¹ . Baitu, inamaliriire omu mwooyo gwange, obutaira erate na bujune ji muli. ² . Olwubbanga nje ni mbaletera okweinnatira, ale ansanyusa niye naani, oyo gwendeteire okweinnatira? ³ . Erate ekyo nakiwandiikire, nindiiza nneme okweinnatirwa abo abagwaana okunsanyuca, olwakubba nnina obukakafu omu nyweena nyweena , nka eisanu lyange, niryo eisanu lyanywe nywena nyweena. ⁴ . Olwakubba omu kubonabona okwiinji, n’okulumwa omwooyo nnabawandikiire, namaligga againji,tikubaletera kweinnatira,baitu mweteje okwendya kwennina ji muli nikuli okwiinji omuno . ⁵ . Baitu, ni wabbaawo omuntu eyaletere okweinnatira, abba tiyeinnatirye ninje, wazira nnywe nyweena nyweena, erate ti nyweena, nneme okuzitowa omuno. ⁶ Olwakubba ali atyo, ekibonerezo ekyo kyaweweibwe abaniji kimumala. ⁷ Nikyo kizwa kibagwaanira nnywe okumuganyira mbbe, baitu aleme okumirwa ennaku zaamwe nka zimusukireku obwiinji. ⁸ . Nikyo nzwa mbegayiira okugumya okwendya jaali. ⁹ Olwakubba, erate nikyo nazwiire mpandiika, leke mbagezesye neteje, obate nka muli bagondu omu bigambo byoona byoona. ¹⁰ . Baitu buli gwe musaasira ekigambo, nanje mmusasira: olwakubba nanje kyensaasiire, obate nka nsasiire nsasiire ku lwanywe omu maiso ga Kristo. ¹¹ Ositaani alemenge oku twekuddumbalyaku, olwakubba tituli nka abateteja buliirani bwaamwe. ¹² . Baitu ni naizire omu Tulowa olwa njiri ya Kristo, erate olwiiji ni lwanyigulirwewo omu Mukama waiswe, ¹³ Omwoyo gwange tigwaculeire, olwakubba tinayajiryeyo oTito omuganda wange.Nikyo nazwiire mbasiibula ninyaba omu Makedoni. ¹⁴ . Baitu oKanca yebalibwe, atutwaala buliizo nka abawangula omu Kristo, erate natukolyesya oku manyisya, akawoowo aka kumweteja omu buli kifo. ¹⁵ . Olwakubba tuli kaloosa kasai aka Kristo edi oKanca omu abo abacungurwa no mwaabo ababula; ¹⁷ Olwakubba tituli nka baddi abasiinga obwinji, abatabangula ekigambo kya Kanca: baitu nka abantu aba mazuma, baitu nka abazwa edi oKanca, omu maiso ga Kanca nimwo tusimoola omu Kristo. ¹⁶ . edi abo ababula, tuli kaloosa akzwa omu kufa akaleeta okufa, baitu edi abacungurwa tuli kaloosa akazwa omu bwoomi akaleeta obwoomi.Erate ebyo naani abiyinza?