¹ Mukuru kwa ghomuhakwa Gaiusi, ghoyu nahaka mughushemwa. ² Mwahakwa, nakuraperera eshi yoyihe ngoyimuroghere thiwana no mukare mughundjewandjewa, thika no mudhimu ghoye nagho ghukare thiwana. ³ Nakarire noyishamberera yoyikuru apa heyire hatawi no hanatapire ghushupi ghoghushemwa ghoye, thika di waparanga mughushemwa. ⁴ Mbadi nidi noyishamberera yoyikuru kupiterera yi, pakuyuva eshi hanange ne kuna kupara mughushemwa. ⁵ Muhakwa, warughananga ghuhunga apa waghamwenanga hatawi nawa wapira kudimuka ⁶ owa hatapa ghushupi ghoruhakitho kughutho gho ngirishe. Watendire thiwana pakuwatuma muruyendo rwagho mumuhingo ghofumwa dhokwa Nyambi, ⁷ yoyishi pamurandu ghodina di hadi nayendire nadyo, no mbadiko thihawanine kohahayidena. ⁸ Podiyo eshi twakona kuwatambura yira wo podiyo twakukare twarughani pofotji ghoghushemwa. ⁹ Natjangire yinu yimweya kudipongero, ene Diotrephesi, oyu ghahaka ghakare yomutango mukatji kagho, kadi ghatutambura twe. ¹⁰ Ndani ngeshi nakwiye, ponanakengurura kuyirughana yoyihe yighana kurughana, ghaturundera no manando ghomamango. Mbadi yarikanya yiya, mbadi kwashwenine kutambura hatawi vene, ene ghashingire karo owa hashanine kuwatambura no kuwatjidha hatunde mo mungirishe. ¹¹ Mwahakwa, mbadi mwakona kutemununa yoyiyi ene yoyiwa. Kehe yu ghanakutenda yoghuhunga ne yowa Nyambi; thiharuri ne mbadi ghamona Nyambi. ¹² Demetriusi ghawana ghushupi ghoghuwa kwakehe yu no paghushemwa wathinda. Natwe karo twashupi yokukwendi, ndani muna dimuka eshi ghushupi wetu ne waghushemwa. ¹³ Nakara noyoyingimyokumutjangera, ene mbadi nashana kumutjangera no katjangitho ko ingi. ¹⁴ Ene nashana mukuna mumona pawangu, no nanyi twakuna ghambe rupara norupara. ¹⁵ Thiraro thikare nenu. Hashere hana mumorora. Mumororithepo hashere ko pamena ghawo.