¹ Ale oYesu niyamaare okubaza ebigambo byamwei byoona byoona omu bantu, naingira e Kaperunawumu. ² Ale walowo omwaami wa kitongole omwiiru waamwei gwe yaali ayendya omuno yaali nka alwaire nka akwaaba kuffa. ³ N’oyo niyawuliire ebigambo bya Yesu natuma abakaire b’Ababayudaaya jaali nka akumusaba okwiiza okucungura omwiiru waamwei. ⁴ Boona nibaizire eddi oYesu, ni bamwegaira muno, ni bakoba bati osaniire we oku mukoora ekyo: ⁵ olwakubba ayendya eiyanga lyaiswe, n’eiramyo niye yali tombokeire. ⁶ Ale oYesu nayaba nabo. Ale ni yaali nka tali alai ne nnyumba, omwaami oyo natuma eminywaani jaamwe jaali, nka akumukoba ati sebo, tiwegadya kwiiza, olwakubba nje tinsaniire we kwiingira ansi wakasolya ka kange: ⁷ erate nikyo nzwiire ndema okwesanyiza njekai okwiiza jooli, baitu simoola kigambo bugambo, n’omwaana wange yawona. ⁸ Olwakubba nanje ndi muntu atwaalibwa, erate nka ndina abasirikale b’entwaala: ninkoba omuntu nti yaba, ayaba, n’owondi nti izza, aizza, n’omwiira wange nti kola kini, akikola. ⁹ OYesu niyawuliire ebyo, niyewuunya nakyukira ebibbuura eby’aali bikumusengeerya nakoba ati nkubakoba nti timbonanga kwikiriza kukooto nka kunu gonze omw’Isiraeri. ¹⁰ Ale abantu abatumiibwe nibaire omu nnyumba nibasnga omwiiru nka awonere ¹¹ Ale olwaikire niwayakairewo eibbanga lidooli, nayaba omu kibuga ekyetebwa Nayini; abeegereswa baamwei n’ekibbuura ekikooto nibaaba naye. ¹² Ale niyasembeire oku mulyango gwa kibuga, bona, omulambo nka bakuguwulukya enzai, ogwa mwaana omaamwei gwe yabyaire omwei, n’omaamwe oyo nka namwandu; na bantu baiinji aba mu kibuga omwo nka bali naye. ¹³ Ale Omukama waiswe ni yamuboine n’amusaasira namukoba ati Otakunga. ¹⁴ Nasembera nakwaata oku sanduuke, baddi abaali beetikire ni bemeera. Nakoba ati omwojjo, nkukoba oti imukka. ¹⁵ Oyo eyaali afiire naimuka, naikala, natandika okubaza. Namuweerya omaamwe. ¹⁶ Obutiini ni bubakwaata bona boona, ni bayangiriza oKanca; nka bakukoba bati omuranji omukulu aimukiire mwiswe: erate oKanca akyaliire abantu baamwei. ¹⁷ Ne kigambo kyamwei ekyo ne kisansanira omu Buyudaaya boona boona, n’omu nsi yoona yoona erirainewo. ¹⁸ Ale abeegereswa ba oYokaana ni bamukobera ebigambo byoona byoona. ¹⁹ OYokaana nayeta abeegereswa baamwei babiri n’abatuma eddi Omukama waiswe, nk’akukoba ati niiwe oyo akwiiza, kanda tulindiire owondi? ²⁰ Ale abantu abo nibaikire jaali, ni bakoba bati oYokaana omubatiza atutumire jooli, nka akukoba ati niiwe oyo akwiiza, kanda ki tulindiireyo owondi? ²¹ Ale omu kisera ekyo natamba baiinji endwaire n’okuwaralibwa,n’odaimooni, nabaigali ba maiso baiinji nabatamba. ²² OYesu nairamu nabakoba ati mwaabe mukobere oYokaana ebyo bi muboine ne bye muwuliire, abaigaili ba maiso bakubonia, abacencegere bakutambula, abagenge bakulongooka, abaigali ba matwi bakuwuura, abaffu bakuyimbooka,abooro bakukobeurwa enjiri. ²³ Erate aliina omukisa oyo atalinesitaalaku. ²⁴ Ale abakwenda ba oYokaana ni bamaare okwaaba, natandika okubaza ne bibbuura bya Yokaana ati kiki ki mwagendereire omwirungu okubona? olumole olutengeetebwa n’omulombe? ²⁵ baitu kiki ki mwagendereire okubona? omuntu azwaire engoye ezikunekaneka? bona abazwaala engoye ezisai, abalya emmere ejisai, babba mu mbuga za bakama. ²⁶ Baitu kiki kimwagendereire okubona? Omuranji? Nimwo mbbe,nkubakoba, erate asiingira kimwei omuranji. ²⁷ Oyo niye eyawandikiibweku nti Bona, nje nkutuma omukwenda wange omu maiso gaamu, alisaiirya omuwanda lwaamu jokwaaba. ²⁸ Nkubakoba nti omwaabo ababyalibwa omukali, ndoowo asiinga OYokaana obukulu, baiyu omuto omu bukama bwa Kanca niye mukulu okusiinga ye. ²⁹ N’abantu boona boona nibawuliire n’abasoroli ni baikiriza oKanca okubba omwikiriri ababatiziibwe omu kubatiza kwa oYokaana. ³⁰ Baitu Abafalisaayo, nabegereswa ba mateeka, ni bagaana okuteesa kwa Kanca olwakubba tibabatiziibwe ye. ³¹ Ale abantu aba mirembe zinu n’Abafalisaayo kiki? ³² Bali nka abaana abaikala omu katale, nka bakwetangana; abakoba bati tubafuwiire emirere ni mutabine; tukungire nga abafiriibwe, ni mutakunge maliga. ³³ Olwakubba, oYokaana omubatiza yaizire nka talya mmere’ erate nka tanywa mwenge; ni mukoba muti aluku daimooni. ³⁴ Omwaana wa muntu yaizire nk’akulya nk’akunywa ni mukoba muti bona, omuntu wamairu, omutamiire, omunywaani wa basololya, erate ow’abantu abata n’ebibbi. ³⁵ Erate, amagezi gaweebwa obwikiriri olwa baana baago boona boona. ³⁶ Ale Omufalisaayo omwei namweeta okulya naye, niyangiire omu nnyumba ey’Amufalisaayo oyo naikala oku mmere. ³⁷ Ale, bona, omukali eyaali omu kibuga omwo, eyaalina ebibbi, niyetejerye nka aikaire oku mmere omu nnyumba y’Amufalisaayo, naleeta eccupa eya mafuta aga musutai, ³⁸ nayemeera emabega w’amagulu gaamwei, nka akukunga, natandika okumutonyeza amaliga oku magulu gaamwei, nabisangula neisoke ery’akumutwe gwaamwe, navumbbatira amagulu gaamwe, nagasiiga amafuta. ³⁹ Ale Omufalisaayo eyamweetere niyaboine, nabaza omunda yaamwei ati omuntu onu, siinga abbaire muranji yandyetejerye omukali amukwataku nali, erate naisana, nka atta n’ebibbi. ⁴⁰ OYesu nairamu nakoba ati Simooni walowo kinkwendya okukukobera, nakoba ati mwegesya bazza. ⁴¹ oYesu Waalowo omuntu ey’awolanga, baitu yaalina batonga babiri, omwei nka akutongebwa eddinaali bitaanu, n’owondi ataanu. ⁴² Ale nibaali nka tebaliina kya kumusasula nabasaasira bakali babiri. Ale okwaabo alisiinga oku mwendya alai? ⁴³ OSimooni nairamu nakoba ati nkulowooza oyo gwe yasiingire okusaasira eziinji omuno. Namukaba ati osaare kusai. ⁴⁴ oYesu nayindukira omukali oyo, nakoba ati Simooni okubona omukali onu? nyingiire omu nnyumba yaamu notamperye maizzi ga magulu gange: baitu onu atonyeize amaliga gaamwe oku magulu, nagasimulisya eisoke lyamwei. ⁴⁵ Tonvumbbatiire we: Baitu, onu nakaingiira akyaali kulekawo kuvumbbatira magulu gaange. ⁴⁶ Tosiigire mafuta ku mutwe gwange; baitu onu ansiigire amafuta aga musutai oku magulu gaange. ⁴⁷ Nikyo nzwa nkukoba nti asaasirwe ebibbi byaamwei ebiinji olwakubba okwendya kwamwei kwiinji; Baitu, asaasirwa akadooli okwendya kwamwei kudooli. ⁴⁸ Namukoba ati osaasirwe ebibbi byaamu. ⁴⁹ Ale abaali baikaire oku mmere naye, nibatandika okubaza bonkai n’abonkai nti naani onu asaasira n’ebibbi? ⁵⁰ oYesu nakoba omukali ati okwikiriza kwaamu kukucungwire; yaba mirembe.