¹ Mwana wange, teweerabiranga iteeka lyange; Naye omwoyo gwo gukwatenga ebiragiro byange; ² Kubanga enaku enyingi n'emyaka egy'okuwangaala N'emirembe niibyo ebirikwongerwaku. ³ Okusaasira n'amazima tebikulekanga: Bisibenga mu ikoti lyo; Biwandiikenga ku bipande eby'omwoyo gwo: ⁴ Bw'ewabonanga otyo okuganja n'okutegeera okusa Mu maiso ga Katonda n'ag'abantu. ⁵ Weesigenga Mukama n'omwoyo gwo gwonagwona. So teweesigamanga ku kutegeera kwo iwe: ⁶ Mwatulenga mu mangira go gonagona, Kale yaluŋamyanga olugendo lwo. ⁷ Tobbanga na magezi mu maiso go iwe; Tyanga Mukama ove mu bubbiibi: ⁸ Ekyo niikyo kyabbanga obulamu eri Omudondo gwo, N'obusomyo eri amagumba go. ⁹ Oteekangamu ekitiibwa Mukama n'ebintu byo, N'ebiberyeberye ku bibala byo byonabyona: ¹⁰ Amawanika go bwe gaizulanga gatyo ekyengera, N'amasogolero go gayiikanga omwenge omusu. ¹¹ Mwana wange, tonyoomanga kubuulirira kwa Mukama; So n'okunenya kwe kulekenga okukukooya: ¹² Kubanga Mukama gw'ataka gw'anenya; Era nga itaaye omwana we gw'asanyukira. ¹³ Aweweibwe omukisa omuntu abona amagezi. N'oyo afuna okutegeera. ¹⁴ Kubanga obuguli bwago businga obuguli obwe feeza, N'amagoba gaago gakira zaabu ensa. ¹⁵ Go muwendo mungi okusinga amabbaale amatwakaali: So wabula kintu ky'osobola okwegomba ebyekankanyizibwa nago. ¹⁶ Okuwangaala kuli mu mukono gwago omulyo; Mu mukono gwago omugooda mulimu obugaiga n'ekitiibwa. ¹⁷ Amangira gaago mangira go kusanyukiramu, N'eŋendo gyago gyonagyona mirembe. ¹⁸ Ago niigwo musaale ogw'obulamu eri abo abagakwata: Era alina omukisa buli muntu abbba nago. ¹⁹ Mukama yateekerewo emisingi gy'ensi n'amagezi; Yanywezerye eigulu n'okutegeera. ²⁰ Enyanza yayabikire n'okumanya kwe, Eigulu ne litonnya omusulo. ²¹ Mwana wange, ebyo tebivanga ku maiso go; Kwatanga amagezi amatuufu n'okuteesya; ²² Bwe byabbanga bityo obulamu eri emeeme yo, N'obuyonjo eri eikoti lyo. ²³ Awo lw'olitambulira mu ngira yo mirembe, So n'ekigere kyo tekiryesiitala. ²⁴ Bw'ewagalamiranga tootyenga: Niiwo awo, wagalamiranga n'endoolo gyo gyakuwoomeranga. ²⁵ Totyanga ntiisya gy'otomanyiriire, waire okuzikirizya okw'ababbiibi bwe kwizanga: ²⁶ Kubanga Mukama niiye eyabbanga obwesige bwo, Era niiye eyakuumanga ekigere kyo olekenga okuwambibwa ²⁷ Toimanga ebisa abo abagwanira, Bwe kiri mu buyinza bw'omukono gwo okubikola. ²⁸ Tokobanga muliraanwa wo nti Yaba oire, Eizo ndikuwa; Bwe kiri naiwe. ²⁹ Tosaliranga mwinawo bubbiibi, Kubanga abba gy'oli mirembe ³⁰ Totongananga no muntu awabula nsonga, Oba nga abulaku bubbiibi bw'akukolere. ³¹ Tokwatirwanga iyali omusaiza ow'amawagali, So teweerobozyanga mangira ge gonagona. ³² Kubanga omukyamu wo muzizo eri Mukama: Naye ekyama kye kiri n'abagolokofu. ³³ Ekikolimo kya Mukama kiri mu nyumba ey'omubbiibi: Naye awa omukisa ekifo abatuukirivu mwe babba. ³⁴ Mazima anyooma abanyoomi, Naye awa abeetoowaza ekisa. ³⁵ Ab'amagezi balisikira ekitiibwa: Naye ensoni niigyo giribba okukuzibwa okw'abasirusiru.