¹ Mukama n'a koba Alooni nti iwe na bataane bo n'e nyumba ya baitawanyu wamu naiwe mwabbangaku obutali butuukirivu bw'a watukuvu era iwe n'a bataane bo wamu naiwe mwabbangaku obutali butuukirivu bw'o bwakabona bwanyu. ² N'a bagande bo boona, ekika kya Leevi, ekika kya itaawo, basemberye wamu naiwe, bagaitibwe naiwe bakuweereryenga naye iwe n'a bataane bo wamu naiwe mwabbanga mu maiso g'e weema ey'o bujulizi. ³ Era bakuumanga bye wagisisiibwe, n'e bigisisibwa eby'e weema yonayona kyooka tebasembereranga bintu byo mu watukuvu n'e kyoto, bareke okufa, ibo waire imwe. ⁴ Era baligaitibwa naiwe ni bakuuma eweema ey'o kusisinkanirangamu nga bwe bagisisiibwe, olw'o kuweererya kwonakwona okw'o mu wema n'a munaigwanga tabasembereranga. ⁵ Era mwakuumanga awatukuvu nga bwe mwagisisiibwe, n'e kyoto nga bwe mwagisisiibwe walekenga okubba obusungu ate ku baana ba Isiraeri. ⁶ Nzena, bona, nze ntoire bagande banyu Abaleevi mu baana ba Isiraeri ibo kirabo gye muli, ekiweweibwe eri Mukama, okukolanga okuweererya okw'o mu wema ey'o kusisinkanirangamu. ⁷ Naiwe n'a bataane bo wamu naiwe mwakuumiranga obwakabona bwanyu buli kintu eky'e kyoto n'e byo ebiri munda w'e ijiji; era mwaweereryanga mbawa obwakabona okubba okuweererya kwe muweweibwe n'o munaigwanga yasemberanga anaitibwanga. ⁸ Mukama n'akoba Alooni nti nzena, bona, nze nkugisisirye ebiweebwayo gye ndi ebisitulibwa, ebintu byonabyona eby'a baana ba Isiraeri ebitukulibwa, gwe mbiwaire olw'o kufukibwaku amafuta, n'a bataane bo, okubba eibbanja enaku gyonagyona. ⁹ Bino niibyo byabbanga ebibyo ku bintu ebitukuvu einu, ebyafiikangawo ku musyo buli kitone kyabwe, buli kye bawaayo eky'o bwita, na buli kye bawaayo olw'e kibbiibi, na buli kye bawaayo olw'o musango, bye basasulanga, byabbanga bitukuvu inu, bibyo era bya bataane bo. ¹⁰ Walyangaku ng'e bintu ebitukuvu einu; buli musaiza yalyangaku byabbanga bitukuvu gy'oli. ¹¹ Era bino bibyo ekirabo kyabwe kye bawaayo ekisitulibwa, byonabyona abaana ba Isiraeri bye bawaayo ebiwuubibwawuubibwa mbikuwaire iwe na bataane bo na bawala bo wamu naiwe, okubba eibbanja enaku gyonagyona buli muntu omulongoofu mu nyumba yo y'alyangaku. ¹² Amafuta gonagona agasinga obusa n'e mazabbibu gonagona agisinga obusa, n'o ku ŋaanu, ebiberyeberye ku ibyo niibyo bye bawanga Mukama, gwe mbiwaire. ¹³ Ebibala ebyasookanga okwenga ku byonabyona ebiri mu nsi yaabwe, bye baleeteranga Mukama, byabbanga bibyo; buli muntu omulongoofu ali mu nyumba yo yalyangaku. ¹⁴ Buli kintu ekyawongebwanga mu Isiraeri kyabbanga kikyo. ¹⁵ Buli ekyaigulanga enda, ku byonabyona ebirina omubiri bye bawaayo eri Mukama, oba nga muntu oba nga nsolo, byabbanga bibyo naye omuberyeberye w'o muntu tolekanga kununula, n'e mberyeberye gy'e nsolo egitali nongoofu wanunulanga. ¹⁶ N'evbyo ebyabbanga eby'o kununulibwa ku ibyo ebyamala omwezi ogumu wanunulanga, ng'o kubala kwo bwe kwabbanga, n'o muwendo ogwa sekeri itaanu, nga sekeri ey'o mu watukuvu bw'eri eyo niigyo gera abiri. ¹⁷ Naye emberyeberye y'e nte, oba embereberye y'e ntama, oba emberyeberye y'e mbuli, tonunulanga; egyo ntukuvu wamansiranga omusaayi gwagyo ku kyoto, n'o yokya amasavu gagyo okubba ekiweebwayo ekikolebwa n'o musyo, okubba eivumbe eisa eri Mukama. ¹⁸ N'e nyama yagyo yabbanga yiyo, ng'e kifubba ekiwuubibwawuubibwa era ng'e kisambi ekiryo, yabbanga yiyo. ¹⁹ Byonabyona ebisitulibwa ebiweebwayo ku bintu ebitukuvu, abaana ba Isiraeri bye bawaayo eri Mukama, mbikuwaire iwe na bataane bo na bawala bo wamu naiwe, okubba eibbanja enaku gyonagyona niiyo endagaanu ey'o munyu eteriwaawo mu maiso ga Mukama eri iwe n'eri eizaire lyo awamu naiwe. ²⁰ Mukama n'a koba Alooni nti Tiwabbenga n'o busika mu nsi yabwe, so tiwabbenga na mugabo gwonagwona mu ibo ninze mugabo gwo n'o busika bwo mu baana ba Isiraeri. ²¹ Era abaana ba Leevi, bona, mbawaire ebitundu byonabyona eby'e ikumi eby'o mu Isiraeri okubba obusika, okubba empeera y'o kuweererya kwabwe kwe baweererya, niikwo kuweererya okw'o mu wema ey'o kusisinkanirangamu. ²² N'o kuva watyanu abaana ba Isiraeri ti baasembererenga wema yo kusisinkanirangamu, balekenga okubbaaku ekibbiibi ni bafa. ²³ Naye Abaleevi bakolanga okuweererya okw'omu wema ey'o kusisinkanirangamu, boona babbangaku obutali butuukirivu bwabwe lino lyabbanga iteeka eritaliwaawo mu mirembe gyanyu gyonagyona, era mu baana ba Isiraeri ti babbanga n'o busika. ²⁴ Kubanga ebitundu eby'e ikumi eby'a baana ba Isiraeri, bye bawaayo okubba ekiweebwayo ekisitulibwa eri Mukama, bye mbawaire Abaleevi N'o kubba obusika kyenviire mbakoba nti mu baana ba Isiraeri tebabbanga n'o busika. ²⁵ Mukama n'a koba Musa nti ²⁶ Era ate watumula n'Abaleevi n'o bakoba nti bwe mwasoloozyanga ku baana ba Isiraeri ebitundu eby'e ikumi bye mbawaire ku ibo okubba obusika bwanyu, kale mwawangayo ku ibyo ekiweebwayo ekisitulibwa eri Mukama, ekitundu eky'e ikumi eky'e bitundu eby'e ikumi. ²⁷ Era kye muwaayo ekisitulibwa kyabalibwanga gye muli, ng'e mere enkalu ey'o mwiguuliro, era ng'e bikula mu isogolero. ²⁸ Mutyo mweena mwatolanga ku bitundu byanyu byonabyona eby'e ikumi abaana ba Isiraeri bye babawa, okuwaayo ekiweebwayo ekisitulibwa eri Mukama; era mwatoolanga ku byo okuwa Alooni kabona ekiweebwayo ekya Mukama ekisitulibwa. ²⁹ Ku birabo byanyu byonabyona kwe mwatolanga buli ekiweebwayo ekya Mukama ekisitulibwa, ku ebyo byonabyona ebisinga obusa, niikyo kitundu kyabyo ekitukulibwa kye mutoola ku ebyo. ³⁰ Kyewava obakoba nti bwe mwasitulanga ebisinga obusa ku ibyo, kale byabalibwanga eri Abaleevi ng'e kyengera eky'o mu iguliro, era ng'e kyengera eky'o mu isogolero. ³¹ Era mwabiriiranga mu buli kifo, imwe n'e nyumba gyanyu kubanga niiyo empeera yanyu olw'o kuweererya kwanyu okw'o mu weema ey'o kusisinkanirangamu. ³² So temwabbengaku kibbiibi olw'e byo, bwe mwamalanga okusitula ku ibyo ebisinga obusa ku ibyo so ti muvumisyanga bintu bitukuvu by'a baana ba Isiraeri; mulekenga okufa. Essuula