¹ Kutunda kohakuru kare kohambuyama wahapwa kutorora nohanendi, owa nahaka mughushemwa-ene mbadi yame keho, ene no waheya wahadimuka ghushemwa- ² yoyishi ghushemwa ghuwakara mumwetu ne mboghunakara netu kuroruheya. ³ Mahamweno, thinyeke no thiraro thaNyambi gho wihetu mbothina kara netu no thokwa Jesusi Kristusi, mwana wihe, mughushemwa no muruhakitho. ⁴ Nidi noyishamberera yoyikuru nawana hanoye ghamweya kuna kuyenda mughushemwa, shika kenge di twawanine ghu muragho kwaWihetu. ⁵ Pano nakukanderera, mbuyama- mbadi shi kuna kukutjangera muragho ghoghupya, ene ghoghu ghofotji twawanine pamashimurukero eshi twakona kukuhakathana. ⁶ Oru ne ruhakitho, eshi tukone kuyenda kukutha mumiragho dhendi. Oghune muragho wendi, shikadi mwayiyuvire pakutanga, eshi kona kuyenda mumwagho ndani. ⁷ Yoyishi hengi hapemukithi hakuhanyena mukaye, no awone mbadi hanongonona eshi Jesusi Kristusi ne gheyire pathina ghunu. Agho ne hapemukithi no hakanore dhaKristusi. ⁸ Mutakamithe, eshi mbadi mwakona ku yongaritha yinu yi twa rughanena, podiyo eshi mwakawane ndjambi dhokuyarera. ⁹ Kehe yu ghana kuyenda kughutho ene mbadi ghana kukara mumakuhongo gha Kristusi ne mbadi ghakara naNyambi. Ghoyu ghana kukara mumakuhongo ne yo ghakara na wihe no mwaMwana. ¹⁰ Ngeshi ghumweya gheya kukwenu no yihonga yayonayo, mbadi mwakona kumutambura mumayugho ghenu no mbadi wakumumorora. ¹¹ No keheyu gho kumumorora neghana kupakerera muyirughana yendi yoyiyi. ¹² Nakara noyoyingi yokumutjangera, ene mbadi nahaka kuyitjanga pambapira no ingi. Ngambi kemo, nakurupera eshi nanyi na kwiye nakuna ghambe nenu rupara norupara podiyo eshi yishamberera yetune yakukumenenepo. ¹³ Hana mminoye yu ghapwa kutorora ghana tapa dirumeritho kukwenu.