¹ Kughutho gho mukandi gho Pasika. Jesusi ghadimukire eshi viri dhendi dhineya dhokushwagha muno mukaye no kuyenda kwaWihe. Omu ghahakire hanuwendi awa hakarire mukaye, ghawahakire kate kughuhura. ² Pano ne ne muyipithi ghana yitura kare mumutjima waJudas Iscariot mwana Simon, mukuheta Jesusi. ³ Ghayidimukire eshi Wihe hatapire yoyihe mumoko ghendi no aye ghatunda kwaNyambi no kuna kuhuka kwaNyambi. ⁴ Ghatundire mumurarero no ghatundithireko yitere yendi yopawiru. Podiyo ghashimbire handuka no ghaghukudhingere thinda. ⁵ Podiyo ghaturire meyu pathivani noghatangire kuyogha mapadhi ghawakathishongero no kughakukutitha no handuka oyu ghakudhingere. ⁶ Gheyire kwaSimoni Peter, naPeter ghaghambire kukwendi,''Fumu, kuna kuyenda ghukayoghe maghuru ghange?'' ⁷ Jesusi ghahuthire no kughamba kukwendi, ''Eyi nakutenda kadi shoyitjwathane pano, ene nanyi ghuyitjwathane kunyima.'' ⁸ Peter ghaghambire kukwendi,''Kadi wakuyogha mapadhi ghange.'' Jesusi ghahuthire,''Ngeshi kadi shonikuyoghe we, kadikoyi wakutapera nange me.'' ⁹ Simon Peter ghaghambire kukwendi, ''Fumu, kadi ghuyoghe ngenyu maghuru ghange, ene no nyara dhange no mutwi.'' ¹⁰ Jesusi ghaghambire kukwendi,''Keheyu ghana yogho kadi ghanyanda, kutundithako kuyogha mapadhi, ene yene ghana keni; ghuna keni, ene kadikeheyuno.'' ¹¹ (Jesusi ghadimukire eshi dye ghakumuheta; podiyo ghaghambire yi,''Kadi mwahe mwakenu.'') ¹² Apa Jesusi ghayoyire mapadhi no ghashimbire dipurapure dyendi no kuhungumana karo, ghaghambire kukwagho, ''Mwadimuka eyi namutendera mwe? ¹³ Amwe kunitha me 'muhongi'no 'Fum,' no muna kughamba ghuhunga, yoyishi ame yame. ¹⁴ Ngeshi me keho, Fumu no Muhongi, nayogho mapadhi ghenu, mwakona kuyogha mapadhi ghawayendhenu. ¹⁵ Ame namupa thitamenedhi podiyo namwe mutende thika di natendi kukwenu. ¹⁶ Ghushemwa, ghushemwa, nakughamba kukwenu, mupika ne kadi ghapitakana mukuru wendi; endi mukambudhikadi ghapiterera yughana mutumu. ¹⁷ Ngeshi kudimuka yinu yi, ghuna kutungeka ngeshi kurughana yi. ¹⁸ Kadi nakughamba kuhatera mwahe; nadimuka awa natorora-ene yi podiyo matjangwa gha kumenenemo: 'Kehe yu gho kudya ghuroto wange ghughuyeyura aye ne nange ghadi.' ¹⁹ Naku mutongwera yi kughutho gho kuhokoka podiyo apa yakuhokoka, mwakutawe eshi ame ne YAME. ²⁰ Ghushemwa, ghushemwa, nakughamba kukwenu, keheyu ghokutambura keheyu natuma ne ghana tambura me, no keheyuno gho kutambura me noyu ghanituma.'' ²¹ Apa Jesusi ghaghambire yi,yamupethire mumupepowendi. Ghatawire no kughamba,''Ghushemwa, ghushemwa, nakumutongwera ghofotji ghopapenu nanyi ghanihete me.'' ²² Hakathishongero hakukengatane, no kutetuka eshi dye yu ghatambire no kughamba. ²³ Ghofotji ghopawakathishongero wendi, oyu Jesusi ghahakire, ghararire patishi kumutara waJesusi'. ²⁴ Simon Peter ghaghambire kwakathishongero wendino kughamba,''Mumwipure eshi dye yu ghana kughamba ye.'' ²⁵ Podiyo ghayeghamene kumutara waJesusi no kughamba kukwendi,''Fumu, dye yo?'' ²⁶ Podiyo Jesusi ghahuthire, ''Pamurandu wendi oyu nanyi nidheke thipindhi thoghuroto no nanyi nimupe ye.'' Apa ghadhekire ghuroto, ghaghutapire kwamwanaJuda Simon Iscariot. ²⁷ Kunyima dhoghuroto, Shatani ghamungenine,podiyo Jesusi ghaghambire kukwendi,''Nye ghuna kutenda, yitende wangu.'' ²⁸ Pano kadiko oyu ghararire patishi ghadimukire eshi pamurandu munye ghayighambere yi. ²⁹ Hamwe haghayare, kutunda Judas apa ghakarire no kandjato ko masherenyi, Jesusi ghaghambire kukwendi, ''Kaghure eyi tuna nyanda pamukandi,'' end wakona kutapa yimwe kwawahepwe. ³⁰ Apa gha manine Judas kutambura ghuroto, popo ghayendire panunda. Kwakarire ghuthiku. ³¹ Apa Judas ghayendire, Jesusi ghaghambire,'' Pano Mwana Munu ne ghana mutungeka`, Nyambi ne gha mukandadheka mumwendi. ³² Nyambi nanyi ghaku mukandadheke mumwendi yithinda, no nanyi ghakumukandadheke popo. ³³ Hanuke hohambiru, shime nenu nidi muruvedhe rorumbiru. Nanyi mwakunishane, no thikadi naghamba kwawaJuda, 'Oku na kuyenda, kadi wakwiyako mwe.' Pano nakuyighamba karo kukwenu. ³⁴ Kuna kumupa muragho ghoghupya, eshi mwakona kukuhakathana mwathinda; thika di namuhakire mwe, thikadyo mwakona kukuhaka mwathinda. ³⁵ Moyi keheyuno nanyi ghakuyidimuke eshi mwakathishongero wange, ngeshi mudi noruhakitho kwakehe yuno.'' ³⁶ Simon Peter ghaghambire kukwendi, ''Fumu, kupi ghuna kuyenda?'' Jesusi ghamuhuthire, ''Oku na kuyenda, kadi wakukona ghunikuthe pano, ene nanyiwakunikuthe munyima.'' ³⁷ Peter ghaghambire kukwendi, ''Fumu, nye gho kudhira ni kukuthe popano? Nanyi ni tape yipara yoye mumwange.'' ³⁸ Jesusi ghahuthire, ''Nanyi ghutape yipara yoye papange? Ghushemwa, ghushemwa, nakughamba kukoye, ngondovoro kadi shoghadire kughutho gho kunikanana me paruhatu.''