¹ Ebyo nibiweeye, Yesu kewodookhaniya mu Galiraaya, nga esichiririrwa adakha abe ale nende Buyudaaya olwokhuba Abayudaaya eyo bali baliindire okhumalawo owulamu waye. ² Naye omuyumo kwe si Yudaaya okwe bikaali nikwali nikunatere okhwoola, ³ bamwanaηηina Yesu bamuwoola baati, “Okhoyire otule ano ache mu Buyudaaya, kho abeeki bawo banyale okhuwona ebya mayiiya byokhola. ⁴ Yiwuma odakha okhufumwa lukali okhola ebiitu muwekisi. Nga nuli okhukhola ebiitu bino, weyekese eyiri esyalo syoosi.” ⁵ Olwokhuba nende ata bamwanaηηina beene sibamufukiiriramo. ⁶ Nolwesyo Yesu kabawoola ati, “Esikha syange esituufu sitoola; khu lwenywe esikha syosi syoosi situufu. ⁷ . Esyalo sisinyala khubakhaya, naye siinkhaya ese olwokhuba njulira nti esyalo bisikhola bibi. ⁸ Enywe muche khu muyumo. Ese nsiiri okhwoola okhucha khu muyumo, olwokhuba khu lwange esikha sisiiri okhwoola.” ⁹ Nikamala okhuwoola sino, kasikala mu Galiraaya. ¹⁰ Ne, bamwanaηηina nibamalire okhucha khu muyumo, yesi kacha, ne sikachiira alafu, kacha muwekisi. ¹¹ Wunaanu khu muyumo Abayudaaya bakhuluutu batingachala nibateeba baati, “Omusaacha oyo ali yena?” ¹² Mubidiikha aliwo okhuwewetana khukali khu ye. Abandi bawoola baati, “Musaacha mulayi.” Abandi bakowolamo baati, “Bbe, abacha abatu.” ¹³ Naye yiwuma wamulomalamakho esiitu alafu nalafu olwokhutya Abayudaaya. Yesu Asomesera Khu Muyumo ¹⁴ Omuyumo nikwali nikwolire akati, kho Yesu kacha mulwanyi lwe nyumba ya Weere kachaaka okhusomesa. ¹⁵ Abayudaaya bawuka bateeba baati, “Omusaacha ono kafuna atye amakesi kaati ate nga sikasoma?” ¹⁶ Yesu kakowolamo ati, “Okhusomesa khwange si khwange esse omwene. Khutula eyiri oyo owantuma. ¹⁷ Oyo yeesi okhengawo okhukhola Weere byadakha, kakhafumbule oba okhusomesa khwange khutula eyiri Weere nawo nomaloma khulwange simweene. ¹⁸ Oyo olomaloma omwene khulwaye akhola atyo okhwefunira oluyaali omwene khulwaye, naye oyo okhola khu lwo’luyaali lwo’yo owamutuma mutu wa masima; yiwuma sibi khu ye. ¹⁹ Musa si kabawa amalako? Ate nga yiwuma mulala khwinywe oliinda amalako. Lwasiina mukesakho okhunjitta?” ²⁰ Esidiikha syakowolamo siiti, “Olikho omusambwa.” “Nanu okesakho okhukhwiita?” ²¹ Yesu kabawoola ati, “Nakhola esyamayiiya sirala, ne mwawuka. ²² Ate nga, olwokhuba Musa kabawa okhukheba (asyakhaba mbo sisyatula eyiri Musa, naye eyiri ba kuuka yefwe), mukheba omwana khu lwa Ssabiiti. ²³ Wunaanu omwana nanyala kakhebewa khu lwa Ssabiiti kho amalako ka Musa kakhaye okhukhalakiwa, lwasiina muli ne’ttima nange olwokhuwoniya omutu mulamba khu lwa Ssabiiti? ²⁴ Mutakhenganga omisango okhwema khu mbonekha yoŋene, ne mukhengenge esituufu.” Yesu Nje Kurisito? ²⁵ Khulwe mboosi eyo abatu bandi khubo mu Yerusaalemi bachaaka okhuteeba baati, “Ono sinje omusaacha yibali nibakesakho okhwiitta? ²⁶ Nguno ali ano, alomaloma alafu n'alafu, naye nga yiwuma mboosi yibamuwoola. Abowunyala masima keene bamalirisiise baati nje Kurisito? ²⁷ Naye khumanyire omusaacha ono yatula; Kurisito naliicha, yiwuma olimanya yatula.” ²⁸ Manu Yesu, nasisomesera mulwanyi lwe’nyumba ya Weere, kayula ati, “Eee, mu manyire, khandi mumanyire yintula. Sindi ano khulwange, naye oyo owantuma mutuufu. Simumumanyire, ²⁹ naye ese mumanyire olwo’khuba ntula yaali khandi kantuma.” ³⁰ Khusino bakesakho okhumudiira, naye yiwuma owamutakho omukhono, olwokhuba ebikha byaye byali bisiiri okhwoola. ³¹ Ne, bangi mu sidiikha ba’mutamo owesike. Bawoola baati, “Kurisito naye naliicha, alikhola owuwonero w’amayiiya wungi kakhira omusaacha ono?” ³² Abafalisaayo bawulira esidiikha nisiweweetana ebiitu nga ebyo khu ye. Manu abemeresi bakhuluutu nende Abafalisaayo batuma abaliindi be’nyumba ya Weere okhumudiira. ³³ Yesu kawoola ati, “Ndi nanywe olwesikha sitono syene, niimala nja eyiri oyo owantuma. ³⁴ Mulingonya, naye simuliimbona; ne khandi andi simunyala khwiichawo. ³⁵ Abayudaaya bawoolana abene na’beene baati, “Ena omusaacha ono yatekekha okhucha yikhutanyala khumuwona? Alicha abatu befwe yibasalanira mu Bayonaani, asomese Abayonaani? ³⁶ Siina sikekesa nawoola ati, “Mulingoonya ne simuliimbona; khandi simunyala khwiicha esse yindi?” ³⁷ Khu ludaalo lusembayo khandi olukhongo olukhirira erala olwo’muyumo, Yesu kema manu kalomalomera mukono lya’mukulu ati, “Ni aliwo olumwa owuluwo, keche yiindi anywe. ³⁸ Nawuli wunfukiiriramo, nga esyawandiikiwa nisyakhawoola, ensulo cha’maachi kowulamu chiribisya nichimutulamo.” ³⁹ Okhuwoola sino kali kekesa Omwoyo, okwa bamufukiiriramo kubalifuna olunyuma. Okhwoola ebikha ebyo Omwoyo kali asiiri okhubaweewa, olwokhuba Yesu kali atawewa oluyaali. ⁴⁰ Nibawulira emboosi chaye, abatu bandi bawoola baati, “Masima ono nje nabbi.” ⁴¹ Abandi bawoola baati, “Nje Kurisito.” Ne abandi, beteeba baati, “Kurisito anyala atye katula mu Galiraaya? ⁴² . Esyawandiikiwa sisiwoola siiti Kurisito alitula mu lwiiwulo lwa Daudi khandi mu Beserekemu, esiko Daudi mukamenyanga?” ⁴³ Manu abatu bakawukhanamo khu lwa Yesu. ⁴⁴ Abandi badakha okhumudiira, naye yiwuma owamutakho omukhono. Owutafukirira Wa bemeresi Ba Bayudaaya ⁴⁵ Esyakamayo abaliindi be nyumba ya Weere bakowolayo eyiri abemeresi bakhuluutu nende Abafalisaayo, ababateeba baati, “Lwasiina simumuleetire?” ⁴⁶ Abaliindi bakowolamo baati, “Yiwuma walomalomakho nga omusaacha ono lwalonaloma.” ⁴⁷ Abafalisaayo babakowolamo baati simwekesa siri nti mweesi ababachire?” ⁴⁸ Alikhowo omutukki yeesi mu Bafalisaayo owamufukiiriramo? ⁴⁹ Bbe! Naye esibbubbu sino esitamanyire malako balaame. ⁵⁰ Nikodemu, owali nachiiye eyiri Yesu khale khandi owali owasyaawe, kateeba ati, ⁵¹ “Amalako kefwe kakhengera omutu omusango nibatawulira siina syakhola?” ⁵² Bakowolamo baati, “Wesi otula mu Galiraaya? Sitiingalemo, manu onawone oti nabbi syatula mu Galiraaya.” ⁵³ Manu nawuli otula kacha ewaye.