¹ . OPawulo omubuwe wa Kristo Yesu n'oTimoseewo ow'aluganda edi oFiremooni omunywaani waamwe erate omukozi omwiraiswe, ² . no Apitiya owaluganda no Alukipo omulwaani omwiraiswe, ne Kanisa edi omu nnyumba yaamu. ³ . Ekisa ne’mirembe ebizwa edi oKanca oItaiswe n'oMukama waiswe oYesu kristo bibbenge naanywe. ⁴ . Neebalya okanca wange buliizo, ni nkwizukira omu kusaba kwange ⁵ . olwakubba mpuura okwendya kwaamu no kwikiriza kwolina edi oMukama waiswe oYesu nedi abaikiiri boona boona. ⁶ . Erate nkukusaba,okugabana edi abaandi. okwikiriza kwaamu kufooke kusai olwa kumanya okwa bintu ebisai ebiri omu niinywe olwa Kristo. ⁷ .Baitu nfunire eisanyu liingi, no’kubudabudibwa omu mwooyo olwa kwendya kwaamu, olwakubba emyooyo ja baikiiri jiriibwe buyaaka oku lwaamu,owa luganda. ⁸ . Ale gonze nka nina amaani goona omu Kristo okukulaanga ekyo ekisaniire. ⁹ . Baitu olwa kwendya nkwegairire mbbe, olwakubba nyisana nka nindi, oPawulo omukaire erate omubuwe wa Kristo yesu. ¹⁰ . Nkukwegayiira olwa mwaana wange Onnesimo, gwe nabyaaliire omu bubuwe . ¹¹ . Ataalina mugaso, baitu aati wa mugaso jooli ne’jendi. ¹² . Oyo niye gwenyiirye jooli,mwanirize olwakubba niye mwooyo gwange. ¹³ . Naaliyenderye okumusigalya ampereze oku’lwaamu omu bubuwe bwange obwanjiri . ¹⁴ . Baitu tinayenderye kukola kintu kyoona kyoonanka tiwetejerye, obusai bwaamu buleme okubba omukuwalirizibwa wazira omukwendya. ¹⁵ .Baitu nikyo yazwiire akwawukanaku ebiro, alyooke obbenge naye emiijo ne miijo . ¹⁶ . Nka takyaali mwiiru, wazira okusiinga omwiiru, owaluganda omuganzi okusiinga omunno jendi, baitu erate okusiingaira kimwei edi we omu mubiri erate nomu Mukama waiswe. ¹⁷ . Ale oba nka okundowoozaku okubba omwiiraamu, musemberye nka niwaali semberye njje. ¹⁸ . Baitu nabba nka aliina kye yakusoberye obanga okumutoonga ekintu kyoona kyoona kibbe okunje. ¹⁹ . Nje oPawulo, mpandiikire n'omukono gwange, ninje ndisasula,erate nneme okukoba nti nkukuteganya erate weena wenkai. ²⁰ Ale owaluganda onsanyusye omu Mukama waiswe owumulye omwooyo gwaange omu Kristo. ²¹ . Nkuwandiikire nka nkwesiga obuwulize bwaamu, nka maite nti olikola oba no kusiingawo. ²² . Baitu ne kiindi ontekereteekere owakusula olwakubba nkusuubira olwa kusaba kwanywe muliweebwa okumbonaku. ²³ . Epafula omubuwe omwirange omu Kristo yesu akulamukirye. ²⁴ . No Makko, Alisutaluuko, Dema,Lukka abakozi Abairange. ²⁵ . Ekisa kya Mukama waiswe oYesu Kristo kibbenge n'omwooyo gwanywe Amiina.