¹ Eminzaani ey'obubbeyi yo muzizo eri Mukama: Naye ekipima ekituufu ky'asanyukira. ² Amalala lwe gaiza, lwe waiza n'ensoni: Naye amagezi gabba n'abeetoowaza. ³ Obutayonoona obw'abagolokofu bulibaluŋamya: Naye obubambaavu bw'abo abasala enkwe bulibazikirirya. ⁴ Obugaiga bubulaku kye bugasa ku lunaku olw'obusungu: Naye obutuukirivu buwonya mu kufa. ⁵ Obutuukirivu bw'oyo eyatuukiriire bwaluŋamyanga engira ye: Naye omubbiibi aligwa olw'obubbiibi bwe iye. ⁶ Obutuukirivu obw'abagolokofu bulibawonya: Abo abasala enkwe balikwatibwa n'eitima lyabwe ibo. ⁷ Omuntu omubbiibi bw'afanga, okusuubira kwe kuzikiriranga: N'essuubi ery'obutali butuukikirivu lirigota. ⁸ Omutuukirivu awonyezebwa mu naku, Omubbiibi n'aira mu kifo kye. ⁹ Atamaite Katonda azikirirya mwinaye n'omunwa gwe: Naye abatuukirivu baliwonyezebwa olw'okumanya. ¹⁰ Abatuukirivu bwe babona ebisa, ekibuga kisanyuka: Era ababbiibi bwe bagota, wabbawo okuleekaana. ¹¹ Omukisa ogw'abagolokofu niigwo gugulumizya ekibuga: Naye omunwa k'ababbiibi niigwo gukisuula. ¹² Anyooma mwinaye abulwa amagezi: Naye omuntu alina okutegeera asirika. ¹³ Atambulatambula ng'alyolyoma abiikula ebyama: Naye oyo alina omwoyo omwesigwa agisa ekigambo. ¹⁴ Okuluŋamya okw'amagezi nga kugotere, abantu bagwa: Naye mu bateesya ebigambo abangi niimwo muli emirembe. ¹⁵ Eyeeyemerera oyo gw'atamaite alisatibwa: Naye akyawa obweema yabbanga we nkalakalira. ¹⁶ Omukali ow'ekisa aguguba n'ekitiibwa: N'abasaiza ab'amawaagali baguguba n'obugaiga. ¹⁷ Asaasira akola okusa emeeme ye iye: Naye omukambwe ateganya omubiri gwe iye. ¹⁸ Omwibbi afuna empeera emubbeyabbeya: Naye oyo asiga obutuukirivu abba n'empeera ey'enkalakalira. ¹⁹ Anywerera mu butuukirivu niiye alituuka mu bulamu: N'oyo asengererya obubbiibi yeita yenka. ²⁰ Abo abalina omwoyo omukyamu bo muzizo eri Mukama: Naye abo ababula engira eyatuukiriire b'asanyukira. ²¹ Omukono waire nga gwegaita n'omukono, omuntu omubbiibi taliwona kubonerezebwa: Naye eizaire ery'abatuukirivu liriwonyezebwa. ²² Ng'ekyobuyonjo ekye zaabu ekiri mu nyindo y'embiizi, Atyo bw'abba omukali omusa abula kuteesya. ²³ Abatuukirivu kye beegomba bibba bisa: Naye ababbiibi kye basuubira busungu. ²⁴ Wabbaawo asaansaanya ne yeeyongera ate okwala; Era wabaawo aima okusinga bwe kigwana, naye kireeta kwetaaga bwetaagi. ²⁵ Emeeme egabagaba yageizanga: N'oyo afukirira amaizi, yeena alifukirirwa mweene. ²⁶ Aima eŋaanu, abantu balimulaama: Naye omukisa gwabbanga ku mutwe gw'oyo agitunda. ²⁷ Anyiikira okusagiranga ebisa, asagiranga n'okuganja: Naye akeneenya eitima, lyamwziranga. ²⁸ Eyeesiga obugaiga bwe aliwa: Naye abatuukirivu bayeranga ng'amakoola amabisi. ²⁹ Ateganya enyumba ye iye alisikira empewo: N'omusirisuru alibba mwidu w'oyo alina omwoyo ogw'amagezi. ³⁰ Ebibala by'omutuukirivu musaale gwo bulamu: N'oyo alina amagezi afuna emeeme gy'abantu. ³¹ Bona, omutuukirivu aliweebwa empeera mu nsi: Omubbiibi n'omwonoonyi tebalisinga inu?