¹ Thikadi nidi, nomukanotwa waFumu, muninge muyende mundhira dho fumwa mu methero gha mwapwa kwitha. ² Nakumu kumbera mukupara mumakumbirupithero gho makuru no ghunongo no ghudhughutjima, mukukara nawamweya muruhakitho. ³ Mutende keho popa mwahurera mukukwata ghundambo wamupepo ghokupongoka muku kara nothiraro. ⁴ Yoyi yirama ne yofotji nomupepo ghofotji,thika dyodi namwe mwapire kwitha mumakurupero ghofotji ghomethero ghenu. ⁵ Fumu ghofotji, matawero ghofotji, nodiyoghero dyofotji, ⁶ no yofotji Nyambi no yowiha wawahe, oyu ghapiterera wahe noyu gharughanene wahe no gha tunga mwawahe. ⁷ Kwakehe yu ghopapetu ghana wana neke thika di gharikanyithire Kristusi yitapera. ⁸ Thika dyodi ghaghamba matjangwa: ''Apa ghadhinine kudiwiru, ghatwarire hangwati munotwa, noghatapire yitapakwawanu.'' ⁹ Yinu munye yina kutongora,''Aye ghadhinine,'' kushwayithako eshi,''ghashurukire karo kuyiko yopakaye? ¹⁰ Oyu ghashurukire pamuve munu ghofotji karo ghoyu gha dhinine kundagha-ndagha dhomawiru ghomahe, eshi ghayarithe yinu yoyihe. ¹¹ Kristusi ghatapire ghamwe mukukara hapostoli,hamwe ghaporofeta, nohamwe haruti nohahongi. ¹² Hatupa mamberegho mukuroyithera hanu waNyambi ghokupongoka kuyirughana yawo, mukutendura yirama yaKristusi. ¹³ Hatwara kughutho mukutendura yirama yendi kare twahe twakumane mumakupakerero ghomatawero no yidimuka ya mwana Nyambi, no twakona kukura no kushana naro dhokuyarera dhaKristusi. ¹⁴ Kristusi gha tutendurura twe po mbotu dhira kukara shime yira twahanuke ghowa ghana kuthindeka mangumbi munyima no kughutho, gho ghu ghuna kutwara kehe ghuno mupepo,ghpyihonga no ghuringiringi wahanu muyihonga yawo yombango. ¹⁵ Kemo, mukughamba ghushemwa muruhakitho, twakona kukura mukehe ndhira no mumwendi ghoyu ghadi eshi mutwi noyune Kristusi. ¹⁶ Kristusi ghatenda yirama yoyihe, no ghatinunga no kuyitura pofotji, mukuhamena kehe thino thigura no kehe thino thipo mukuruwana pofotji, yatenditha yirama yikure podigho yikutenda yathinda muruhakitho. ¹⁷ Podiyo, nakughamba no kumukanderera mudina dyaFumu, kadi mwakona kuyenda edi ghana ghanakuyendanga hahayidena, mumaghano ghawo ghokupira kuhungama. ¹⁸ Yitjwathana yawo ne yamakokore, mbadi gha yerana kuyipara yaNyambi pamurandu gho dinyatho edi di di mumwagho, pamurandu gho ghukukutu ghomutjima dhadho. ¹⁹ Awo hana kara kadiko keho thihonyi no hana tendi hathinda didovo dyorungu,no ghana kuruwana kehe thino tho didhiro no ghumu. ²⁰ Ene mbadi kemo mwakuhongire yaKristusi. ²¹ Nakurupera eshi amwe ne mwamuyuva,nomwapwire kuhonga mumwendi, dyodi wakara eshi ghushemwa ne mwaJesusi. ²² Mwapwire kutongwera mukuthiya kehe thino thahatere kuyipara yenu yo kare kare, mukushwayithapo munu ghomukuru-kuru. Yoyi munu ghomukuru-kuru ghana yipa pamurandu ghoyirumbera yoyimango. ²³ Mwapwire kuhonga mukutjindja mupepo dhomaghano ghenu, ²⁴ nokushupata munu gho mupya ghoyu kuvareka munungu dhaNyambi- mughushemwa no ghupongoki. ²⁵ Podigho,muthighe mbango,no muninge kehe yu ghopapenu mukughamba ghushemwa kwaghumweya,yoyishi twahanu yofotji keho. ²⁶ Ngeshi ghamupata,mwaharura. Ene mukuthiyerere kughutho ghokuwa diyuwa paghupata wenu. ²⁷ Mwatapa dyango kwaShatani. ²⁸ Ngeshi ghumweya mwidhi, ghakona kushagheka widhi. Gharughane eyi yina kukona nyara dhendi podiyo eshi ghawane yinu yokukayarekera nowa hana kunyanda. ²⁹ Mbadi twakona kutawedhera ghuyi ghushwaghe mutunwa twetu. Muruwanithe vene manando ghomawa ghokushambereritha ghowa ghayinyanda , yoyi manando ghenu ghatape thinyeke kwawatereri. ³⁰ Mwatokotitha mupepo ghokupongoka waNyambi. Yoyishi papendi ghamu ghunguvurire mudiyuwa dyomakomweneno. ³¹ Mushwayitheko ghupata, kukughambera, no matuka no kehe thinu thothiyi. ³² Mukare ghunongo kwawamweya, nomutjima ghoghuwa,kuthiyereranga hamweya, thika dyodi ghamuthiyerera Nyambi mwaKristusi.