaghambire kukwenu,'Ame kuna kuyenda, no mbonakahukakukwenu.' Ngeshi mwanihakire me, nanyi mwakuhafe yoyishi ame ne kuna kuyenda kwaTate, Tate ne yoghapiterera kukwange. ²⁹ Pano nayimutongwera kare kughutho ghokuhokoka yi podiyo, apa yakuhokoka, mwakutawe. ³⁰ Kadinakuyenda nikaghambe thikuma nenu, mupiterithighokaye kano ne kuna kwiya. Kadi ghakara no ngcamu papange me, ³¹ ene podiyo eshi kaye kayidimuke eshiame nahaka Tate, ame kutenda thika Tate edi ghana nirawera. Ninge twimane no tutunde pano.''