¹ Abafalisaayo bawulira baati Yesu kali afuna khandi abatiisa abeeki bangi okhukhira Yokana, ² asyakhaba mbo mu masima Yesu sinje owali abatiisa, naye abeeki baye. ³ Omwami nikamanya sino, katula e Buyudaaya kakowolayo lundi e Galiraaya. ⁴ Wunaanu kali ali no’khubitira mu Samaliya. ⁵ Manu keecha musiko mu Samaliya esilangiwa Sukali, ambi nende endalo Yakobo yikali naweye omusyani waye Yosefu. ⁶ Omwaalo Kwa Yakobo kwaliyo, ne Yesu, no’wujjoηηu wukali nawo mulukendo, kekhala assi amwaalo. Yali ambi esaawa yo’mukaaga. ⁷ Omukhasi mu Samaliya ne keecha okhudaya amaachi, Yesu kamuwoola ati, “Wakhambakho esyo’khunywa?” ⁸ (Abeeki baye bali bachiye mu siko okhukula ebyo’khulya.) ⁹ Omukhasi mu Samaliya kamuwoola ati, “Oli Omuyudaaya nange ndi omukhasi omusamaliya. Onyala otye onkhunsaba esyo’khunywa?’’ (Olwokhuba Abayudaaya sibakholagana nende Abasamaliya.) ¹⁰ Yesu kamukowolamo ati, “Oba niwamanya esiyanwa sya Weere nende oyo oli khu khusabaanga esyo’khunywa, wakhamusabire khandi kakhakhuweye amaachi akowulamu.” ¹¹ Omukhasi kawoola ati, “Omwami,” “Owuma siitu syo’khudayira khandi omwaalo muleeyi assi. Amaachi ko’wulamu kano onakatuse yena? ¹² Ewe okhirakho Seefwe Yakobo, owatuwa omwaalo khandi omweene kakunywamo, nende abasyani baye nende ebyaayo byaye na’mayicho kaye?” ¹³ Yesu kakowolamo ati, “Nawuli onywa khu maachi kano aliba no’wuluwo khandi, ¹⁴ naye nawuli onywa amaachi kaamuwa syaliwulira wuluwo khandi, mumasima, amaachi kamuwa kaliba ensulo mu’ye akakhulukusa okhwoola mu wulamu owutawawo.” ¹⁵ Omukhasi kamuwoola ati, “Omwami, mberese amaachi kano nkhaye okhuba no’wuluwo khandi nakame okhwichaanga ano okhudaya amaachi.” ¹⁶ Kamuwoola ati, “Cha, olaange wamwo omale okowole.’’ ¹⁷ Omukhasi kakowolamo ati, “Mbuma wamwange.” Yesu kamuwoola ati, “Oli mutuufu nuwoola oti owuma wamwo. ¹⁸ Esituufu siri siiti, wali kho nende bawamwo bataanu, no’musaacha yoli naye wunaanu wuno khaba siwawo. Siwakhalomaloma situufu syeene.” ¹⁹ Omukhasi kawoola ati, “Omwami,” “Ndi okhuwona nti oli Nnabbi. ²⁰ Ba sefwe bekalikhiriranga khu lugulu luno, naye enywe Abayudaaya muwoola muuti esifwo sikhuteekwa okhwekalikhiramo siri mu Yerusaalemi.” ²¹ Yesu kaatukhirisa ati, “Fukiirira bimboola, mukhasi ewe, esikha siicha okhwoola lumutakhekalikhire senywe khulugulu luno oba Yerusalemi. ²² Enywe aba Samaliya mwekalikhira bimutamanyire; efwe khwekalikhira bikhumanyire, olwokhuba okhuwonesewa khutula mu ba’Yudaaya. ²³ Naye esikha siicha okhwoola ni khandi syolire abekalikhira abatuufu lu balyekalikhira ssaawe mu mwoyo na masima, olwokhuba nje abekalikhira mungira saawe yakoonya. ²⁴ Weere mwoyo, na abamwekalikhira bateekwa okhumwekalikhira mu mwoyo nende mu masima.” ²⁵ Omukhasi kawoola ati, “Manyire nti Mesaaya” (olangiwa Kurisito) keecha. Ne nikeecha, kakhatuwoolere ebitu byoosi.” ²⁶ Manu Yesu kalangirira ati, “Ese olomaloma nawe yuli niise oyo.” Abeeki Bakowola Khu Yesu Khandi. ²⁷ Awene na’weene abeeki bakowola manu bawuka okhumuwukana nalomaloma no’mukhasi. Naye yiwuma owateeba ati, “Odakha siina?” Oba “Lwasiina olomaloma naye?” ²⁸ Manu, omukhasi kalekha awo ensoongo yaye, kakowolayo mu siko kawolera abatu ati, ²⁹ “Mwiiche, muwone omusaacha wumboleye ebiitu byoosi binakhakholakho. Ono anyala okhuba ninje Kurisito?” ³⁰ Batula erwanyi wesiko bachaaka olukeendo okhucha yaali. ³¹ Awene awo abeeki baye bamukhubbirisa baati, “Rabbi, lyakho esiitu.” ³² Naye kabawoolera ati, “Ndi nende eby’okhulya binyala okhulya bi’mutamanyire.” ³³ Manu abeeki baye bemonya abene nabeene baati, “Anyala okhubaawo omuleteeye ebyo’khulya?” ³⁴ Yesu kawoola ati, “Ebyo’khulya byange,” “Nje okhukhola esyo owa’ntuma sikantuma nokhumalirisa omulimo kwaye. ³⁵ Simuwoola muuti, ‘Yisisikaaye emyeesi chine khwole khu kessa?’ Mbawolera, mwikule emoni chenywe muwone endaalo! Cholire echo’khukessa. ³⁶ Nende wunanu okessa afuna omusaara kwaye, nende wunanu okessa akessa esirime olwo’wulamu wutawawo, kho omutaaki nende okesa basangaalire alala. ³⁷ Olukaado luwoola luuti, ‘Owundi ataaka no’wundi akessa’ lutuufu. ³⁸ Nabatuma okhukessa bimutakholera. Abandi bakhola omulimo okwamaani, nanywe mwafuna mu maani kaawe.” Abasamaliya Bangi Bafukiirira. ³⁹ Bangi khu ba Samaliya okhutula mu siko bamufukiriramo khulwo’wujjulisi wo’mukhasi, “Kamboolera ebiitu byoosi binali nakholakho.” ⁴⁰ Manu Abasamaliya nibeecha yaali, bamukhubbirisa amenye nabo, kamenya endaalo chibiri. ⁴¹ Manu khu lwe’mboosi chaye bangi beene baba abafukiirira. ⁴² Bawoolera omukhasi baati, “Sikhusifukiirira okhweema khu biwawoola; wunaanu khwe’wuliriye abene, manu khumanyire khuuti omusaacha ono masima nje omuwoniya we syalo.” Yesu Awoniya Omusyani Wo’mukhongo ⁴³ Endaalo chibiri echo nichabitawo kacha e Galiraaya. ⁴⁵ Nikoola mu Galiraaya, aba Galiraaya bamusangaalira. Bali bawene bikali nakholire mu’Yerusalemi khu muyumo kwa Pasaka, olwokhuba boosi baliyo. ⁴⁴ . (Wunaanu Yesu omwene kali kekesiise ati Nabbi syaba no’luyaali musyalo syaye syene). ⁴⁶ Ekhabi lindi kakeniya khandi mu Kaana esye Galiraaya, yikali nakalukhaniisiye amaachi okhuba efwinyo. Manu yaliwo omukhongo wo mwene’ngo owali nende omwana mulwaye mu Kaperunaumu. ⁴⁷ Omusaacha ono nikawulira mbo Yesu kali kolire mu Galiraaya okhutula mu Buyudaaya, keecha yali kamusaba ache awoniye omusyani waye, owali ambi okhufwa. ⁴⁸ Yesu kamuwoola ati,“Okhutusakho nga batu enywe nga muwene owuwonero we bya mayiya ne’biwukya,” “Simu’lifukiirira bbe.” ⁴⁹ Omukhongo wo mwene’ngo kawola ati, “Omwami, yikhirira omwana wange na’tafwa.” ⁵⁰ Yesu kakowolamo ati, “Onyala okhucha.Omusyani wawo anaabe mulamu.” Omusaacha kayira emboosi ya Yesu kawawo. ⁵¹ Nikali nasiiri khungira, abakhosi baye bamuwukanira namawulire baati omusyani waye kali mulamu. ⁵² Nikateberesa okhumanya ebikha omusyani waye bikaberamo wulayi, bamuwoolera baati, “Omusujja kwamuweyekho ekulo khu saawa yo’musanfu”. ⁵³ Manu simwana kasimanya ati sino nje esikha syene Yesu sikali namuwoleye ati, “Omusyani wawo anaabe mulamu.” Manu ye nende abomudaala lyaye bafukiirira. ⁵⁴ Sino nje esyali esyamayiya esyo’khubiri esya’khawonero Yesu sikakhola, nikakhatula e Buyudaaya okhucha e Galiraaya.