¹ “Mbawolera amasima, omutu otengirira mumulyango kwesidwoli, naninira awuleka, mwibi khandi munyaka.” ² Noyo owingirira musiriwa nje omwayi wa’makoondi kaye. ³ Omuliindi we’siriwa amwikulirawo, na’makoondi kamuwulira ekono lyaye. Alanga amakoondi wuli litula erita lyalyo kakatangiramo nakatusa erwanyi. ⁴ Nakatusa kosi koosi akaye natangiramo kamulondakho khulwokhuba kamanyire ekkono lyaye. ⁵ Ne amakoondi sikanyala okhulonda omutende, muwutuufu, kamwirukha khuba sikamanyire ekkono lyaye.” ⁶ Yesu kakhosesa esifananyi sino munomaloma, ne sibamala bamanya syawoola. ⁷ Nolwesyo Yesu kakowolamo khandi ati, “Mbawolera amasima, nise omulyango kwa’makoondi. ⁸ Abo boosi abantangirira okhwicha bali bebi khandi abanyaka, ni amakoondi sikabatekeresa. ⁹ Nise omulyango; oyo owunyingiriramo aliwonesewa. Alingira khandi kaatula, khandi kakaana olwayiro. ¹⁰ Omwibi keecha wusa okhwiba khwonηηene no’khwita, no’khunyasa; Nichire banyale okhuba no’wulamu, khandi mu’wichufu. ¹¹ “Nise omwayi mulayi. Omwayi mulayi awayo owulamu waye olwa’makoondi. ¹² Omwayi wo’musaara syaba mwene makoondi. Sakira nawona ennani niriicha, kerukha kalekhawo amakoondi. Awo ennani niringira mu’makoondi likasalaniya. ¹³ Oyo musaacha kerukha olwokhuba aba mutu wo’musaara okhukhira okhufwa khu makoondi. ¹⁴ “Nise omwayi mulayi; manyire amakoondi kange kosi kaamanyire __ ¹⁵ Nga Bbabba lukaamanyire nga ntyo seesi nje lu mumanyire__ khandi mbayo owulamu wange olwa makoondi. ¹⁶ Ndi na’makoondi kandi akatali ke’sidwoli sino. Nkhoyire kosi ngaleete. Kosi kamanye ekkono lyange, kafukhe kesidwoli sirala no’mwayi mulala. ¹⁷ Esikira Bbabba nikandakha nje olwokhuba mbayo owulamu wange __ syoηene okhuwekowosera khandi. ¹⁸ Awumawo owuntusakho, ne samwene mbwe’tusakho, khandi naba no’wunyala wo’khu wekowosera. Esilagiro sino nasifuna okhutula khu Bbabba.” ¹⁹ Khu lwe’mboosi chino, Abayudaaya khandi beecha bakawukhanamo. ²⁰ Bangi khubo bawoola baati, “Omusambwa kumuninire khandi akwiyekho eralu. Lwaasi khu mutekeresa?” ²¹ Ne abandi bawoola baati, “Chino simboosi cho’mutu olikho omusambwa. Omusambwa kunyala kwawoniya omuwofwu?” Owutafukirira Wa Bayudaaya. ²² Syola esikha syo’muyumo kwo’khulabya e’Yerusalemu. Byali bikha byetoocho, ²³ Yesu kali akenda mu nyumba ya Weere mu sisenge sya Sulemaani. ²⁴ Abayudaaya beecha ba’mwewodokhaniya, nibawoola baati, “Onatugumaase okhwoola liina? Noba niwe Kurisito, twekese alafu.” ²⁵ Yesu kabakowoolamo ati, “Nabawoolera, ne simufukirira. Ebya mayiya binkhola mu liita lya Bbabba binomalomera, ²⁶ naye simufukirira khuba simuli makoondi kange. ²⁷ Amakoondi kange kawulira ekkono lyange; ngamanyire, khandi kanoonda. ²⁸ Ngawa owulamu wutawawo, khandi sikalikota endaalo choosi; manu awumawo olinyala kakansikhulakho mu mukhono kwange. ²⁹ Bbabba, owakaamba, abakhira boosi; awuma yeesi onyala kakasikhula mu mukhono kwa Bbaaba. ³⁰ Ese nende Bbabba khuli sirala.” ³¹ Khandi aba Yudaaya bawukula amakina nibadakha okhumukhubba, ³² naye Yesu kabawoola ati, “Mbekesise ebya magero bikhongo bingi okhutula eyiri Bbabba. Khu bino byoosi syamagero si esikira nimudakha onkhukhubba amakina?” ³³ Aba Yudaaya bakowolamo baati, “Sikhukhubba makina khulwebyo, naye khu lwo khufwotokheresa, Khulwokhuba ewe,omutu wutu, welanga okhuba Weere.” ³⁴ Yesu kabakowolamo ati, “Sisyawandiikiwa mu malako kenywe, ‘simulomalomanga muuti muli ba weere? ³⁵ Nikabalanga “ba Weere,’ emboosi ya Weere yiyatula__ ne emboosi yawandiikiwa yitanyala yakhalakiwa __ ³⁶ Sibasitye eyiri oyo Weere (Bbabba) yikatekekha khulwaye kamutuma mu syalo? Lwasi munjolobya muuti neranga Weere khulwokhuba nawoola nti, ‘Ndi mwana wa Weere?’ ³⁷ Mutafukirira bimbola okhutusakho nga nkholire Bbabba byakhola. ³⁸ Ne’ ninsikhola, nende mukaana okhunfukiriramo, mufukirire ebya magero, bimumanyire khandi bimutegeera muuti Bbabba kandimo, ni Ssesi mulimo.” ³⁹ Khandi bakesakho okhumudiira, ni kabeyibakho. ⁴⁰ Awo Yesu kakowolayo khulukerekha lwa Yoludani mu sifwo Yokana yikali abatisiranga mundaalo echatangira. Kabayo ⁴¹ khandi abatu bangi beechanga ali. Nibawoola baati, “Nende Yokana sikakhola akhawonero khoosi akhamayiya, byoosi Yokana bikawoola khu musaacha ono byosi bituufu.” ⁴² Ne khandi mu sifwo sino bangi bafukirira mu Yesu.