¹ Ale nka nituliina okuweereza okwo, olwa kusaasira kwa Kanca, titwiiririra. ² . Baitu twaagaine eby'ansoni ebikwekebwa, nka titutambuura mu bukuusa, erate titukyamya kigambo kya Kanca, baitu olw'oku bonesya amazuma nka twetendereza edi omwooyo gwa buli muntu omu maiso ga Kanca. ³ . Erate gonze enjiri yaiswe esweekebwaku, esweekebwaaku edi abo ababuure. ⁴ . Nibaabo abataikiriza, oSetaani omufuzi w'emirembe jini be yazibire amaiso ga magezi gaabwe, n'abaziiyiza okubona eisana ly'anjiri yakitinisya kya Kristo, oyo nikyo kiisani kya Kanca. ⁵ . Olwakubba titwebuulira iswenkai, wazira oYesu Kristo nka niye Mukama waiswe, isweena nka tuta bairu baanywe oku lwa Kristo. ⁶ Olwakubba oKanca eyasimoire ati, eisana liryaaka omu kirikiirya, alekere eisana eryo okwaaka omu mitima jaiswe, erate tweteje ekitinisya kya Kanca ekibonekera omu maiso ga Yesu Kristo. ⁷ . Baitu obuguuda obwo tuta nabwo omu bibya eby'eibumbba, amaani againji omuno leke gazwenge edi Kanca, baitu ti mwiswe. ⁸ Tunyigirizibwa omu buli ngeri, baitu titumalwaawo, tusoberwa, baitu tituwaamu eisuubi. ⁹ Tuyiganyizibwa, titulekebwaawo; tummeigebwa, baitu tituzikiira. ¹⁰ Buliizo tutambula nka tuliina omu mubiri, okufa kwa Yesu, erate n'obwoomi bwa Yesu leke bubonesebwe omu mubiri gwaiswe. ¹¹ .Olwakubba iswe abwoomi tuwebwaayo ennaku zoona zoona edi okufa okutujunaana oYesu, erate n'obwoomi bwa Yesu leke bubonesebwe omu mubiri gwaiswe ogufa. ¹² Nimwo kityo, okufa kukoora mwiswe, baitu obwoomi mu nywe. ¹³ . Baitu nka tuliina omwooyo gudi ogw’akwikikiriza, okusinziira omwebyo ebyawandikiibwe,’naikiriize erate nolwekyo nsimoola,’isweena twaikiriiza,erate nolwekyo tusimoola. ¹⁴ Nka tumaite nk'oyo eyayimbocerye Omukama waiswe oYesu, erate naiswe alituyimbooca amwe n'oYesu, erate alitwanjuura amwe naanywe. ¹⁵ . Olwakubba byoona byoona biri ku bwa nywe, ekisa ekyo ni kyeyongera oku lwa bainji, kyongera okuleeta okweebalya oKanca n'okumuweesya ekitinisya. ¹⁶ . Nikyo tuzwa tulema okwiririra, baitu gonze omuntu waiswe ow'akuruguru awaawo, Baitu omuntu waiswe ow'amunda afooka omuyaaka buliizo n’obuliizo. ¹⁷ Olwakubba okubonabona kwaiswe okutazitowa, okwa kiseera kyaati, kongerayongera muno okutukoora ekitinisya ekikuzitowa ekya miijo n'emiijo. ¹⁸ Iswe nka tituloleera ebikuboneka, wazira ebitaboneka, olwakubba ebiboneka bya kiseera, baitu ebitaboneka bya mijjo na mijjo