¹ Paulo kecha kakhadaasa abakhongo bolukhikho emoni kawoola ati, “Baana befwe, noseresise omulimo kwange eyiri Weere mu khutegeera khwange khulayi okhwola olwaleero.” ² Khu sinno omulamusi mukhuluutu Ananiya kalagira abali bemire ambi nende Paulo okhumupaama omunwa. ³ Awo Paulo kamuwoola ati, “Weere alikhukhubba, ewe esidda sibabakha erangi erafu! Wikhala awo okhunkhengera, ngo’bitira mulako, khandi omwene wessi okhalaka amalako no’lagira oti nkhubwe!” ⁴ Abo abali nibemire ambi nende Paulo bawoola baati, “Okenda otye wanyeka omusabisa wa Weere mukhuluutu?” ⁵ Paulo kabakowolamo ati, “Baana befwe, simbeye nintegeye nti nje omusabisa mukhuluutu; ne syawandiikiwa siiti: ‘Otalomalomanga sibi khu mutuki wa batu bawo.’” ⁶ Naye Paulo, namanyire ati abandi khubo bali ba’Sadukaayo na’bandi bali ba’Falisaayo, nga balange mu lukhikho kawoola ati, “Baana befwe, ndi Mufalisaayo, omusyani wo’mu’Falisaayo. Nemire mu khuwosesewa olwokhuba nfukiirira mu khusyukhira khwa bafu.” ⁷ Nikawoola sinno, okhuyiingana khwakwawo akaati wa ba'Falisaayo na Basadukaayo, nolukhikho lwakawukhanamo. ⁸ (Abasadukaayo bawoola baati awuma okhusyukhira, khandi awuma ba’Malayika oba Emyoyo, naye Abafaalisaayo bafukiirira byoosi.) ⁹ Abawo okhukuudana okhukhongo, khandi nabasomesa bandi abamalako obolulyo lwa Bafalisaayo boosi basiingira bayingana namaani baati, “Yiwuma siitu sibi syoosi sikhuwona khu musaacha onno.” “Nisiba mbo omwoyo oba malayika amulomalomeyemo?” ¹⁰ Okhuyiingana no’khukuudana khwemeeda lukali syoola omukhuluutu weeye katya ati Paulo banyala bamutandulamo otutundutundu. Kalagira abasirikale bekhe assi bamutuse khubatu namaani khandi bamuyire mubarakisi. ¹¹ Esiro sirondakho Omwami keema ambi nende Paulo kawoola ati, “Wekuumye! Nga lwoweeye owujjulisi khwise mu Yerusalemi, sakira otekwa osikhole otyo nende e Rooma.” Olukhwe Lwo Khwiita Paulo ¹² Echuli yilondakho Abayudaaya bekhoba khandi bekholamo esitole nga belayira okhutalya oba okhutaηηwa okhwola nga bettire Paulo. ¹³ Abatu abakhira amakhumi kanne nje abali mulukhwe lunno. ¹⁴ Bacha eyiri omukhuluutu wa bakhawona nende eyiri abakhuluutu bawoola baati, “Khumalire okhwelayira owutalya siitu syosi syoosi okhumalakho nga khwittire Paulo. ¹⁵ Wunaanu olwo, ewe nakhakhiikho nimusaba omukhuluutu wa basirikale okhumukowosa mumoni chenywe nga simuchiririra nje okhukonyeresa owujjulisi wamawulire matuufu khuye. Efwe khuli betekefu okhumwitta natola anno.” ¹⁶ Naye omwana musyani w’omukhana waawe Paulo nikawulira ebyo’lukhwe, kacha mubbarakisi kawoolera Paulo. ¹⁷ Paulo awenawo kalanga mulala khubakhongo kamuwoolera ati, “Yira omusyani muwere onno eyiri omukhongo weeye; omuwolere oti, ‘ali nende syadakha okhumwekesa.” ¹⁸ Kamuyiira eyiri omokhongo weeye. Omukhongo weeye lye’mya kamuwoola ati, “Paulo, omuwoye, kantumiye omusyani kamala kansaba ndeete omusyani onno yoli olwokhuba ali nende syadakha okhukhwekesa.” ¹⁹ Omukhongo weeye kadiira omusyani khumukhono, kamukowosa mulubaffu kamuteeba ati, “Siina syodakha okhumboolera?” ²⁰ Kamukowoolamo ati: “Abayudaaya bafukirisanisye okhwicha bakhusabe Paulo aletewe mu lukhikho muchuli nga bekadiya baati badakha amawulire akamudirikho akakhira ako kawawulira. ²¹ Otafukiirira ebyawe, olwokhuba abatu abakhira amakhumi kanne bamukonereye khungira munyaasi. Bamalire okhulayira owutalya oba okhunywa okhwola nga bamwittire. Betekefu wunanu, balindire owunyala wawo okhufukiirira okhusaba khwawe.” ²² Omukhongo weeye kasewula omusyani khandi kamulawula ati, “Otawoolerakho omutu yeesi oti wichire wambolera binno.” Paulo Achusiwa Okhucha E’kayisariya ²³ Manu kamala nalanga abasirikale babiri nabalagira ati, muwukule omukanda kwa basirikale emya chibiri, nsafu nga bo’khufarasi nende abandi emya chibiri abali namafumo bache a Kayisariya mu saawa chidatu esiro syolwo. ²⁴ Mutekekhere Paulo ensukhiri chanachirekho ewa Gafana Felikisi mumirembe awatali sibi okhumwolakho. ²⁵ Kawandiika ebaruwa eyisoma yiiti; ²⁶ Kilaudyasi Lisia, Eyiri owo luyaali lukhongo, Gafana Felikisi: Nkhukhesakho. ²⁷ Omusaacha on o kadiiriwa na Bayudaaya khandi bali ambi okhumwiita, ne neecha nabasirikale bange namuwoniya, neecha nasimanya nti mwiwulanwa wa Rooma. ²⁸ Nadakha nsimanye sibamufunana, sakira namuleeta mu lukhikho lwawe. ²⁹ Neecha nasimanya mbo sibamufunana syali sidirana na’malako kaawe, ne kali awuma omusango kwosi kwafunaniwa bamukhengere okwo’khufwa oba okhuwoyewa. ³⁰ Ninekesewa olukhwe lubali batekekhire khu musaacha onno, namusindikha yooli muwangu. Nongera okhulagira abamufunana bekese ensonga chawe yooli. ³¹ Manu abasirikale, nga’boseresa ebilagiro, bayira Paulo musiro khandi bamwosera erala mu Antipatuli. ³² Niwakhya balekha abakhubbi bensukhiri bayerekesa Paulo nabo bakowola ewawe mu bbarakisi. ³³ Abayerekesi niboola e Kayisariya, baweresayo ebaruwa eyiri Gafana bawayo nende Paulo. ³⁴ Gafana kasoma ebaruwa kateeba esitundu sye’syalo sikali atulamo. Nikamanya ati atula mu Silisiya, ³⁵ kawoola ati, “Niicha okhuwulira omusango kwawo abakhufunana nibolire anno.” Awo nalagira ati Paulo alindiwe nabasirikale mudookho lya Kerode. EBIKHOLWA