Thikurumingwa 1

1 Paghulusi, Silvanus naTimoteghusi, kumangirishe hakatesalonika mwaNyambi ghowihetu naFumu Jesusi Kristusi. 2 Thinyeke kukwenu nothiraro thokwaNyambi wihetu naFumu Jesisi Kristusi. 3 Twakona kutapa matumero kwaNyambi papenu,mwayendhange thika di yaroghera,yoyishi matawero ghenu kuna kukura thikuma, noruhakitho ru mwakara naro mukatji kenu ruyeyuke. 4 No natwe twathinda tukununeke yokuhatera kukoye kumangirishe ghaNyambi kumadhidhimekero nomatawero gho kumakuthakuthero ghenu, no kuyihokoka yoyimango eyi mwapitire. 5 Oghu ne ghoghushupi waNyambi gho ndhango dho ghuhunga, podigho eshi mwa kumoneke mudyo mughufumu waNyambi, omu muna kunyanda namwe. 6 Napo kemo, ghuhunga kwaNyambi mukuhuka kuyinyanda kowa ha nyandeka, 7 no maghamweno kukwenu amwe mwanyandire netu, apa mboghamuhokora fumu Jesusi gho mudiwiru nawa engeli wendi 8 mumudiro gho kutumbuka, mukunyandeka awa hapira kudimuka Nyambi nowa hapira kukutekera mbudhi dhodhiwa dhaFumu wetu Jesusi. 9 Mbohana nyanda mahumbithero gho mahanyanganeno ghororuheya kushwagha kumakarero ghaFumu no kuma kughero gho kungcamu dhendi. 10 Nanyi mboghayitende apa mbogheya modiya diyuwa mukumukugha mohanu wendi hokupongoka no kutetuka kowa hatawire, yoyishi ghushupi wetu ghokaye ha ghutawire. 11 Pamurandu ghoyi gho tuna kuraperera papoy,podiyo eshi ghakumone mudyo mukurwitha nongcamu dhendi omu mboghakumitheramo thitambo thothiwa no kehe thirughana thomatawero. 12 Kuna kuraperera podigho eshi dina dyaFumu wetu Jesusi mukumukugha mumwenu,namwe mumwendi, kukutha thinyeke thaNyambi wetu naFumu Jesusi Kristusi.