¹ Paurusa, mu Apostoli waJesusa kupitira mushihoro sha KArunga, kukwama mulitwenyidiro lyaliparu lya karo mwaKrisyusa Jesusa, ² KwaTimoteusa, mona wakuhora: Ufenkenda, nkenda, ntani mbili yakutunda kwaKarunga she naKristusa Jesusa Hompa wetu. ³ Ame kupandura Karunga, oghu nakareranga kutunda kuvanyakulya vande, namuntjima wakukena, momu namuvurukanga kehe pano muma kanderero ghande matiku namwi. ⁴ Ntjene navuruka maruntjodi ghenu, ame kushana nimumone, mposhi nikare naruhafo. ⁵ Kumvurukita lipuro lyenu lya Ushili, olyo lya kaliro mwanyakulyenu Loise na nyokwenu Eunike, ntani ame navipura ashi vyakara namumwenu nka. ⁶ Eshi ntjo shitambo nakumuvurukitira kovyo mwatambura Ushwi waKarunga owo wakaro mwenu kupitira omo namukambeka mawoko ghande. ⁷ Karunga kapi atupire mpepo yaghutjirwe, ene ngoli nkondo na shihoro ntani nakukufumadeka. ⁸ Ngoli mwashafa ntjoni kumaumbangi ghakuhamena kwaHompa wetu, ndi ghande, Paurusa ndi vakadorongo vendi. Mulivango olyo kukwatitenu ruhepo rwambudi yayiwa kukwama nkondo daKarunga. ⁹ Karunga ndje atu yoworo atwe nakutu yita muUpongoki. Ghuye kwavi ruwanine vino, kapishi kukwama kuviruwana vyetu, ene ngoli kutwara mumaghayaro ghendi ntani naufe nkenda. Ghuye aghupire vininke vino mwaKristusa Jesusa kumeho ya kutameka ruvede. ¹⁰ Ngoli weno liyowoko lyaKarunga vana lihorora mulimoneko lya muyogholi wetu Kristusa Jesusa. Kristusa ndje alituliropo olyo ngalipiro kushaya kutwera kupitira mu matjangwa. ¹¹ Konda yovino, vantowelire nikare muyuviti, mu Apostoli ntani murongi. Vimwe vyamulyo ntani vantumine nitjange mbapira daruGereka kuva puli. ¹² Muviruwana vino na hepire. Ene ame kwato ntjoni, nayiva omunapura. ame navipura ashi ghuye kuvura kunkunga kovyo namuhuguvarera dogoro liyuva olyo. ¹³ Kunga shihonena sha nkango do wayuva kukwande, nalipuro ntani shihoro sha mwa Kristusa Jesusa. ¹⁴ Vininke vyaviwa ovyo akupa Karunga, vikunge kupitira mumpepo yakupongoka, eyi yakaro mwetu. ¹⁵ Mwa viyiva vino, ashi navantje vatungo mu Asia vantjwenine ame. Mbunga yino kwakalire Figelisu na Hemogenesi. ¹⁶ Hompa aferenkenda lipata lya Onesiphorus, morwa ghuye akangwapukulire ame ntani kapi afire ntjoni kuuketanga wande. ¹⁷ Mundjira ndjoyo, opo akalire muRoma akantjanine mbyo akangwanine. ¹⁸ Ndi Hompa Karunga ngakamufere nkenda muliyuva olyo. Ndjira nadintje odo aka mvhatilire mu Ephesus wayiyiva nawa nawa.