¹ Awo emitwe gy'e nyumba gya baitawabwe egy'e nda y'a baana ba Gireyaadi, Mutaane wa Makiri, Mutaane wa Manase, ow'o ku nda gya bataane ba Yusufu, ni basembera ne batumulira mu maiso ga Musa n'o mu maiso g'a bakulu, emitwe gy'e nyumba gya baitawabwe egy'a baana ba Isiraeri ² ne batumula nti Mukama yalagiire mukama wange okugabira abaana ba Isiraeri ensi n'o bululu okubba obusika era mukama wange yalagiirwe Mukama okugabira obusika bwa Zerofekadi mugande waisu bawala be. ³ Era bwe bafumbirwanga yenayena ku baana b'e bika by'a baana ba Isiraeri ebindi, kale obusika bwabwe bwatoolebwanga ku busika bwa baitawaisu, nu bugaitibwa ku busika obw'e kika kye balibbaamu Butyo bulitoolebwa ku mugabo gw'o busika bwaisu. ⁴ Awo jubiri ogw'a baana ba Isiraeri bwe gulituuka, kale obusika bwabwe buligaitibwa ku busika obw'e kika ekiribba ekyabwe butyo obusika bwabwe bulitoolebwa ku busika obw'e kika kya baitawaisu. ⁵ Musa n'a lagira abaana ba Isiraeri ng'e kigambo kya Mukama bwe kyabbaire ng'a tumula nti ekika kya bataane ba Yusufu batumula by'e nsonga. ⁶ Kino niikyo kigambo Mukama ky'a lagira ku bawala ba Zerofekadi, ng'a tumula nti bafumbirwenga gwe basiimanga; kyooka ku nda y'e kika kya itawabwe kwe bafumbirwanga. ⁷ Kityo tewaabbengawo busika bwonabwona obw'a baana ba Isiraeri obwakyukanga okuva mu kika okuyingira mu kika kiinaakyo kubanga abaana ba Isiraeri beegaitanga buli muntu n'o busika obw'e kika kya baitawabwe. ⁸ Na buli muwala, yabbanga n'o busika mu kika kyonakyona eky'a baana ba Isiraeri, yabbanga mukali w'omu ku nda ey'e kika kya itawawe, abaana ba Isiraeri kaisi balye buli muntu obusika bwa baitawabwe. ⁹ Kityo tewaabbengawo busika bwonabwona obwakyukanga okuva mu kika okuyingira mu kika ekindi; kubanga ebika by'a baana ba Isiraeri beegaitanga buli muntu n'o busika bwe iye. ¹⁰ Nga Mukama bwe yalagiire Musa, batyo bawala ba Zerofekadi bwe baakolere ¹¹ kubanga Maala, Tiruza, n'o Kogula, n'o Mirika, n'o Noowa, bawala ba Zerofekadi, ni bafumbirwa bataane ba bagande ba itawabwe. ¹² Bafumbiirwe ku nda gya bataane ba Manase mutaane wa Yusufu, obusika bwabwe ni bubeeranga mu kika eky'e nda ya itawabwe. ¹³ Ebyo niibyo biragiro n'e misango, Mukama bye yalagiire abaana ba Isiraeri n'o mukono gwa Musa mu nsenyu gya Mowaabu ku Yoludaani e Yeriko.