¹ Pakutanga kwakarire Nando, no Nando dhakarire naNyambi, no Nando ghakarire Nyambi. ² Ethi thofotji thakarire kumatamekero na Nyambi. ³ Yinu yoyihe hayitendire kupitera mwendi, no kupira ye kadiko no thofotji temba ethi hatenda eshi hathitende. ⁴ Mumwendi mwakarire kupara, no yipara yakarire munyenge gho hanu. ⁵ Thishe kumunekera mumakokore, no makokore kadi ghakonine kughawina. ⁶ Kwadikatughuru oyu hatumine kutunda kwaNyambi, dina dyendi yodiye Johannesi. ⁷ Gheyire yira mushupi mukuna tongora yo thishe, podiyo wahe hatawe kupitera mumwendi. ⁸ Johannesi ne kadi ghakarire yodiye thishe, ene gheyire podiyo naghatongore kuhatera thishe. ⁹ Ghushemwa gho thishe, oghu watapa thishe kowaheya hanu, theyire mukaye. ¹⁰ Ghakarire mukaye, no kaye ghakatendire kupitera mumwendi, no kaye kadi kamudimukire. ¹¹ Gheyiyere kukwendithinda, no yithinda mbadi ghamutambure. ¹² Ene kohengi awa hamutambure ye, awa hatawiremudina dyendi, ghatapire matawedhero mukwiya hana Nyambi. ¹³ Awa ne kadi hawareta no manyinga, endi pamahimeno gho yirama, endi pamahimeno ghamunu, ene mwa Nyambi. ¹⁴ Nando dhakarire yirama no dhaparire mukatji ketu. Twamonine mangcamu ghendi, ngcamu yira ghofotji oyu ghatundere kwaTate, ghayara thinyeke no ghushemwa. ¹⁵ Johannesi ghakutapire kuhatera ye no ghadirire ghukuyerera, ghughamba,''Oyu ne ghofotji oyu naghambire,'Oyu gha kwiya kunyima dhange ne gha ni pitakana me, aye ghakarire kughutho dhange.''' ¹⁶ Kutunda mumakumitheromo twahe twatambura thinyeke kunyima dho thinyeke. ¹⁷ Muragho haghutapire kupitera mwaMosesi. Thinyeke no ghushemwa weyire kupitera mwaJesusi Kristusi. ¹⁸ Kadiko yu ghamona Nyambi; pithendi Nyambi, aye ghakara kumutara waWihe, ghatenda Nyambi hamudimuke. ¹⁹ Ogha ne gho makutongweneno ghaJohannesi apa haJuda hatumine hapristeri no Levite kukwendi kutunda kuJerusalema mukuna mwipura,''Yowe dye?'' ²⁰ Ghakutongonone- kadi ghakanane, ene ghakutongonone- ''Ame ne kadi yame Kristusi.'' ²¹ Podiyo hamwipure,''Yowe dye ne keho? Yowe Elijah?'' Ghaghambire,''Kadi yame.'' Haghambire,''Yowe muporofeta?'' Ghawa huthire,''Ka.'' ²² Podiyo haghambire kukwendi,''Yowe dye, podiyo tukatape dihuthero kowa hana tutumu? Nye wakughamba kuhatera kukoye ghothinda?'' ²³ Ghaghambire,''Ame ne no diywi, kudira mumuthitu: 'Kutenda ndhira dhaFumu dhighororoke,'thika Isaiah gho muporofeta ghaghambire.'' ²⁴ Popano hamwe haPharisee hawatumine, ²⁵ no hamwipure no kughamba kukwendi,''Nye ghuna wayoyeranga ngeshi wene kadi yowe Kristusi endi Elijah endi muporofeta?'' ²⁶ Johannesi ghawahuthire, ghughamba,''Nayoghanga no meyu. Ene mukatji kenu munemana ghumwe yu mwadhira kudimuka. ²⁷ Yodiye gheya kughutho wange, mughodhi gho yisandari yoyu mbadi nakara mudyo mukuyishutura.'' ²⁸ Yinu yi hayitendere muBethany kumutara ghumwe waJordan, oku Johannesi ngayoyeranga. ²⁹ Diyuwa dyokurandako Johanesi ghamonine Jesusi ghakwiya kukwendi no kughamba,''Kenge,oya ne Ndjwi wa Nyambi oyu ghashwayitha maharwero mukaye! ³⁰ Oyu ne yofotji ya naghambire,'Oyu ghakwiye kunyima dhange ne ghanipitakana, aye kughutho dhange.' ³¹ Kadi namudimukire, ene yakarire podiyo ghakumuneghe kwaIsrael eshi ame neyire ghuyogha no meyu.'' ³² Johanesi ghatongonone,ghughamba,''Namono mupepo ghunakughurumuka yira diputukuwa dyakutunda mudiwiru, no dina turera papendi. ³³ Kadi namudimuka ye, ene ghoyu ghananitumu me niyoghe mumeyu ghana ghamba kukwange,'Poyu wakumona mupepo ghuna kughurumuka no kwimana papendi, yodiye ghakuyogha muMupepo gho Kupongoka.' ³⁴ Nayimona yoyihe no kuyitongonona eshi oyune Mwan Nyambi.'' ³⁵ Karo, diyuwa dyokurandako, Oku Johanesi shime ngemanena nohakathishongero wendi hawadi, ³⁶ hamonine Jesusi ghana kuyenda ghupita, na Johanesi ghaghambire,''Kenge, Ndjwighana waNyambi!'' ³⁷ Hawadi hakathishongero wendi hamuyuvire ghakuyighamba yi no hakuthire Jesusi. ³⁸ Na Jesusi ghapirukire no kuwamona hana kumukutha no ghaghambire kukwagho,''Nye muna kushana?'' Hamuhuthire,''Muhongi'', ''kupi ghuna karanga?'' ³⁹ Ghaghambire kukwagho,''Mwiye no mumone.'' No heyire no kumona oku ghatungire; hakarire nendi dyo diyuwa, kwakarire pepi no viri dhodikumi. ⁴⁰ Ghofotji ghopowa hawadi oyu ghayuvire Johanesi kuna kughamba no ghakuthire Jesusi ne Andrew, mukurwa Simoni Petrusi. ⁴¹ Pakutanga ghawanine mukurwendi thinda Simoni no ghaghambire kukwendi,''Tuna wana Messiah'' (eyi hatoroka eshi: Kristusi). ⁴² Ghamuretire kwaJesusi, na Jesusi ghamukengire no ghaghambire,''Yowe Simoni mwana Johanesi. Nanyi hakwithange Cephas'' (eyi hatoroka eshi Petrusi). ⁴³ Diyuwa dyokurandako, apa Jesusi ghashanine kuyenda kuGalilee, ghawanine Philip no kughamba kukwendi,''Nikuthe me.'' ⁴⁴ Oku Philip kuna katundera kuBethsaida, doropa dhaAndrew na Petrusi. ⁴⁵ Philip ghawanine Nathaniel no kughamba kukwendi,''Oyu yodiye Mosesi ghatjangire mumuragho, no haporofeta,tuna muwana: Jesusi mwana Jeseph, gho muka Nazareth.'' ⁴⁶ Nathaniel ghaghambire kukwendi,''Kukona yinu yoyiwa yishwaghe muNazareth?'' Philip ghaghambire kukwendi,''Wiye no mone.'' ⁴⁷ Jesusi ghamonine Nathaniel ghakwiya kukwendi no kughamba kuhatera ye,''Kenge, ghushemwa mukaIsraelite, mumwendi mwapira kuhongaghura!'' ⁴⁸ Nathaniel ghaghambire kukwendi,''Ngepi di wanidimuka?'' Jesusi ghamuhuthire no kughamba kwendi,''Kughutho gho kukwitha Philip, oku wene ne kwishi dhothitondo thothiyu,nakumono we.'' ⁴⁹ Nathaniel ghahuthire,''Fumu, yowe gho Mwana Nyambi! Yowe gho Fumu waIsrael!'' ⁵⁰ Jesusi ghahuthire no kughamba kukwendi,''Yoyishi naghamba kukoye,'Nakumono kwishi dhothitondo,' eyi ghuyitawa? Nanyi wakumone yinu yoyikuru kupitakana yi.'' ⁵¹ Podigho ghaghambire,''Ghushemwa, ghushemwa,nakughamba kukwenu, nanyi mwakumone mawiru ghana kuyandhuruka, no ha engeli waNyambi kuna kukanduka no kughurumuka pa Mwana Munu.''