¹ Oku shime Apollos muKorinte, Paghulusi gha pitire kumutara ghoditunga nogha keyire kumbara dhaEfesus, na ghana wanine ko haka thishongero hamwe. ² Paghulusi gha ghambire nagho eshi, ''Apa mwa tawire ne mwa tamburire Mupepo ghokupongoka ndi?'' ha muhuthire eshi, ''Mbadi kemo, mbadiko eyi twa yuva shime kuMupepo gho kupongoka.'' ³ Paghulusi gha ghambire eshi, ''Diyoghero munye ha muyoyire mwe? ⁴ Ha muhuthire eshi, ''Johanesi gha yoyire diyoyero dyo kupiruka. Gha tongwere hanu eshi hatawe kwayofotji oyu mbo gheya munyima dhendi, oyu gha di eshi, Jesusi.'' ⁵ Apa hayuvire hanu yinu yi, hawa yoyire mudina dyaFumu Jesusi. ⁶ Apa gha manine kuwa kambeka Paghulusi, Mupepo gho kupongoka weyire papawo noha tangire kughamba mandimi gho kukutjaka-tjaka no kuporofeta. ⁷ Waheya pofotji ha karire dikumi nohawadi. ⁸ Paghulusi gha yendire musinagoge noghaka ghambangire mutughonda tuhatu, kutjwathanitha no kuneghedha hanu yo ghuFumu waNyambi. ⁹ Ene haJuda hamweya ha thururu, mbadiko makuyuvero, ha tangire kughamba ghuyi mumbunga. Paghulusi ghawa thiyire no gha shimbire ha kathishongero wendi, ghawa hongire no kuwatjwathanitha kehe diyuwa mudikuruyugho dyaTyranus. ¹⁰ Oyi ya karire ghure gho myaka dhiwadi, kate waheya awa ha tungire muAsia hayuve nando dhaFumu, haJuda nawa Hirika. ¹¹ Nyambi gha tendire yitetu yoyikuru thikuma munyara dhaPaghulusi, ¹² noya karire eshi ngambi yikehe yomunyara eyi ya mukundamine hayitwarire kwawakatjitju no yi korwa yawo ya watundire. ¹³ Ene haJuda hamweya hoghuyendaghudhi ha yendaghurire mudyango diya. Hethangire mudina dyaFumu Jesusi podiyo eshi hawane ngcamu dhokuwitha mipepo dhodhimango apa haghambire eshi; ''PaJesusi yu ghahongire Paulusi, nakukurawera ghushwaye.'' ¹⁴ Mupriateri shokuru wawaJuda ghodina Skeva, ghayuvire hana hotutughuru kwoko nohawadi awa hayitendire yi. ¹⁵ Mupepo ghoghumango wawahuthire eshi, ''Jesusi ne namudimuka, na Paulusi namudimuka; ene yamwedye?'' ¹⁶ Mupepo ghoghumango wawareghere nokuwashwayitha ngcamu nokuwapumura. Hashwayire mundhugho dhi ghutjira thiheha noghurema. ¹⁷ Oyi yapwire kudimuka mwawaheya haJuda nawaHirika, awa hatungire ku Efesiusi. Hayapire thikuma, nodina dyaFumu Jesusi hadifumanekire. ¹⁸ Hengi karo hatawi wa hanatongononine nokunatawa yinu yoyimango eyi harughanine. ¹⁹ Hengi wa harughanine yirughana yoghurodhi haretire mambapira ghawo pofotji nokunaghatumekera kughutho wawaheya. Apa hatarire mudyo wayo, yapitire masiliveri mayovi makumi kwoko. ²⁰ Nando dhaFumu dhakuhanyine kokuhe mumayira ghongcamu. ²¹ Apa ghamanine Paulusi thirughana thi muEfesiusi, ghatokorire mumupepo ghapite dhaMesedoniya naAchaia mundhira dhendi dhokuJerusalema; ghaghambire eshi, ''Munyima dho kakara kuya nakona karo kamona Roma.'' ²² Paulusi ghatumine haghamweni wendi hawadi kuMesodeniya, haTimothy naErastus. Ene aye thinda ne ghakarire muAsia kamanana. ²³ Poro ruvedhe rofotji mbadi pakarire mepithero ghongandji muEfesius kuhatera ndhira dhi. ²⁴ Katughutru ghumwe yu ngarughananga yiperende yokutura pamasiliveri ghodina Dometriusi, gharetire ngesheva dhodhingi kwawatendi. ²⁵ Ghaghongawedhire pofotji harughani hothirughana thi nokughamba eshi, ''Mwakamakuto, mwadimuka eshi modhi ngeshefa ne twatendanga masherenyi ghomengi. ²⁶ Yoyi mumona nokuyiyuva eshi, mbadi pithako kuEfesiusi, ene ambara Asiya ghomuheya, oyu Paulusi ne ghahongaghura no kupirura hanu hashawingi. Ghana kughamba eshi mbadiko hanyambi hokutenda nonyara. ²⁷ Mbadi ghukukutu pithowo shi yirughana yetu shohapire kunyanda ene kemo karo notembeli wanyambi wetu ghomukuru Artemisi nanyi ghakare mbadiko mudyo. Nokaro ghana kuyongaritha ghukuru wendi, oyu hakugha haka Asiya wahe nawakakaye.'' ²⁸ Apa hayiyuvire yi, hayarire noghupata ghoghukuru nohakugherire ghughamba eshi; ''Ghomukuru ne Artemisi wawaka Efesius.'' ²⁹ Mbara dhodhihe dhayarire no didhongi, nohanu ghatambukere nomaghano ghofotji mudiyugho dyoyigongi. Hakwatire hakaruyendo rwaPaulusi, Gaiusi na Aristarchus, ghoyu ghatundere ku Mesedoniya. ³⁰ Paulusi ghashanine kwingena mukatji ko mumbunga dhawanu, ene hakathishongero hamushingire. ³¹ Nawakamakuto hamwe hothiko thaAsiya awa hakarire haghendhendi hamutumene mbudhi ghumukanderera eshi mbadi ghakwingene mudiyugho dyoyigongi. ³² Hanu hamwe hakughererire thinu thofotji, nohamwe thimweya, oku mbunga muthivunganyi. Wingi wawo mbadi hadimukire eshi yinu munye hana kughongawedhera pofotji ³³ Mbunga dhimwe dhapire maghano Alexander, oyu hathindekire haJuda kughutho. Alexander ghayeyurire dyoko dyendi, ghushana kutapa maghamweno kumbunga. ³⁴ Ene apa hayinongononine eshi aye ne muJuda, wahe hakughererire ghure gho maviri mawadi nodiywi dyofotji, ghughamba eshi, ''Shokuru ne Artemis wakaEfesiusi.'' ³⁵ Apa ghaporerithire mukuru ghodoropa mbunga, ghaghambire eshi, ''Amwe mwatutughuru waEfesiusi, munu munye yu ghanapiri kudimuka eshi mbara dha Efesiusi ne hapunguri hotembeli wa shokuru Artemisi no thishwi othi thawire mudiwiru? ³⁶ Mukumona yinu eshi mwayidimuka, mwaroghera kuporera nokupira kupetha ruvedhe. ³⁷ Munareta hatutughuru wa kutheko dhi owa hadi shi hedhi homutembeli endi ghakamushedho ghokwanyambi wetu. ³⁸ Keho, ngeshi Demetriusi no hayuwi awa hadi nendi hadi noyighayarera keheyuno, mapangwero ghanayandhuruka no pohadi haturithipo muragho. Muninge haghayarere keheyuno. ³⁹ Ene ngeshi mushana keheyino kuyinu yimweya, yipwe kukuvureka mumbunga. ⁴⁰ Muthirughana tudi thokutughayarera kuhatera yita yodyaro. Mbadiko thitambo thodidhongi di, nombadi shotukone kuyitjwathanitha.'' ⁴¹ Pakumana kughamba yinu yi, ghashwayithire mbunga dhi.