¹ .Baitu okw'ebyo ebiweebwayo edi ebisani; tumaite nka isweena tuliina okweeteja. Okweeteja kuleeta okwegulumirya; baitu okwendya komboka. ² . Omuntu nalowoozanga nk'alukku kiyetejere, nka akyaali kweeteja nikimugwanira okweteja; ³ . Baitu omuntu nayendya oKanca,oyo amanyibwa niye ⁴ . Ale okulyange ebiweebwaayo edi ebisani, tumaite nka ekisani tikintu omunsi, erate nka ndoowo Kanca wondi wazira omwe. ⁵ . Olwakubba gonze nka walowo abetebwa aba kanca, obate mwigguru obate mu nsi, nka ni walowo aba kanca abainji na baami abainji; ⁶ . Baitu jituli walowo oKanca omwe, oitaiswe, omuzwa byoona byoona, iswena tuli kulwa niye; no Mukama waiswe omwe, oYesu Kristo abeesyaawo byoona byoona, erate atubesyaawo iswe. ⁷ . Baitu okweteja okwo tikuli mu bantu boona boona; baitu abandi, olwakubba bamanyiire kimwe ebisani okwiica ati, balya ekiweweibweyo edi ekisani, olwakubba omwooyo gwaabwe gunaki, gubba na kusiisa. ⁸ . Baitu ekya kulya tikitusimisya edi oKanca, erate nitutalya ndoowo kitusubwa, erate nitulya titulina kitweyogeraku. ⁹ . Baitu mwekuumenge eiddembe lyaanywe eryo liremenge kufooka nkonge edi abanaki . ¹⁰ Olwakubba omuntu omunaki nakubona we aliina okweeteja nka oikaire okuumere omu kirooro kya kisani, omwooyo gwaamwe nigubba omunaki; tiguliguma kulya ebiwebwaayo edi ebisani? ¹¹ . Ale owaluganda oyo omunaki; oKristo gwe yafiirire azikiira , olwa kweeteja kwaamu. ¹² . Erate kityo nimusiisanga abaluganda, nimusumuta omwooyo gwaabwe, nigubba nka gunaki, mubba mukusiisa Kristo. ¹³ . Ale,obate nka ekya kulya kyenyanyatya omuganda wange, tinalyenge nnyama emijjo joona joona, nnemenge okwenyanyatya omuganda wange.