¹ Ale ne nywe abagaigai, mukuunge mulire olw'einnaku ezikwiiza kunywe. ² Obugaiga bwaanywe bujundire, n'ebizwalo byaanywe biriiribwe ebinyenje. ³ . Ezaabu yaanywe n'effeeza zitalagire, n'obutalagi bwaazo buliba bujjuurwa gye muli, bulirya omubiri gwaanywe nk'omuuro. Mwaakumbaniry ebintu mu nnaku zenkango. ⁴ Bona, empeera yabakozi abaakungula enimiro zaanywe, gye mulyazaamanya, ekunga n'ebiwoobe byaabo abakungula byaagingiire omu mwatwi ga Mukama owa Iye. ⁵ Mweesanyusya okunsi, ni muwoomerwa ebinyumu, mugezzeisya emyooyo gyaanywe oku lunaku olwakitinisya. ⁶ Mwasaare omusango okusinga omwiikiriiri, ni mwiita, yeena natabawakanisya. ⁷ Baitu abaluganda, mugumiikirizenge okwiikya okwiiza kwa Mukama waiswe. Bona, omulumi akulindirira ebibala byansi eby'amuwendo omwingi, abigumiikirya okwiikya enkuba ya dumbi n'eyattoggo. ⁸ Erate nyweena mugumiikiryenge, munywelyenge emitima gyaanywe, kubbanga okwiza kwa Mukama waiswe kuli ampi ⁹ Timwemulugonyanga, aboluganda, nywenkai na nywenkai, muleme okusaarawo omusango , bonna omusazi w'amisango ayemereire ku lwiigi. ¹⁰ Mutwaale ekyakuboneraku, b'alunganda ekyakubonyabonyezebwe n'okugumiinkiriza, kwa balangi abasimoolanga omu Ibara lya Mukama. ¹¹ Bona, tubeeta ba mukisa abagumiikirizanga; mwawuure okugumiikiriza, kwa Yobu, erate mwaboine Omukama okunkomerero nakola, nka Mukama wa kisa ekingi n'okusaasira. ¹² Baitu okusinga byoona, abaluganda, timulayiranga gonze eiguru, gonze mwankubaire eki ragiro ekindi kyoona, baitu ekigambo kyaanywe, ti wewaawo, kibbenge ti wewaawo, muleme okugwa ¹³ Aliwo omu nywe omuntu ali okubbi? Asabenge. walowo akusanyuka? ayembenge eby'akutendereza oKanca. ¹⁴ Alowo munywe muntu alwaire? ayetenge abakaire aba kanisa, bamusabirenge, nga bamusigaku amafuta mwiibara rya Mukama waiswe ¹⁵ N'okusaba kw'okwiikiri kulirokola omulwaire, n'omukama waiswe alimwiimusa, era obanga eyakoore ebibbi birimu. ¹⁶ Ale mwaatuuranganenge ebibbi byaanywe nywenkai na nywenkai, musabiraganenge, mulyoke muwone. Okusaba kwamuntu omwiikiriiri kuyinza muno mu kukola kwakwo. ¹⁷ Eriya yabaire muntu eyakwaatibwe byonna nka iswe, n'asaba muno enjura eleme kutoonya, enjura n'etatonya kunsi emyaka n'emyeezi mukaaga. ¹⁸ Nasaba ate, eiguru nilitonyesya enjura, ensi nemera ebibala byaayo. ¹⁹ Abalugande, omuntu yeena mu nywe na kyaama nga okuzwa omumazima, omuntu n'amala namuyindula,. ²⁰ Amanyenge nga ayindura omwoononyi okuzwa munzira egikyaamu, alirokola obwomi omu kufa, erate alisweeka ku bibbi bingi.