¹ Abatu bandi batula ewu’Yudaaya baacha Antiyokiya ni bali basomesa aboluganda baati: “Okhutusakho nga wakhebewa, okhwema khu’nsaambo Musa nga lukasomesa, sunyala khuwonesewa.’’ ² Sinno syaleetawo okhuyingana no’khukawukhana khukhongo mumbaasa akkati wa BBbalunabba nende Paulo na’basaacha batula Antiyokiya. Manu syaleeta Paulo nende Bbalunabba badoleewa, nabafukiirira bandi, bache e Yerusalemi okhuwona abatume nabakoffu olwembakha yinno. ³ Ekkanisa yabatuma nibacha, khandi nga bakendire babitta Fewonisiya nende e Samalia, babawolera nga abateende bali bakalukhanire. Kano mawuliire kasangaasa aboluganda. ⁴ Niboola e Yerusalemi, basangaalirwa mukkanisa nabatume nabakoffu, baboosera amawuliire ka byoosi Weere kakali abakholeyemo. ⁵ Ne abafukiirira bandi abomukanda kwa ba'Falisaayo basingira bawoola baati, “Abeteende batekwa okhukhebewa khandi bakhoyire bachire khumaloko ka Musa.” ⁶ Abatume na’bakoffu bekhala okhwewunja mu mboosi echo. ⁷ Nibamalire okhunyonyola lukali, Petero kasiingira kabawoola ati: “Baana befwe, musimanyire muuti mubikha bibitirekho Weere kakhengawo ati Abateende bosi banyale okhuwulira owubakha waye bamala bafukiirira okhubitira mumunwa kwange. ⁸ Weere, omanyire omwoyo, kekeesa mbo kabafukirira olwokhubawa kabawa omwoyo mwolerefu, nga fwesi lukatuwa efwe. ⁹ Sikakawukhaniyamo effwe nabo, kalabya emyoyo chawe ngasibisya munfukirira. ¹⁰ Ne Wunaanu, lwasina mukhema Weere nimuta khumakosi ka beeki ejjogi eyitali yefwe ata eya bakuuka yefwe yibali nibatanyala besimirisa? ¹¹ Khaba! Khufukiirira okhubita musissa syo’Mwami wefwe Yesu nti khwawonesewa, bosi nga lubali.” ¹² Olukhunηηana lwoosi lwa’wulera nga lubatekeresa Bbalunabba nende Paulo nibabawoolera ebyo’wuwonero wamayiya ne’byokhuwukiya Weere bikali akholire mu bateende nga wubabitiramo. ¹³ Nibamala, Yakobo kalomalomera amukulu ati: “Baana befwe, muntekerese. ¹⁴ Simoni atunyonyoye nga Weere mukhusokha katwekesa okhufwayo khwaye nga’wukula mubateende abo abatu bakekowoseye. ¹⁵ Emboosi cha ba nabbi chifukirisaniya na sinno, nga lusyawandiikiwa siiti: ¹⁶ “’Nimalire binno niicha okhukowola nombakhe ewema ya Daudi yakwa. “Ebyanyasikha ndibyombakha, Khandi ndibikowosawo, ¹⁷ khu batu badoηηirewo banyale okhukonya Omwami, khandi abateende baliba niriita lyange, omwami nje olomaloma, okhola ebitu binno’ ¹⁸ ebibeye nibimanyikhanire emyaka chemukoongo. ¹⁹ “Khukhengawo khwange, no’lwesyo, khutasikhola syaba sidinyu eyiri abateende abali okhukalukhanira Weere. ²⁰ Okhumalakho khubawandiikire, nikhubawolera okhutalya ebyo’khulya ebinyasiwe nebilongalongwe, nga bitula mu wuddamba, enyama chebisolo bimikirwe nende mu mabanga. ²¹ Khuba Musa bamuwuuliyekho mu wuli siko okhutula mu bikha byemukongo babisomanga mu sinaggogi khu wuli lwa Ssabbiiti.” Ebbaruwa Yolukhikho Eyiri Abateende ABafukiirira. ²² Manu abatume nabakoffu, ne Kkanisa yoosi, bakhengawo okhudoolamo abatu bawe begaate khu Paulo nende Bbalunabba bache Antiyokiya. Badoola Yuda (Olangiwa Bbarisaba) nende Siira, abasaacha babiri abali batangiirisi mu boluganda. ²³ Ninabo batuma ebaruwa Yinno: Abatume nabakoffu, abasyeenywe, Eyiri Abatende Bafukiirira Mu Antiyokiya, Siriya nende Kirukiya Amakheeso. ²⁴ Khwawulira khuuti abasyefwe bandi batutulakho ataasi efwe okhubafukirira khandi khwabakhedya, khwatawula ebibaaso byenywe okhwema khubibalomaloma. ²⁵ Fwesi fweesi khufukirisanisye okhudoola khubatu bandi khwabatuma yimuli nabeecha befwe abadakhwa Bbalunabba nende Paulo __ ²⁶ abasaacha abewaayo owulamu wawe khu lwerita lyo’mwami Yesu Kurisito. ²⁷ Nolwesyo khuli khubatumira Yuda nende Siira okhukhakhasa ne’mboosi yo’munwa bikhubawandiikira. ²⁸ Syawonekha okhuba sirayi eyiri Omwoyo Omwolerefu nende yikhuli okhutabasidowera mu wuli siitu syoosi okhubitira khubyetaggo binno: ²⁹ Mukhoyiire mutadiira khu byo’khulya ebiwereseweyo e'byemisambwa, amabaanga nenyama yebisolo bimikirwe nende owudamba. Munyale okhukhola wulayi nimulekhire binno bitu. Mweraba ³⁰ Abasaacha batumiwa beecha bekha baacha Antiyokiya, yiboola bawuusa ekkanisa alala bamala babawa ebbaruwa yibayirire. ³¹ Abatu bayisoma basangaala olwemboosi yo’khubakumiya. ³² Yuda nende Siira, abali khandi ba nabbi, bawoola bingi okhukumiya nokhwomisa abasyaawe. ³³ Nibamalirekho embaka nibaliyo, basewulwa nenkhabi ye mirembe okhukowoolayo eyiri ababatuma. ³⁵ Naye Paulo nende Bbalunabba badoηηa mu Antiyokiya, yibasomesa khandi bangi no khuwuuliira emboosi yo’Mwami. Owutafukirisaniya Akkati Wa Paulo Nende Bbalunabba ³⁶ Olunyuma lwendaalo ntono Paulo kawoola Bbalunabba ati, “Khukowooleyo emukoongo khukeniye abasyefwe mu bikko byoosi yikhwawuulirakho emboosi yo’Mwami khuwone nga lubachanakana.” ³⁷ Bbalunabba kadakha ayire Yokana, yesi yibalanga Maako, ache nabo, ³⁸ naye Paulo sikasibaasamo okhuba esya makesi okhumuyira, okhuba ye kali abekawuyekho nibali Panfuliya khandi sikali nachanakanire nabo mumirimo. ³⁹ Bali netafukirisaniya eyamaani akkati wawe eyatulamo balekhana. Bbalunabba kayira Maako bachira e Kupulo mu lyato, ⁴⁰ ne Paulo kadoola Siira bawawo, abasyaawe basemba babasewula khu Sissa syo’Mwami. ⁴¹ Kabita mu Busuli nende mu Kurukiya, nata mu makkanisa amaani. EBIKHOLWA