¹ Endaalo chidatu Fesito nikolire mu syalo sinno, Fesito kaniina emukulu natula Kayisariya naacha e Yerusalemi, ² eyatula omukhuluutu wa bakhawona nabatangirisi aba'Yudaaya lubeecha mumoni cha Fesito bataawo emboosi echokhuwabira Paulo. ³ Mukhubirikisya muwangu basaba Fesito, mukhudakha abakwire, Paulo akalukhanisiwe ayiriwe e Yerusalemi, khulwokhuba bali batekekha okhumwerinda khungira bamwitte. ⁴ Fesito kabakowolamu ati, “Paulo kawoyeerwa e Kayisariya, ne khandi samwene ndi okhuchayo mundaalo cha ambi. ⁵ Mulekhe balala khubatangirisi benywe beeche khuchane bomiise bibafambya omusaacha oyo naba nende syakholire esibi.” ⁶ Namalire endaalo munaana oba ekhumi nabo, kamala kawawo kekhirira e Kayisariya, khandi oludaalo lulondakho kekhasa olukhikho kalagira baleete Paulo mumoni chaye. ⁷ Nibaleetire Paulo, Abayudaaya abali nibatulire e Yerusalemi bamwewodokhaniya, bamuyingakho emisango chibatanyala okhukhakhasa. ⁸ Awenawo Paulo kewosakho ati: “Awumawo sinkholire esibi esiddira khumalako ka baYudaaya oba akomu nyumba ya Weere oba eyiri Kayisali.” ⁹ Ne Fesito, olwokhudakha akwire Aba'Yudaaya, kawolera Paulo ati, “Ofukirira okhucha e Yerusalemi owosesewe mumoni change eyo khu bibakhuwabira binno?” ¹⁰ Ne Paulo kakowolamo ati: “Wunaanu wuno ndi mumoni cha Kayisali, yinkhoyire khengerwe. Awuma syosi syoosi sinsobisye khu Ba'Yudaaya, nga lusimanyire wulayi wamwene. ¹¹ Nisiba siiti aliwo sinsobisye esikhoyerwa nkhengerwe okhufwa, singaana khufwa. Naye nisiba siiti aliiwo emisango chinteywekho na baYudaaya bano nichiba nichitalimo, awuma oli no’wunyala okhumbayo yibali. Njulira eyiri Kayisali!” ¹² Fesito namalire okhufukirisaniya no’lukhikho lwaye, kakhengawo ati, “Omalire wajjulira Kayisali. Wunaanu onache eyiri Kayisali!” Fesito Keteeba Khu Mwene’ngo Aguripa. ¹³ Endaalo ntono nichibitirewo omwene’ngo Aguripa nende Bberinike boola e Kayisariya okhuyeresa Fesito oluyaali. ¹⁴ Nga lubali nibacha okhumalayo endaalo nyingi, Fesito kalomaloma khu mboosi cha Paulo no’mwene’ngo. Kawoola ati: “Aliwo amusaacha anno Felikisi yikalekha ngo’muwowe.” ¹⁵ Ninacha e Yerusalemi, bakhawona bakhuluutu nabakhuluutu ba Bayudaaya bamutakho emisango khandi basaba akhengerwe. ¹⁶ “Nabawoolera ati sisiri mu nsambo cha ba Rooma okhuwaayo omutu nateema mumoni cha’bamuwabira ne khandi bamuwa enkhabi okhwewosakho omwene okhwema khu bibamuwabiye. ¹⁷ Nibeecha anno nange, sinakhindya musango, nekhasa olukhikho oludaalo lulondakho, nalagira baleeta omusaacha mu lukhikho. ¹⁸ Naba muwabira nibasiingira okhulomaloma, sibamutakho emisango chinali nimbasirisa. ¹⁹ Okhumalakho, balikho notuwosiwosi tubamufambya otukudaniya nga tudiira khu ddini yawe nende khu musaacha wafwa yibalanga Yesu oyo Paulo yikali nalomalomakho ati mulamu. ²⁰ Sinamanya ngeri yokhutebereseramo emboosi echo; namuteeba nanyala okhufukiirira okhucha e Yerusalemi nje yaba awoseserwe emisango chino. ²¹ Ne Paulo nikajulira okhuwosesewa khube muwunyala wukhirawo, nalagira bakhole nibamwikalira okhwola lunakhanyalire okhumuyira eyiri Kayisali.” ²² Awo Aguripa kawolera Fesito ati, “Ndakha okhumwewulirirakho omwene khu byo’musaacha onno.” Kamukowolamo ati, “Muchuli onamuwulire.” Paulo mumoni cha Aguripa. ²³ Oludaalo lwalondakho Aguripa nende Bberiniike beecha no’luyaali lukali manu bengira abatekereesi mubekhala nabatangirisi be sikko sikhuluutu. Okhwema khu silagiro sya Fesito, Paulo kaletewa mubali. ²⁴ Fesito kawoola ati, “Omwene’ngo Aguripa, nende abali munno nafwe, muwona omusaacha anno! Abatu boosi abekhala e Wuyudaaya bawabiye omusaacha ono yindi mu Yerusalemi nende ano mu Silisiya, ni bakhubba olukhero baati syakhoyire khuba mulamu ata. ²⁵ Nakaana nti awumakho nesisobyo syosi syoosi esikira abe nga keteewa, ne khulwokhuba ajjuliye eyiri omutuki mukhuluutu nakhengawo okhumusindikha e Rooma. ²⁶ Ne mbuma esilungifu syoosi sinyala okhumuwandikakho. Nolwesyo muleetire mweesi yimuli, okhukhirira elala eyiri ewe owo’luyaali Omwene’ngo Aguripa, nisinyalikha nikhumalire okhumuteberesakho khunyale okhumuwandiikakho. ²⁷ Khuba esse mbaasa si’siba syamakesi okhumuta muwikalire nintakaana omusango kwo’khumutakho.”