¹ Oluzwanyuma lw'ebyo, OYesu nayaba ebuluba, wa nnyanja ya Ggaliraaya nga nijo nyanja ya Tiberiya. ² . Ekibbuura kikooto kyali kikumusengeerya, kubanga baali babwoine obubonesyo bweyaali akoore oku balwaire. ³ . OYesu nayaba aiguru oku lusozi, era eyo naikaara n'abegesebwa baamwe. ⁴ . N'okwakalwaku, embaga y'Abayudaaya, kwali kuli ampi okwika. ⁵ . Awo OYesu naimula amaiso, nabona ekibbuura kikooto niikikwiza gyali, n'akoba OFiripo ati, twagula ayi emere, abantu bani gyebaalya? ⁶ . Yasimwoire kini n'akumugezesya, baitu ye yenkai yaali n'amaite ekyakukola. ⁷ . OFiripo nairamu atii emere egulwa edinaali ebikumi ebibiri tiyabamale, buli omwe nafunaku akadooli? ⁸ . Omwei okubegesebwa baamwe, OAndereya, omuganda wa Peetero, namukoba, ⁹ . Walowo ani omwojo ali n'emigaati itaanu egya sayiri n'encwi ibiri; baitu bini byabagasa ki abaingi batyo? ¹⁰ . OYesu nakoba ati, mwikalisye abantu. Ati walowo eisubi ringi omu kifo ekyo. Awo abasaize nibaikala, omuwendo nk'enkumi itaanu. ¹¹ . Aale OYesu natoola emigaati; niyebalya, nagabira badi abaikaliire, atyo-mbe n'encwi nka nibatakire. ¹² . Nibamaare baikutire nakoba abegesebwa bamwe ati mukumbannye obukiiniiko obusigairewo omu abo abaliire. ¹³ . Awo nibabikumbania nibaizulya ebibbo ikumi na obwa bukiiniiko/nsigaaro bwa migaati etaanu ebya sayiri, badi abaliire bwe baalekere. ¹⁴ . Awo abantu nibabwoine akabonesyo ke yekoore, ni bakoba bati; mazuma oni niye omulangi akwiza omunsi. ¹⁵ . Awo OYesu niyetejerye nga bakwaba okwiza okumukwata, bamwindulemu omukama, nairayo-te oku lusozi yenkai. ¹⁶ . Baitu obwire nga bukusweka, abegesebwa baamwe nibasirimuka oku nnyanja; ¹⁷ . nibaingira eryato, nibasomoka okwaba e kaperanawumu. N'obwire bwali buswekere nga n'OYesu acaali kwika gyebali. ¹⁸ . Enyanja necambaituka okimpangwe owa mani nga akuwunga. ¹⁹ . Nibaali bagimbireku emayiro amakumi abiri na itaanu, oba amakumi asatu, nibabona OYesu n'akutambuura oku nyanja, nga akwigereera obwato; nibatiina. ²⁰ . Baitu nabakoba ati, ninje nje, mutatiina. ²¹ . Awo nibaikiriza okumwingirya omu bwato; mangu ago obwato nibwika ebuluba gyebaali bakwaba. ²² . Ekiro ekyakabiri, ekibbuura ekyali kyemereire ebuluba wa nnyanja, nibabwoine nga wasigaireyo obwato bumwei bonkai eyo, era nti OYesu yaali taingiire bwato n'abegesebwa baamwe, baitu nti abegesebwa baamwe baali bazwirewo konkai. ²³ . baitu amaato agandi bwazwire e Tiberiya nga gakwika ampi ne jebaliiriire emigaati omukama waiswe niyamaare okwebalya. ²⁴ . Aale ekibbuura nikyabwoine OYesu taaliyo, gonze abegesebwa baamwe, bo bawenyenere nibaingira obwato nibaaba akaperanawumu, nga bakuswagana OYesu. ²⁵ . Nibamulengereire ebuluba wa nnyanja nibamukoba bati, oizire ani? ²⁶ . OYesu nairamu nakoba ati nimwo mbe nkubakoba nti; mukunswagana tilwakubba nti mwabwoine obumanyisyo naye lwakubba mwaliire oku migaati nemwikuta. ²⁷ . Temukooranga mere ejunda, baitu emere ebbaawo okwika oku bwomi obutawaawo, kyemuliweebwa omwana wa muntu; kubanga oku ye, oitaiswe OKanca amutaireku akabonesyo. ²⁸ . Aale nibamukoba bati, tuteekeibwe kukola ki, nitubba bakoola emirumu gya Kanca? ²⁹ . OYesu nairamu nakoba ati guni Yokaana nigwo mulumo gwa Kanca, okwikiriza oyo gweyatumire. ³⁰ . Aale nibamukoba ati, kabonesyo ki we kokola tubone, leke tukwikirize? ³¹ . Azeiza baiswe baliiranga maloo omu irungu, nka nikyawandikiibwe kiti, yabawaire emere okuzwa omu iguru eya kulya. ³² . Aale OYesu nakoba ati, nimwo-mbe nkubakoba nti OMusa tiniye yabawaire emeree okuzwa omu iguru; baitu oitaange niye yabawaire emere eya mazuma eyazwire omu iguru. ³³ . Kubanga emere ya Kanca nijo ezwa omu iguru ereetera ensi obwomi. ³⁴ . Awo nibamukoba bati, tuweryenge buliizo emere ejo. ³⁵ . OYesu nabakoba ati, ninje mere ya bwomi, aiza gyendi taalibba muzala, alinyikiriza talibba malo gonze akadooli. ³⁶ . Baitu nabakoba ati, mumbwoine, era timunyikiriize. ³⁷ . Buli kimwei OKanca kyampeerya bariza gyendi, era buli aiza gyendi tindimupeka gonze akadooli. ³⁸ . Kubanga tinazwire mu iguru kukola ekyo nje kyenkwendya baitu eky'oyo eyantumire. ³⁹ . Era kuni nikwo kwendya okw'oyo eyantumire, nti ntafeerwa gonze ekimwe okwebyo byeyampaire baitu mbayimbokesye omu kiro ekigeerayo. ⁴⁰ . Kubanga OItange kya kwendya nikyo kini buli muntu yeena aboona omwana namwikiriza abbe n'obwomi obutawaawo; njeema ndimuyimbooca oku lunaku olwa nkomeero. ⁴¹ . Aale Abayudaaya nibatandika okwetomboita olwakubba yakobere ati, ninje mere eyazwire omwiguru. ⁴² . Nibakoba bati nti ani oni tiniye OYesu omwana wa Yusufu, gwetumaiteku oitamwe n'omaamwe? Ati buni akoba atyai nti nazwire mu iguru. ⁴³ . OYesu nakoba ati, mutetomboita nywenka na nywenkai. ⁴⁴ . Ndoowo asobola okwiza gyendi nga oitaange eyantumire natamukokota. ⁴⁵ . Kyawandikiibwe omu balangi nti; boona balisomesebwa Kanca. Buli awuura era okuzwa eji Kanca, aiza gyendi. ⁴⁶ . Tikubba nti walowo eyabwoine oku Itaange, wabula eyazwire eji Kanca, oyo niye yaboine OItaange. ⁴⁷ . Nimwo-mbe nkubakoba nti; Ayikiriza ata n'obwomi obutawaawo. ⁴⁸ . Ninje mere ya bwomi. ⁴⁹ . Abazeiza banywe baliiranga emaanu omu irungu, nibafa. ⁵⁰ . Eni nijo mere ezwa omu iguru, omuntu ajiryeku, aleke okufa. ⁵¹ . Ninje mere ejoomi ezwa omu iguru; omuntu n'alya oku mere eni alibba mwomi emiijo: era emere gyendigaba nigwo mubiri gwange, olwa bwomi bwa nsi. ⁵² . Aale Abayudaaya nibawakana bonka na bonkai, nibakoba bati; oni asobola atyai okutuweerya omubiri gwamwe okulya? ⁵³ . Aale OYesu n'bakoba ati; mazima, mazima nkubakoba nti, okutoolaku nga muliire omubiri gwa mwana wa muntu era nimunywa n'omusaayi gwamwe, timuta na bwomi omu nywe. ⁵⁴ . Buli oyo alya oku mubiri gwange n'anywa n'omusaayi gwange, ata n'obwomi obutawaawo; njeena ndimuyimbookerya omu kiro kya nkomo. ⁵⁵ . Kubanga omubiri gwange nijo mere egituufu, n'omusaayi gwange, abba mu ninje, ⁵⁶ Alya omubiri gwange, erate anywa Eisagama lyange,abba mu ninje,njeena mu niye. ⁵⁷ . Nk'oitange omwomi niyantumire, njeena nimwo ndi omwomi okulwa Itaange; atyo buli andyaku, yeena alibbaawo ku Iwange. ⁵⁸ . Eni nijo mere eyazwire omwiguru, tinka emere abazeiza gyebaliire nibafa. Buli alirya oku mere eni alibba mwomi ebiro byoona. ⁵⁹ . Bini OYesu yabisimoleire mu ikumbaniro nga akwegesya omu kaperanawumu. ⁶⁰ . Awo, baingi omubegesya bamwe, nibawuliire nibakoba bati, ekigambo ekyo kizibu; naani ayinza okukiwurirya. ⁶¹ . Baitu OYesu niyetejerye omunda yamwe nti abegesebwa baamwe bakwetomboitera kini, nabakoba nti, kini kibbaire kibenyanyairye? ⁶² . Ale kiribba kityai nimwalibona omwana wa muntu n'akuniina gyeyaali omukwekeera? ⁶³ . Omwoyo nigwo guweerya obwomi; omubiri ndoowo kyegugasa: ebigambo byensimwoire naanywe nibyo omwoyo, nibwo bwomi. ⁶⁴ . Baitu walowo abandi omunywe abataikirize kubanga OYesu yetejerye okuzwa omukwekeera abataikiriize nibaali, era n'akwaba okumwoyeera n'ali. ⁶⁵ . Nakoba ati nimwo lwaki mbakoba nti; ndoowo ayinza kwiza gyendi kanda nga akiwereirwe itewange. ⁶⁶ . Oluzwanyuma lwa kini, baingi oku begesebwa bamwe nibairayo era nibataire kutambula naye. ⁶⁷ . Aale OYesu nakoba eikumi n'ababiri ati; nywena mwakwenderye okwaba? ⁶⁸ . OSimooni Petero nairamu ati, mukama waiswe, twayaba ayi? Ota n'ebigambo bya bwomi obutawaawo. ⁶⁹ . Iswena tukwikirize era twetejerye, nka n'oli omwikiriiri wa Kanca. ⁷⁰ . OYesu nairamu ati; tininje nabakomerye nywe eikumi n'ababiri, era omwe okunywe niye setaani. ⁷¹ . Yasimwoire oku Yuda omwana wa Simooni O Isikalyoti, kubanga niye yaali akwaba okumulyamu olukwe, niye omwe oku ikumi n'ababiri.