¹ Mwahanuke,mukutekere hakuru wenu mwaFumu,edi ne dyo yaroghera. ² ''Fumaneke hawiho na nyoko'' (oghu ne gho muragho gho kutanga wakara no matoyedhero), ³ ''podiyo eshi yimuroghere no mwa kuhenge pakaye.'' ⁴ Hawiha,mwashedhaghura hanenu kare kughupata. Ene, muwayeyure muthishongero no miragho dhaFumu. ⁵ Mwayipika, mukare no ghutawedhi kwawapiterithi wenu kukutha kunyama no dikuto dishokuru nokututuma, mughushemwa ghomumutjima ghoye. Mukare noghutawedhi kukwagho thika kenge shokare ghutawedhi mwaKristusi. ⁶ Mwakara ghutawedhi ngenyu ngeshi kuna kumukengerera hapiterithi wenu, podigho eshi muwahafithe. Ene, mukare ghutawedhi yira yipika yaKristusi, awa hakuthanga miragho dhaNyambi mumutjima dhenu. ⁷ Muruwane no mutjima ghoye ghoghuheya, yira kenge ngamuruwanenanga Fumu no mbadi hanu, ⁸ yoyishi twadimuka eshi kukehe yinu yoyiwa ghana kutenda munu,mboghana wana yiruwera kwaFumu, ngambi mupika endi mushutuki. ⁹ Mwapiterithi, mukare nawapikenu mundhira dhodhiwa. Mwawashedhaghura. Muna dimuka eshi mupiterithi wawo waheya no mupiterithi wetu gho mudiwiru, mbadiko mandorwera kukwendi. ¹⁰ Paghuhura, mutanare mwaFumu no mumangcamu ghendi ghomakuru. ¹¹ Mushupate yirwitha yaNyambi omu shomukone kwimananyenapo maghano ghaShatani. ¹² Yikondja yetu ne mbadi yinemanganyenapo nyama no manyinga, ene tunemananyena haraghuri, tunemananyena hakamiragho, tunemananyena hakamangcamu gho dikokore dyo pashadyarero, tunemananyenapo dhimupepo dhodhimango mumango gho mudiwiru. ¹³ Podiyo eshi mushupate yirwitha yoyihe yaNyambi,podiyo eshi mwakemane mudiyuwa dyo diyi, apa mwakumana kutenda yoyiheya,mwakwimane ndjikiti. ¹⁴ Wimane keho ndjikiti,no mukata ghoghushemwa ghuna kughanga mumbunda dhoye, no omu ghuna turako thishupata thothikuvo thopamuyidi nodhoghushemwa, ¹⁵ no, mapadhi ghenu muna ghavateka no makuroghuthwero agha ghakushwagha kumbudhi dhodhiwa dhothiraro. ¹⁶ Munako dhodhiheya mushimbe thikukanduritho thomatawero, omu mwakakona kashwayithapo maghonga ghomudiro gha muyi. ¹⁷ Noshimbe thikaroni tho mashutukero no thimende tho mupepo ghokupongoka, adho ne dhonando dhaNyambi. ¹⁸ Nokehe ndapero no makumbero, raperere kehe ruvedhe mumupepo. Poghuno ghuhura, roruheya wakona kukengera ghudhidhimeka apa ghuna kutapa mandapero kohanu waNyambi hokupongoka. ¹⁹ No muniraperere eshi mbudhi hakone kudhitapa kukwange apa mboniyandhurura kanwa kange. Murapeprere eshi hakunidimuke noghutjima no ghushemwa gho mbudhi dhodhiwa edhi hahoreka. ²⁰ Pamurandu gho mbudhi dhodhiwa yona karera nomutumwa oyu hana tura mumenge. Podiyo eshi nakaghambe noghushemwa, thika di naroghera kughamba. ²¹ Tychicus, minange ghomuhakwa no mutawedhi mughupika waFumu, nanyi gha kuna mutongwere yoyiheya, podiyo eshi wakudimuke eshi ngepi ni di. ²² Kukoye namutumu nothitambo thothi,no podiyo eshi gha kutjokedhe mitjima dhenu. ²³ Thiraro thikare nawayendha, noruhakitho romatawero rokwaNyambi wihe naFumu Jesusi Kristusi. ²⁴ Thinyeke thikare nawa hahaka Fumu wetu Jesusi Kristusi noruhakitho roghuhunga.