¹ Syali ambi esikha siiti si Omwene’ngo Kerode sikadiriramo balala khu batu abali bekanisa, nga achiririra okhubasandya. ² Ketta Yakobo, mwananηηina wa Yokana no’kukhande. ³ Nikawona ati sinno syasangaasa a Bayudaaya, kacha emutwe okhudiira Petero yesi. Sinno syakholewa mu bikha byo’muyumo kwe’migaati echitaasi mibbakhe. ⁴ Nibamalire okhumudiira, kamutta mujjera, kamuwayo eyiri ebikanda bine ebya basirikaale ebyalimo abasirikale bane bane mu wuli sikaanda. Kerode kagenderera okhumuta mu lwichuye omuyumo kwa pasaka nikuweye. ⁵ No’lwasino Petero kalindirwa mujjera, nayo ekanisa yatakho esinani mukhumusabira eyiri Weere. ⁶ Esiro syokhwanuusa Kerode sikali natekekhire amuleete okhuwosesewa, Petero kali akonire akati wa basirikale babiri, ngawoyiirwe enjegere chibiri, na’balindi bo’khumulyango kwesiriwa bosi nibemire. ⁷ Awenawo malaika wa Weere kawonekhana no’wulafu waamulikha mu mujjera. Kakuudda Petero mu lubaffu kaamusisimusa. Kawoola ati, “Mangu mangu siingira!” manu enjegere chawololokha okhutula khumakhono ka Petero chakwa. ⁸ Malayika kamuwola ati, “Yambala enguwo ne’birato.” Petero kakhola atyo. “Wekache omukhoba kwawo omale wunoonde,” malayika kachanakana. ⁹ Petero kamuloonda katula mujjera, binno kabikholanga nga syategera malaika bikali nakhoola byali nibyo ebikholewa; kakaala ati ali okhwolewesa. ¹⁰ Babita khu baliindi basokha nabokhubiri bola khu mulyango kwesichuuma okwolerera esikko. Kweyikula okwene, bakubitamo. Nibali bakhakenda owuleyi wengira yo’musikko ndala khangu khangu malayika kamulekha. ¹¹ Awo nje Petero amakesi akakowooleramo khandi kawoola ati, “Wunaanu manyire atali khukanaakana nti Omwami atumire malaika waye khandi kantusise mu makhono ka Kerode nende mwibyo byosi aba’Bayudaaya babeye nibasubira.” ¹² Binno nibyali byakhamuwakho, kamala kaacha mu nyumba ya Malyaamu nηηina wa Yokana, nga khandi alangiwa Maako, abatu bangi yibali bewuusiiye nibasaba. ¹³ Petero kakhokhona khu mulyango kwerwanyi, omukhosi mukhasi yibalanga Roda nje owecha okhuwona okhokhona khulwiki. ¹⁴ Nikamanyirisa ekkono lya Petero, kasangaala esibitiriye kerukha kakowolayo natekuyeewo kawoola ati, “Petero ali khumulyango!” ¹⁵ Bamuwolera baati, “Ebibaaso byawo bikotire. Nikacha mumoni nakowochola mu byawoola ati nje lusiri, bamuwoola baati, “Sinyala okhuba nje Malaika waye.” ¹⁶ Naye Petero kachanakana okhukhokhona, nibekulawo bamala bamuwona, bawukka. ¹⁷ Petero kekessa no’mukhono kwaye nga abawoolera bawulere khandi engeri Omwami lwamutusise mujjera. Kabawoolera ati, “Mwekese Yakobo nende bamwanaηηina khu mboosi chinno,” namala acha ewuleka, mu sifwo sindi. ¹⁸ Echulichuli, aliwo akhatabangukho khataasi khatono mu basirikale khubyali biibeye khu Petero. ¹⁹ Kerode nikamala okhukoonyeresa okhwamaani olwali nikhumukholeeywe khandi kakhirwa okhumwakaana, kakhemeresa na’baliindi kalagira betewe. Okhufwa Khwa Kerode Awenawo Kerode kacha e Serasiya natula e wu'Yudaaya kamenyayo wutono. ²⁰ Kali nga’nyekana na batu ba Tiro nende Sidoni; beecha baba sirala bamusaba abafukiirire okhubawulirisa. Nibamalire okhusembewa nende Bbulasito, Kerode yikali nakhira okhwesika ng'omukhosi waye, basaba okhuba mirembe, khuba bali besika esyalo syo’mwene’ngo nga nje sibawa ebyokhulya. ²¹ Khu ludaalo lwatekekhewa Kerode, nikambaye enguwo cho’wene’ngo, kekhala khu sisaala syo’wene’ngo waye khandi kalomaloma eyiri abatu. ²² Bakhumulira amukulu baati, “Linno kkono lya were, siryo’mutu.” ²³ Awo nawo, khuba Kerode sikali nawa Weere oluyaali, malayika wa Weere kamukhubba assi kaliwa ne’nyende kaffwa. ²⁴ Naye emboosi ya Weere yemeeda yawunukha. ²⁵ Naye nende Saulo nibamalire emirimo chawe, bakowola nibatula e Yerusalemi, nga bakenda nende Yokana, nge’riita lindi alangiwa Maako. EBIKHOLWA