¹ Mukanisa ya Antiyokiya baliyo aba’nabbi nabasomesa: , Simoni yibalanga Niga, Lukiyo owa Ssairene, Manayeni (Owali nikakhusiwa nende Kerode owali Gafana) nende Saulo. ² Nibali basiisaba Omwami khandi ngabasiiba, Omwoyo Omwolerefu kalomaloma ati, “Mungawulirekho nende Saulo khulwomulimo kunabalangira.” ³ Nibamalire okhusiiba no’khusaba, babatakho amakhono kawe, babatuma bache. Mu Kupulo ⁴ Babiri khubo, nga lubatumiwa n'Omwoyo mulafu, bekha baacha e Selusiya bamala bambukha mu lyato boola e Kupulo. ⁵ Niboola e Salamisi, bawunusa emboosi ya Weere mu sinaggogi cha Bayudaaya. Yokana kali nabo ngo’muyeedi waawe. ⁶ Bakenda khusisinga syosi syoosi paka luboola e Pafoosi. Eyo baakanayo omulakusi O'Muyudaaya ni khandi nga mu nabbi wo’wubacha yibalanga baati Balisa Yesu, ⁷ Kali mwicha wa Gafana we sisinga esyo, yibali balanga Sarugiya Paulo, omusaacha omukesikesi, nga'tumirwe eyiri nende Saulo, olwokhuba kali adakhire okhuwulira emboosi ya Weere. ⁸ Naye Elima omulakusi (eryo nje eriita lyaye siryekesa) kabayinganiya nga kesakho okhukalukhaniya enfukiirira ya Gafana. ⁹ Naye Saulo, yibalikhandi nibalanga Paulo, nga kechusiwire no’Mwoyo Omwolerefu, kewunja nikekhalirisa Elimasi khandi kamuwoola ati, ¹⁰ “Oli mwana wa setani omulabe wa wuli situla esilungifu! Wechula owubacha wa wuli ngeri no’tukodyo tubi, olyola ye mukhukodya engira engololofu echo Mwami? ¹¹ Wunaanu omukhono kwo’Mwami kukhwikhirakho. Ocha okhuba omuwofwu, otawona owulafu we’ryuba olwesikha. Awo nawo, enanηoηo ne’sirema byamudiira, kachaaka okhudamadama, nakonyeresa onamudiire khumukhono amuwerekese. ¹² Gafana nikawona ebyekholekhire, kafukiirirawo, syamukhubba enηaηa khunsomesa yaliwo khu Mwami. Mu Pisidiya Antiyokiya. ¹³ khutula Pafwosi, Paulo nabasye bachiira khu lyato okhwola Periga mu Panfuliya, Yokana akabalekhera nakowoola e Yerusalemi. ¹⁴ Okhutula Periga bacha Pisidiya Antiyokiya. Khulwesabiiti bengira mu sinaggogi bamala bekhala assi. ¹⁵ Nibamala okhusoma okhutusa mu malako nende ba nabbi, abemeresi bo’musinaggogi batuma emboosi yibali nibawoola baati, “Baana befwe, ni muba nimulikho no’wubakha wo’khukumiya eyiri abatu, khubasaba mulomalome.” ¹⁶ Manu Paulo kasiingira nakhosesa amakhono kaye kawoola ati, “Abatu ba Isirayiri nende enywe Abateende basaba Weere, muntekerese! ¹⁷ Weere wa batu ba Isirayiri kadoola baseefwe; kakhola bakhulakhulana mu bikha bibali mu Misiri, na’maani mangi kabatusa mu syalo esyo, ¹⁸ kesimirisa ensambo chawe mumbaka ye myaka nga kane mu sibbarara, ¹⁹ kakwisa owutukki we’byalo musanfu mu Kanani kawa eroba lyawe eyiri abatu baye nga owusikhirano. ²⁰ Binno byoosi byakholewa mu mbaka yemyaka nga emya chine nende kataanu. Bino nibiweye, “Weere kabawa Abalamusi okhwoola khu’ndaalo cha Samwiri omu nabbi. ²¹ Nibamala abatu basaba Omwene’ngo, kabawa Saulo omusyani wa Kishi, owo’lwanyi lwa Benyamini, owatukka emyaka kane. ²² Namalirewo Saulo, kakhola Daudi kaaba O'mwene’ngo wawe. Kawa owujjulisi owumudiirakho: kawoola ati, ‘Nakhakaana Daudi omusyani wa Yesse omusaacha omwoyo kwange yikudakha; acha okhukhola byoosi Esse bindakha akhole.’ ²³ Okhutula mulwiwulo lunno Weere asingisise kabatera Yisirayiri omuwoniya Yesu, nga lukasubisa. ²⁴ Yesu natecha, Yokana kawuulira okhweyolobya no’khubatisiwa eyiri abatu ba Isirayiri boosi. ²⁵ Nga Yokana lukali namalirisa omulimo kwaye, kawoola ati: ‘Mubasa nisse naanu? Sinise oyo. Khaba, ne owicha nintulirewo, nebirato byaye sinkhoyera okhuwolola.’ ²⁶ “Baana befwe, baana ba Yibbulaimu, khandi enywe abateende abatya Weere, siri yikhuli mbo emboosi yino eyo’wuwoniya nifwe bayitumiyiywe.” ²⁷ Abatu ba Yerusalemi na batukki baawe sibategeera Yesu, ne mukhumukhengera boseresa emboosi cha ba nabbi chisomewa wuli lwa Ssabbiti. ²⁸ Nende syakaaniwa nti ali awuma songa yikira kakhengerwa okwo’khufwa, basaba Pirato ketewe. ²⁹ Nibali bakhamalirisa byoosi ebyali byawandiikiwa khuye, bamutusa khu musalabba bamutta munηηani. ³⁰ Ne Weere kamusyukhisa mu bafu, ³¹ okhumala endaalo nyingi kawonekhera abo abakendanga naye okhutula e Galiraya nibacha e Yerusalemi. Nibo wunaanu abajjulisi baye eyiri abatu befwe. ³² “Khubawoolera emboosi ndayi: Weere sikasubisa ba seefwe, ³³ koseresise yikhuli,khu baana baawe, nasyukhisiise Yesu. Nga lusyawandiikiwa mu Zabbuli yo’khubiri siiti: “’Oli mwana wange omusyani; Olwaleero nfukhire Bbabbawo. ³⁴ Esikhakhasa mbo Weere kamusyukhisa mu baffu, owutawola, endalo chosi choosi, silomalomewakho mu mboosi chinno: “Nja okhukhuwa owo’lerefu khandi enkhabi cholereye echasubisiwa Daudi.’ ³⁵ Ni sinno silomalomwakho ewuleka: “’Sulirekha omwolerefu wawo okhuwona okhuwola.’ ³⁶ “Daudi nikali kakhamala okhuwereesa ebigendererwa bya Weere mubikha mu bikha bya bye'mirembe kyaye, kamala kakkona; bamusiikha nende basimwana khandi omubiri kwaye kwawola. ³⁷ Ne oyo Weere yikasyukhisa mu baffu sikawona khu khuwola. ³⁸ “Nolyesyo, baana befwe, ndakha mumanye muuti okhubitira mu Yesu okhulekherwamo ebibi byenywe khulangirirwa yimuli. ³⁹ Okhubitira mu’Ye nawuli ofukirira akhakhasiwa mu byoosi ebitakhanyalikhanire okhukhakhasiwa no’bitira mu malako ka Musa. ⁴⁰ Mwegenderese muuti ba nabbi bibawoola bitabekholekhanakho: ⁴¹ “‘Muwone, enywe abalekeresi, muwukke khandi musikhirire, khuba nj'okhukhola esiitu mu ndaalo chenywe simulitafukiirira, nende omutu akakhabawoolera.’” ⁴² Nga Paulo nende bali batula mu sinaggogi, abatu babalanga khu lwa Sabbiiti lulondakho bemeede okhulomaloma khu mboosi chinno. ⁴³ Ne esikanda nisyakhasewulwa, abangi khu ba’Yudaaya na bakalukhana okhucha mu ddiini e yo’buYudaaya balonda Paulo nende , abalomaloma nabo khandi babakhubbirisa okhuchanakana nibakendera musisa sya Weere. ⁴⁴ Khu lwa sabbitti lulondakho ambi esikko syosi syoosi syewuusa okhuwulirisa emboosi yo’Mwami. ⁴⁵ Aba’Yudaaya nibawona ebidiikha, bechula omutolyo balomaloma emboosi chinyeka Paulo bikali nalomaloma. ⁴⁶ Nawene awo Paulo nende babakowoolamo awuma khutya baati: “Khuteekwa okhulomaloma emboosi ya Weere yimuli mberi. Khuba enywe muyingana khandi simwebaasakho enywe okhukhoyera owulamu wutaliwaawo, wunaanu khakhukalukhane khuche eyiri abateende. ⁴⁷ Khuba sino Weere nje sikatulagira: “’Mbakholire mube owulafu wa’bateende, Khomunyale okhuleeta owuwoniya khusyakamo sye’syalo.’” ⁴⁸ Abateende nibawulira si no, basangaala bawa emboosi ya Weere oluyaali; khandi boosi abali nibadoolewa olwo’wulamu wutaliwaawo bafukiirira. ⁴⁹ Emboosi yo’Mwami yalaanda mungoongo choosi. ⁵⁰ Ne aba’Yudaaya bachuuba abakhasi batya Weere ab'oluyaali na basaacha batangiirisi mu sikko. Basiingisa omwoyo kwo khusandya Paulo nende , khandi baberusya mu sifwo syawe. ⁵¹ Syatulakho okhusisimula olufu lwo mu makulu kaawe, okhuyinganisiwa khwawe bacha e Yikoniyamu. ⁵² Ne abeeki khandi bechusiwa ne’sangaalo no’Mwoyo mwolerefu.