¹ Ene ve, kughamba vivya kuyendango na veta dalipuro. ² Shonga vakondi vavakafumu vakare naukaro wauwa, kukufumadeka, unongo, vayuvike mulipuro, mushihoro, ntani mukudidimika. ³ Mundjira ndjoyo, shonga vakondi vavakamali vaneghede nkedi dadiwa, kapishi varushopo ndi vakare vapika vamarovhu, ene ngoli vakare varongi vavininke vyaviwa, ⁴ Ntani kudeura vanuke vava kadona vahore vavyavo ntani nakuhora vana vavo, ⁵ Vakare vakutura, vakena, vakukunga mundi nawa, ntani vakulimburukwa kuvanturaumbo vavo, mposhi nkango daKarunga kapishi vadikuyauke. ⁶ Mundjira ndjoyo, korangeda vamatighona varuwanite ndunge dadiwa. ⁷ Mundjira nadintje karangapo nove naghumoye ngoshihonena shaviruwana vya viwa. mumashongo ghoye, negheda ukaro wauwa, lifumadeko, ⁸ Ntani kuwapukurura mbudi oyo vaghambanga mwamudona, mposhi kehe ghuno akukanano ngashwauka morwa vavo kwato vinaghamba vyavidona kuhamena kwetu. ⁹ Shonga vapika vafumadeke muhona wavo mwanavintje, nakuvahafita ntani kapishi kukukanana navo, ¹⁰ Kapishi kuvavaka, ene ngoli mulivango olyo ghunede lipuro lyaliwa, mposhi mukehe yino ndjira ngava yita makongo gha kushonga vyakuhamena Karunga muyowoli wetu. ¹¹ Ufenkenda waKarunga washoroka ghuyowore vantu navantje. ¹² Dado kutudeura tushwene vyahanashi vyaKarunga ntani vyakuhora vyamuUdjuni, ntani nakukukunga naumoye, nakuyimana pamwe, ntani tuparuke mwaKarunga maparu ghetu, ¹³ Opo tuna kutaterera tutambure matungiko na lihuguvaro lyetu, mulimoneko lyaUyerere wa Hompa wetu wamunene ntani muyowoli wetu Jesusa Kristusa. ¹⁴ Jesusa akutapire mwene konda yetu mposhi atuyowore atwe kuveta dadidona dakupira mulyo ntani nakukukenita mwene shinenepo vantu vakunyanyuka mukuruwana vininke vyendi. ¹⁵ Ghamba vininke vino, korangeda vantu vaviruwane, ntani tapa liwapukururo nadimuragho nadintje. washa pulitira kehe ghuno akudine.