¹ Echuli chuli khu ludaalo lwa mberi olwejjuma, esiirema nisisiirikho, Malyamu Mangadalena kacha khu nηηani kakaana ekkina nibalitusiise khu mulyango kwe nηηani. ² Ne amala kerukha okhucha eyiri Simoni Petero nende omweeki wundi, Yesu yikadakhanga lukali, kawoola ati; “Omwami bamutusiise mu nηηani, khandi sikhumanyire yibamuteeye!” ³ Manu Petero nende omweeki wundibatulaniramo okhucha khu nηηani. ⁴ Bombi bacha niberukha, ne omweeki wundi kerukha kasookha Petero khu nηηani. ⁵ Kaguunama kawona enguwo cha liiri nichiri assi ne khaba sikengira mu nηηani. ⁶ Simoni Petero, owali naloondakho, nikoola kamala kengira mu nηηani. Kawona enguwo cha liiri nibachaalire awo, ⁷ nende enguwo yi’bamusiikhamo eyali khu mutwe kwa Yesu. Enguwo yali yefumbiremo eyene, okhutulakhu ya liiri. ⁸ Mukhumalirikha omweeki wundi, owali nasookhire okhwoola khu ηηani, yesi kamala kengira mukkati. Kawona kafukiirira. ⁹ (Okhwola khu sikha esyo bali basiiri okhutegeera okhutula mu byawandiikiwa baati Yesu kali wo’khusyuukha okhutula mu baffu.) Yesu Awonekhera Malyamu Mangadalena ¹⁰ Abeeki bamala bakowolayo mu mako kawe, ¹¹ musikha esyo, Malyamu kasikala erwanyi we’nηηani naalira. Na siirira, kaguunama kewunja mu nηηani ¹² ne awona ba Malaika babiri, munguwo ndafu, ni bekhaye awo omubiri kwa Yesu akwali, mulala emutwe ne owundi emakulu. ¹³ Bamuteeba baati, “Mukhasi ewe, lwasi olira?” kabakowolamo ati, “Bayirire omwami wange, khandi siimanyire yibamuteeye.” ¹⁴ Nga lukalomaloma atyo, kakalukhana ne awona Yesu nikemire awo, ne khaba sikamumanya. ¹⁵ Yesu kamuwoola ati, “Mukhasi ewe lwasiina olira? Okoonya naanu?” Nabasirisa ati ono kali mulindi wendalo, kamuwoola ati, “Mukhongo wange, noba no’mutusisewo, mboolere yumuteeye, ndache namuwukaana.” ¹⁶ Yesu kamuwoola ati, “Malyamu.” Kakalukhana kamwewunja, kamuwoola mu lwa'Aramayiki ati, “Rabboni!” (Amakhuluutu mbo Omusomesa.) ¹⁷ Yesu kawoola ati, “Otanediirakho khulwokhuba nsiiri okhukowola eyiri Bbaabba. Ne cha wakanane ba mwanaama obawolere oti, ‘Ndi okhukowolayo eyiri Bbaabba wange khandi senywe, Weere wange khandi Weere wenywe.”’ ¹⁸ Malyamu Mangadalena kacha eyiri Abeeki nende amawulire akawoola kaati: “Mbwene Omwami!” kabawolera nga lukali nawoleywe ebiitu binno. Yesu Awonekhera Abeeki Baye ¹⁹ Engoloobe y’oludaalo lwene olwo, olwamberi mujjuma abeeki bali alala, emiryango ni miikale olwokhutya Abayudaaya, Yesu keecha kaabemamo kawoola ati, “Emirembe chibe nanywe!” ²⁰ Nikamala okhuwoola sinno, kekesa amakhono kaye nende mu mbaffu. Abeeki basangaala olubitiriiye nibawona Omwami. ²¹ Khandi Yesu kakowolamo ati, “Emirembe chibe nanywe! Nga Bbaabba lukantumire, Ssesi mbatuma.” ²² Namalire okhubawoola bi no kabayererakho omuuya nawoola ati, “Mufune omwoyo mulafu. ²³ “Ni mulekherangamo omutu yeesi ebibi byaye, ebibi ebyo aba alekheywemo; Nimuba nimutabalekheeyemo, sibiba nibalekheywemo.” Yesu Awonekhera Tomasi ²⁴ Wunaanu Tomasi (Olangiwa Didumo), owali mulala khu ekhumi na babiri, khaba sikali nabo Yesu nikeecha. ²⁵ Abeeki bandi bamuwoolera baati, “Khuwene Omwami!” Ne kabakowolamo ati, “Okhutusakho nimbwene embala che’misumaali mu makhono kaye khandi naata olwala lwange mu misumaali achali, khandi naata omukhono kwange mulubaffu lyaye, khaba sinakhasifukiirira.” ²⁶ Ejjuma niyakhabitawo abeeki nibali mu nyumba khandi, nende Tomasi nali nabo. Nende enjikki chali chikaaywe, Yesu keecha kabemamo, kawoola ati, “Emirembe chibe mwinywe!” ²⁷ Ne kamala kawoola Tomasi ati, “Tta anno olwala lwawo; wona amakhono kange. Kolola omukhono kwawo wundiire mu mbaffu. Otakanakana khandi ofukiirire.” ²⁸ Tomasi kakowolamo ati, “Omwami wange khandi Weere wange!” ²⁹ Yesu kamukowolamo ati, “Ofukiirira olwokhumbona, ne bali nenkhabi abafukiirira nibatawene khandi bafukiirira.” ³⁰ Yesu kakhola owuwonero wa mayiya wungi mu moni cha beeki baye, ebitawandiikiwa mu sitawo sinno. ³¹ Ne binno byawandiikiwa kho'munyale okhufukiirira muuti, Yesu nje Kurisito, Omwana wa Weere, khandi nimufukiirira munyale okhuba no’wulamu mu liita lyaye. Yokana