¹ “Binno byoosi mbibawoleeye munyale owutakota. ² Bacha okhubasukuna erwanyi we nyumba ya Weere; amasima keene , ebikha bicha okhwoola siwukaanikhe mbo oyo yeesi obeeta alibaasa ati ali okhuwa Weere Sadaaka. ³ Beecha okhukhola ebiitu bifaana biityo khu lwokhuba sibamanyire Bbaabba oba esse. ⁴ Mbawoleye sinno, kho musimanye muuti ebikha nibyoola mulichulisa muuti nabalawula. Sinabawoolera sinno mukhuchaaka khuba nali nanywe. Omulimo Kwo’mwoyo Mwolerefu ⁵ “Wunaanu nja yali oyo owantuma, ni awumawo khwinywe owunteeba ati, ‘Ocha yenna?’ ⁶ Khu lwokhuba mboye ebiitu binno, mwichuye no’khwelalikhirira. ⁷ Ne mbawolera amasima: Sirayi yimuli nti mbwawo. Okhutusakho nga mbweyewo, omukeraki sikakheche yimuli; ne ninja, ndimutuma yimuli. ⁸ Nikeecha, alita khu syalo omusango okudiira khu sibi, n’owolerefu no’khukhengerwa: ⁹ Mungira ye sibi, olwokhuba abatu sibanfukiriramo; ¹⁰ Mungira yo’wolerefu, khuba nja eyiri Bbaabba, yimutanyala mwambona khandi; ¹¹ Khandi mungira yo khukhengerwa emisango, olwo’khuba omusyani wo’wene’ngo we syalo sinno wunaanu kakhengerwa. ¹² “Ndi nende bingi ebyo’khubawoolera, bimutanyala mwesimirisa. ¹³ Ne yee, omwoyo wa masima, naliicha, alibalagirira mu masima kosi koosi. Syalilomaloma khu lwaye; alilomaloma khwibyo byawulira byoηηene, khandi keecha okhubawoleranga wuli sinabenge sicha okhubawo. ¹⁴ Keecha okhuleeta oluyaali yindi nawukuye khubyange nakesakho bimanyikhe yimuli. ¹⁵ Ebyo byoosi ebya Bbaabba byange. Nje sikira nimboola nti Omwoyo aliwukula khu byange khandi alikhola bimanyikhe yimuli. ¹⁶ “Mubikha bitono simucha khumbona, awene awo mubikha bitono nimumbona khandi.” Ekhwe’wunamira khwa Abeeki Khulifuukha Esangaalo ¹⁷ Balala khu beeki baye bawoolanira ebene na’beene baati, “Siina sikekesa nawoola ati, ‘Mubikha bitono simucha okhumbona, ni abitawo ebikha bitono mwicha okhumbona khandi,’ ‘olwokhuba Ndi khucha eyiri Bbaabba?” ¹⁸ Bemeeda nibateeba baati, “Siina sikekesa nawoola ati, ‘Mubikha bitono’? Sikhutegeera byaba nawoola.” ¹⁹ Yesu kawona ati badakha okhumuteeba khu biitu binno, kho kabawoola ati, “Muli okhutebana abene na’beene sinekesa nimboola nti, ‘mubikha bitono simucha khumbona , khandi awene awo mubikha bitono mulimbona’? ²⁰ Mbawoolera amasima, mulye’wunamira khandi mulirira ne esyalo nasyo sisangaala. Mulye’wunamira, ne okhwewunamira khwenywe khulikalukhana khwaba esangaalo. ²¹ Omukhasi owiwula omwana ali nowuchuuni olwokhuba ebikha byaye nibyolire; ne omwana waye naba ni kewuywe kebirira ensasakisi khu lwesangaalo lyaye nti omwana aba kewuywe mu syalo. ²² Wunaanu nanywe mwesi: Ebikha byenywe byo'khwewunamira byolire, ne ndibawona khandi mwasangaala, khandi aliwumawo olibatusakho esangaalo lyenywe. ²³ Khu ludaalo olwo muliwuma esyo’nkhuteeba syoosi. Mbawoolera amasima, Bbaabba alibawa naawuli simuliba musabire mu liita lyange. ²⁴ Okhwola wunaanu mutaasaba esiitu syosi syoosi mu liita lyange. Musabe munawewe, khandi esangaalo lyenywe liriba lichuffu. ²⁵ “Nende mbeye no’malomeranga mu ngaado, ebikha biicha antalomalomerenge mu lulimi lwe’ngeri yinno ne ndabawoolerenge mu wukwalaafu ebidiira khu Bbaabba. ²⁶ Mu ludaalo olwo munaasabenge mu liita lyange. Sindi khuwoola ati ndaasabe Bbaabba khu lwenywe. ²⁷ Khaba, Bbaabba omwene abadakha olwokhuba mundakha khandi mwafukirira muuti natula eyiri Weere. ²⁸ Natula eyiri Bbaabba nengira mu syalo; wunaanu ndikhutula mu syalo khandi ngowolayo eyiri Bbaabba.” ²⁹ Awo abeeki ba Yesu bawoola baati, “Wunaanu oli khulomaloma bikhutegeera wulayi ni awuma okhubita mungaado. ³⁰ Wunaanu khunyala okhuwona khuuti omanyire wuli siitu khandi sisidakhisa mutu yeesi okhukhuteeba ebiteewo. Sinno sikira khwafukirira khuuti otula eyiri Weere.” ³¹ Yesu kabakowoolamo ati, “Mufukirira khunjakamo!” ³² “Ne ebikha biri okhwicha, khandi byolire, lumulisalanisiwa, wuli otula kaacha engo waye. Mulindekha senηηene. Ne khandi sindi senηηene, khuba Bbaabba ali nange. ³³ “Mbawoleye ebiitu binno, sibe nti mwise munyale okhuba ne mirembe. Mu syalo sinno mucha okhuba ne’bidinyu. Ne mube bagumu be myoyo! Esse namala okhuyiingira esyalo.”