¹ Wunaanu omusaacha yibalanga Lazaaro kali mulwaye. Kali atula e Betani, khulukoongo Malyamu nende Malisa mwanaηηina mu’bali bamenya. ² Malyamu ono, mbochoηηene Lazaaro ebikha ebyo nga mulwaye khusitanda, nje owali kachukha amafuta kakhawowo khu makulu ko’mwami nakasimuuye ne’fwiri lyaye. ³ Manu bambochoηηene bano bombi balakirisa emboosi eyiri Yesu baati, “Omwami, ola yoddakha mulwaye.” ⁴ Ne Yesu nikawulira binno kawoola ati, “Owulwaye wuno siwunamutuliremo okhufwa. Khaba, khulwenfuma ya Weere, omwana wa Weere afumisiwe okhubitira mu’wulwaye owo. ⁵ Yesu kadakha Malisa mwanaηηina Malyamu nende Lazaaro. ⁶ Namawulire ko’khulwala khwa Lazaaro nikamwolakho, kasikala yikali endaalo chindi chibiri. ⁷ Namala awoolera abeeki baye ati, “Khukowoleyo ewu Yudaaya.” ⁸ Ni bamuwoolera baati, “Rabbi,” “ Embaka ntono yakhabitawo a Bayudaaya nibakesisekho okhukhukhubba amakina, khandi nje yukowola?” ⁹ Yesu kabakowolamo ati, “Esaawa sichiri ekhumi na’chibiri eche’siddete? Omutu nakenda esideete sikekumula, khuba aba awona olwo’wulafu we syalo. ¹⁰ Ne omutu nakenda esiro nje lu kekumula olwo’khuwuma owulafu.” ¹¹ Nikamala okhubawolera bino, kemeeda okhubawolera ati, “Omwicha weffee Lazaaro akonire; ne njayo okhumusisimusa.” ¹² Abeeki baye bamukowolamo baati, “Omwami, naba nakona, keecha okhuba wulayi.” ¹³ Yesu kalingi alomaloma khu khufwa khwaye, ne abeeki baye babaasa baati alomaloma khu khukona endolo cha nawuli ludaalo. ¹⁴ Khu lwesyo kabawolera alafu ati, “Lazaaro afwiye, ¹⁵ ne khulwo wulayi wenywe, bidekire byaba biityo nintaasiyo, kho munyale okhufukirira. Ni khuche yali.” ¹⁶ Naye Tomasi (olangiwa Didimo) kawoolera abeeki basye ati, “Ffesi khuche, khufwire alala naye.” Yesu Akumya Malyamu Nende Malisa ¹⁷ Yesu nikoola, kawukaana Lazaaro namalire endaalo chine munηηani. ¹⁸ Bbesaniya syali ambi nende Yerusalemi mayiro echitoola chibiri, ¹⁹ na Bayudaaya bangi bali bechire eyiri Malisa nende Malyamu okhuba’kumya olwo khufwirwa mbocho yawe. ²⁰ Malisa nikawulira ati Yesu keecha, kacha okhumwakanira, naye Malyamu kadonηa ango. ²¹ Malisa kawolera Yesu ati, “Omwami,” “singa wali ano, mbocho yange sikakhafwiye. ²² Ne manyire nti nende wunaanu Weere anakhuwe syosi syo’namusabe.” ²³ Yesu kamuwolera ati, “Mbochowo anasiingire khandi.” ²⁴ Malisa naye kamukowolamo ati, “Manyire keecha okhusiingira khu ludaalo lwo’khusyukhirirakho lula olwenjakamo.” ²⁵ Yesu kamuwoola ati, “Nise okhusyukhira khandi no’wulamu. Oyo offukiririra mwise keecha okhuba mulamu nende nafwa; ²⁶ Omulamu omufukiriramo sya’lifwa endaalo nendaalo, mufukirira bino?” ²⁷ Malisa kamukowolamo ati, “Eh, Omwami, nfukiirira niwe Yesu, omwana wa Weere, owali wo’khwicha mu syalo.” ²⁸ Nikamala okhulomaloma chino, kakowolayo kalanga mwanawaηηina Malyamu khuntulo kawoola ati, “Omusomesa nguno ali ano,” ne khandi ali okhuteeba yoli.” ²⁹ Malyamu nikawulira bino, kasiingiraniramo kaacha yali. ³⁰ Awo, Yesu kali atola mu lukongo, kali asiri mu sifo Malisa yikamuwukaana. ³¹ Aba’Yudaya abali nende Malyamu mu nyumba, nibamusasira, nibawona nasiingira mangu mangu natula erwanyi, bamuloonda, ni babasa mbo acha okhulirira khu ηηani. ³² Naye Malyamu nikola Yesu yaali namala amuwona, kakwa mu makulu kaye nawoola ati, “Omwami, nandi wali ano, mbocho yange sikakhafwiye.” ³³ Yesu nikawona okhulira khwa Malyamu, na ba'Yudaaya bali bamulondakho bosi nibalira, keecha kachunisiwa lukali mu mwoyo nesibeera singi. ³⁴ Yesu kateeba ati, “Yena yimumukonisye?” Bamukowoolamo baati, “Yicha owone Omwami”. ³⁵ Yesu kalira. ³⁶ Aba’Yudaaya bawoola baati, “wona nga lwabeye amudakha!” ³⁷ Na’bandi nabo bawoola baati, “Ono owekula omuwofwu wemoni sikakhamulobeye okhufwa?” Yesu Asingisa Lazaaro Mu bafu. ³⁸ Yesu, nasiri mu sibeera singi, kasuda khusirindwa. Syali ηηungu nekina amulyango. ³⁹ Kabawoola ati, “Mutuseyo ekina,” Malisa mbochoηene muffu kamu’kowoolamo ati, “Ne omwami, esifundu sicha okhuba singi, khuba amalire muηηani endaalo chiine.” ⁴⁰ Yesu naye kawoola ati, “Sinabawoolera nti nimufukirira, mwakhawone enfuma ya Weere?” ⁴¹ Awenawo batusayo ekina, manu Yesu kewunja amukulu nawoola ati, “Bbabba nkhwebasa olwokhumbulira. ⁴² Namanya niwumbulira wuli lunsaba, ni mboye sino khulwo wulayi wa batu bemire ano, banyale okhufukirira ni wantuma.” ⁴³ Nikamala okhuwoola emboosi chino, Yesu kamala kalanga mukkono khongo ati, “Lazaaro, ttula erwanyi!” ⁴⁴ Omusaacha muffu katula erwanyi, amakhono na’makulu nimawowe no’tukoye nenguwo muweni. Yesu kabawoola ati, “mu mutusemo enguwo chesirindwa mumulekhe awewo.” Olukhwe Lwo’khwita Yesu ⁴⁵ Manu Abayudaaya bangi abali nibechire okhusasira Malyamu, khandi bawona Yesu byakholire, bata enfukirira yawe khu ye. ⁴⁶ Ne abandi bacha eyiri Abafalisaayo babawolera ebitu Yesu bikali akholire. ⁴⁷ Manu bakhawona bakhuluutu naba Abafalisaayo balanga olukhikho. Batebana baati, “Sinna sikhuba khukhole? Mbano omusaacha akhola ebya mangalima bingi. ⁴⁸ Nikhulekha kachanakana ati, wuli mutu anamufukiriremo, nabo aba Rooma baneche bayira esifwo alala ne’syalo syefwe.” ⁴⁹ Awo mulala khubo, yibalanga Kayafwa, owali nakhola nga’ khawona mukhuluutu omwaka okwo, kabawoolera ati, “Awuma si mu manyire ata sirala! ⁵⁰ Simusiwona muuti sirayi yimuli omutu mulala afwa khu lwabatu okhukhira esyalo syoosi okhumaliwawo.” ⁵¹ Sikawoola sino khulwaye, ne nga khawona mukhuluutu omwaka okwo, kalakula ati Yesu acha okhufwirira olwe syalo sya Bayudaaya, ⁵² khandi sikhulwe’syalo sino syo’ηηene naye khulwabaana ba Weere basalaana, okhubaleeta alala bekholemo mulala. ⁵³ Okhutula khulwo nokhucha emutwe bachaaka okhukonyeresa engira yo’khutusawo owulamu waye. ⁵⁴ Nolwesyo Yesu kakama okhukenda mu lwichuye okhukhiririsa mu Bayudaaya. Okhumalakho kabatulamo kasuda mu sifo ambi ne’sibarara, mu lukoongo lulangiwa Efurayimu, yikaba nabeeki baye. ⁵⁵ Ebikha nibyali ambi ne’ndaalo chokhubitakho, echa Bayudaaya, bangi batula mu byalo baacha e Yerusalemi khu mikholo cho’khwelabya, Pasaka niyitola. ⁵⁶ Bachanakana okhukonya Yesu, ninga lubali bemire ambi ne nyumba ya Weere, batebana abene nabeene baati, “Mubasa mutye? Syaneeche khu muyumo ata wutono?” ⁵⁷ Ne’ khawona mukhuluutu nabafalisaayo bali baweye ebiragiro baati niyabawo omutu onyala kamanya Yesu ali, abekesa banyala okhumudiira.