¹ Omwenge mukudaali, ekitamiirya muleekaani; Era buli akyama olw'ebyo abula magezi. ² Entiisya ya kabaka kuwuluguma kwe mpologoma: Amusunguwalya ayonoona obulamu bwe iye. ³ Omuntu eyeewala okutongana yeefunira ekitiibwa: Naye buli musirusiru ataka kutongana. ⁴ Omugayaavu ataikirirya kulima olwa mutoigo; Kyeyavanga asabirirya okukungula nga kutuukire n'atabba ne kintu. ⁵ Okuteesya okw'omu mwoyo gw'omuntu kuli ng'amaizi ag'omu nsulo empanvu; Naye omuntu alina okutegeera alikusena. ⁶ Abantu bangi abalirangira buli muntu ekisa kye ye: Naye omuntu omwesigwa yani asobola okumubona? ⁷ Omuntu omutuukirivu atambulira mu butayonoona bwe, Abaana be abairawo balina omukisa. ⁸ Kabaka atyaime ku ntebe esalirwaku emisango Asaansaanya obubbiibi bwonabwona n'amaiso ge. ⁹ Yani asobola okutumula nti Nongooserye omwoyo gwange, Ndi mulongoofu mu kwonoona kwange? ¹⁰ Ebipimo ebitekankana n'ebigera ebitekankana Byombiri byo muzizo eri Mukama. ¹¹ Era n'omwana omutomuto yeemanyisya olw'ebikolwa bye, Omulimu gwe oba nga mulongoofu, oba nga musa. ¹² Okitu okiwulira, n'eriiso eribona, Mukama niiye yakola byombiri. ¹³ Totakanga kugona oleke okutuuka mu bwavu; Zibulanga amaiso go, waikutanga emere. ¹⁴ Kibulaku kye kigasa, Kibulaku kye kigasa, bw'atumula agula: Naye ng'amalire okwaba kaisi yeenyumiririrya. ¹⁵ Waliwo zaabu n'amabbaale amatwakaali mangi inu: Naye omunwa egw'okumanya kyo buyonjo kyo muwendo mungi. ¹⁶ Twalanga ekivaalo ky'oyo eyeeyemerera gw'atamaite; Era okiwenga oyo eyeeyemerera batamaite. ¹⁷ Emere ey'obubbeyi ewoomera omuntu; Naye oluvannyuma omunwa gwe guliizula omusenyu. ¹⁸ Buli kigambo ky'omalirira kinywezebwa na kuteesya: Era tabaalanga n'okutangirwa okw'amagezi. ¹⁹ Atambulatambula ng'alyolyoma abiikula ebyama: Kale teweetabulanga n'oyo ayasama einu omunwa gwe. ²⁰ Akolimira itaaye oba maye, Etabaaza ye erizikizibwa mu ndikirirya ekwaite zigizigi. ²¹ Obusika busoboka okufunibwa amangu Oluberyeberye; Naye enkomerero yaabwo teribba no mukisa. ²² Totumulanga nti Ndisasula obubbiibi: Lindiriranga Mukama yeena yakuwonyanga. ²³ Ebipima ebitekankana byo muzizo eri Mukama; Ne minzaani ey'obubbeyi ti nsa. ²⁴ Amaaba g'omuntu gava eri Mukama; Kale omuntu asobola atya okutegeera engira ye? ²⁵ Kyambika eri omuntu, okutumula ng'ayanguwirirya nti Kitukuvu, Awo ng'amalire okweyama kayisi n'abuulya. ²⁶ Kabaka ow'amagezi akonja ababbiibi, Era abaleetaku olupanka oluwuula. ²⁷ Omwoyo gw'omuntu niiyo tabaaza ya Mukama, Ekebera ebitundu byonabyona eby'ekida eby'omunda. ²⁸ Okusaasira n'amazima biwonya kabaka: Era okusaasira kwe kuwanirira entebe ye. ²⁹ Abalenzi ekitiibwa kyabwe maani gaabwe: N'abakaire omutwe oguliko envi niibwo busa bwabwe. ³⁰ Emiigo egiruma gimalawo obubbiibi: N'enga zituuka mu bitundu eby'ekida eby'omunda.