¹ .Khandi Yesu kakaadira abeeki baye olukaado nga lu sibakhoyera okhuta esinani mu khusaba owutajjoηηa. ² . Kabawoola ati: “Aliwo omukayi we’misaango mu siko siindi otatya Weere khandi nga syafwa khu batu. ⁵ naye khu lwokhutamirira khwo’mufwire ono, ndamukaye nga lwadakha, khu akhaye okhunjoηηya no khu nechembangakho!’” ³ . Manu aliwo omufwire mu siko esyo owechaanga yali nawoola ati, Ngayekho omusiku wange. ⁴ . Olwamberi kakhaya okhufukiirira. Naye oluyuma kabaasa mu mwoyo kwaye ati, Anakhaba nintatya Weere khandi nga sinfwa khu batu, ⁶ . Naye Omwami kawoola ati, “Muwulire omukayi oyo otaasi omulungifu syawoola. ⁷ . Manu nende Weere syalikaya abadoole baye, abamulirira esideete ne’siro? Alichiririra nabetusakho? ⁸ . Mbawoola nti, alibakaya wangu, naye omwana womutu nikakheeche, alyakaana okhufukiirira khu syalo? Olukaado Lwomu Falisaayo Nende Omuwoosa. ⁹ . Khu bandi abali ni bebaasa baati bolerefu nga balekeresa abasyawe bandi, Yesu kabakaadira olukaado luno ati: ¹⁰ . Abatu babiri bacha mu nyumba ya Weere okhwekalikhira, mulala mu Falisaayo owundi nga muwoosa womusolo. ¹¹ . OmuFalisaayo kasingira kekalikhira ebimudiirakho omwene ati: Weere nkhwebasa olwokhuba sindi nga abatu bandi boosi__ ata nga abebi, abakholi bebibi, abadamba__ ata nga ono omuwoosa wemisolo. ¹² . Moonga enjala khabiri mu sabbiiti, ntaayo sirala syekhumi khu byoosi binfuna. ¹³ . Ne omuwoosa womusolo kemera ale. Kakhaya nokhusiingisa emoni chaye mukulu, kekhubba mu sirifu kawoola ati, Aa Weere wungwiire esisa ese omukhosi webibi. ¹⁴ . Mbawoola nti omutu oyo okhulekha owundi ola, kakowolayo engo waye ngaweresiwe owolerefu mu moni cha Weere. Olwokhuba wuli oweniniya aliisiwa asi, ne oweyisa assi alininisiwa. Abaana Bayere Nende Yesu. ¹⁵ . Abatu boosi bali baleeta abaana abayere eyiri Yesu okhubesakho amakhono kaye. Naye abeeki baye nibawona sino, babakhamukhira. ¹⁶ . Naye Yesu kalanga abaana abayere beeche yali nga awoola ati, Mulekhe abaana bayere beeche yiindi, mutabakaana, olwokhuba abali nga abo Owenengo wa Weere wawe. ¹⁷ . Mbawoolera amasima nti, omutu yesi otalifuna Owenengo wa Weere nga omwana omuwere saliwingiramo ata nawutono. Omutuki Omuyiinda. ¹⁸ . Omutuki wundi kamuteeba nga awoola ati, Musomesa mulayi, nkhole si khonsikhire owulamu owutakama?” ¹⁹ . Yesu kamuwoola ati wunangira si omulayi? Awumawo omulayi__ okhutusakho Weere yeηηene. ²⁰ . Amalako kano okamanyire: “Otakholanga owudamba, otetanga, otebaanga, otayinganga omutu syataakholire, otanga mu bbabbawo nende mamawo oluyaali. ²¹ . Kakowolamo ati, Ebyo byosi byoosi nabidiira okhutula mu wudoto wange. ²² . Yesu nikawulira sino, kamuwoola ati, Olemukhirekho sirala. Kusa byooli nabyo byosi byoosi, obikabire abawati, awo kho obe nowuyiinda mukulu. Nomala otyo, wiiche wunoonde. ²³ . Ne nikawulira sino kadiirwa ettima, olwokhuba kali nowuyiinda wungi. ²⁴ . Yesu kamwewunja kawoola ati, Nga sidinyu abayiinda okhwingira mu wenengo wa Weere! ²⁵ . Masima keene, syangu ensukhiri okhubita mu kheena khempiso okhukhira omuyiinda okhwingira mu wenengo wa Weere. ²⁶ Abawulira sino bawoola baati, ne wunaanu naanu onyala okhuwona? ²⁷ . Yesu kabakowoolamo ati, Ebitanyalikha eyiri abatu binyalikha eyiri Weere. ²⁸ . Petero kawoola ati, Wona, efwe khwalekha byoosi bikhwali nabyo khwakhuloonda! ²⁹ . Yesu kabawoola ati, Masima mbawoola nti, Awumawo omutu yeesi owalekha edaala lyaye oba omukhasi waye oba bamwanawaηηina oba abewusi oba abaana khulwo’wene’ngo wa Weere ³⁰ otacha khwakaana khandi amakhabi mangi mu ndaalo chino, nende mu ndaalo chiicha, owulamu owutaakama.” Yesu Khandi Alakula Khu Khufwa Khwaye. ³¹ . Yesu keecha kawukula ekhumi na babiri kabawoola ati, Khuli okhunina okhucha e Yerusalemi, nende ebyo byoosi ebyawandiikiwa ba nabbi ebidiira khumwana womutu bicha okhwolerera. ³² . Acha okhudiisiwa abateende. Balimukhomoola, bamuyire wubi, khandi bamufuucheho amatte, nokhumukhubba nokhumwiita. ³³ . Khu ludaalo lwokhudatu alisyuukhira khandi. ³⁴ . Abeeki khaba si bamanyirawo ata sirala khu ebyo. Amakhuluutu kabyo kabakisiwa bakhaya okhumanya bikawoola. Omuwofwu Osabirisa Awona. ³⁵ Nga Yesu lukali nikolerera Yeriko, omuwofwu wemoni kali kekhaye khungira nasabirisa. ³⁶ Nikawulira esidiikha nisibita ambi kateeba ati siina esyo. ³⁷ Bamuwoolera baati Yesu omu Nasalesi abita. ³⁸ Kalomalomera amukulu nga awoola ati, Yesu, mwana wa Dawudi, ngwiire esisa! ³⁹ Abo abali ni batangiiyemo bamukhamukhira bamuwoola awuleere, naye kemeeda okhulomalomera amukulu lukali ati, Mwana wa Daudi, ngwiire esisa! ⁴⁰ Yesu keema kalagira omusaacha oyo bamuleete yali. Nikasuda ambi, Yesu kamuteeba ati, ⁴¹ Odakha nkhukholere siina? Kamuwoola ati, Omwami, ndakha okhuwona. ⁴² Yesu kamuwoola ati, Funa okhuwona; okhufukiirira khwawo khukhuwoniisye. ⁴³ Awene naweene kafuna okhuwona, kamala kaloonda Yesu nakiniya Weere. Ne abatu boosi ni bawona sino, boosi bakiniya Weere.