¹ Awo eigwanga lyonalyona bwe lyamalire okubitira dala mu Yoludaani, Mukama n'a koba Yoswa, ng'a tumula nti ² Mwerondere Abasaiza ikumi na babiri mu bantu, mu buli kika mumu, ³ era mubalagire, nga mutumula nti Mulonde wano wakati mu Yoludaani, mu kifo ebigere bya bakabona mwe byanywereire, amabbaale ikumi n'a mabiri, mugasomokye, mugateeke mu kisulo, kye mwagonamu obwire kino. ⁴ Awo Yoswa n’a yeta abasaiza ikumi na babiri, be yateekereteekere mu baana ba Isiraeri, mu buli kika mumu. ⁵ Yoswa n'a bakoba nti mutangire esanduuku ya Mukama Katonda wanyu wakati mu Yoludaani, musitule buli muntu mu imwe eibbaale ku kibega kye, ng'o muwendo ogw'e bika eby'a baana ba Isiraeri bwe guli: ⁶ ako kabbe akabonero mu imwe, abaana banyu bwe babuulyanga mu biseera ebyaba okwiza, nga batumula nti amabbaale gano amakulu gaago ki? ⁷ Kaisi mubakobe nti kubanga amaizi ga Yoludaani gawaawo mu maiso g'e sanduuku ey'e ndagaanu ya Mukama; bwe yabitire mu Yoludaani, amaizi ni gawaawo: era Amabbaale gano galibba ekiijuukiryo eri abaana ba Isiraeri emirembe egitawaawo. ⁸ Abaana ba Isiraeri ni bakola nga Yoswa bw'a balagiire, ni balonda amabbaale ikumi n'a mabiri wakati mu Yoludaani, nga Mukama bwe yakobere Yoswa, ng'o muwendo ogw'e bika eby'a baana ba Isiraeri bwe guli; ni bagasomokya ni bagatuukya mu kifo mwe bagonere, ni bagateekaawo. ⁹ Yoswa n'a simba amabbaale ikumi n'a mabiri wakati mu Yoludaani, mu kifo ebigere bya bakabona abasitwire esanduuku ey'e ndagaano mwe byayemereire: era galiwo ne watyanu. ¹⁰ Kubanga bakabona abasitwire esanduuku bayemereire wakati mu Yoludaani, ni kituukirira buli kigambo Mukama kye yalagiire Yoswa okukobera abantu, nga byonabyona bwe byabbaire Musa bye yalagiire Yoswa: abantu ni banguwa ni babita. ¹¹ Awo, abantu bonabona bwe bamalire okubitya, esanduuku ya Mukama Kaisi n'e bita, n'a bakabona mu maiso g'a bantu. ¹² N'a baana ba Lewubeeni; n'a baana ba Gaadi, n'e kitundu eky'e kika kya Manase, ni batangira abaana ba Isiraeri ni babita nga balina ekyokulwanisya, nga Musa bwe yabakobere: ¹³ abantu ng'e mitwalo ina abeeteekereteekere okulwana ni babita mu maiso ga Mukama eri olutalo, mu lusenyu olw'e Yeriko: ¹⁴ Ku lunaku olwo Mukama n'a kulya Yoswa mu maiso ga Baisiraeri bonabona: ni bamutya, nga bwe baatyanga Musa; enaku gyonagyona egy'o bulamu bwe. ¹⁵ Mukama n'a koba Yoswa ng'a tumula nti ¹⁶ Lagira bakabona abasitula esanduuku ey'o bujulizi okuniina okuva mu Yoludaani: ¹⁷ Awo Yoswa n'a lagira bakabona ng'a tumula nti muniine muve mu Yoludaani: ¹⁸ Awo bakabona abasitwire esanduuku y'e ndagaanu ya Mukama bwe baamalire okuniina okuva wakati mu Yoludaani, n'e bigere bya bakabona ni biniinibwa ku lukalu, amaizi ga Yoludaani kaisi ni gaira mu kifo kyago, ni gayanjaala ku itale lyago lyonalyona, ng'e ira. ¹⁹ Abantu ni baniina ni bava mu Yoludaani ku lunaku olw'e ikumi mu mwezi ogw'o luberyeberye ni bagona mu Girugaali, mu nsalo ey'e buvaisana ey'e Yeriko. ²⁰ N'a mabbaale gadi eikumi n'a mabiri ge batoire mu Yoludaani, Yoswa n'a gasimba mu Girugaali. ²¹ N'akoba abaana ba Isiraeri ng'a tumula nti Abaana banyu bwe babuulyanga baitawabwe mu biseera ebyaba okwiza, nga batumula nti amakulu g'a mabbaale gano ki? ²² kaisi ni mutegeezyanga abaana banyu; nga mutumula nti Abaisiraeri babitire mu Yoludaani muno nga lukalu: ²³ Kubanga Mukama Katonda wanyu yakalirye amaizi ga Yoludaani mu maiso ganyu, okutuuka bwe mwamalire okubita; nga Mukama Katonda wanyu bwe yakolere Enyanza Emyofu, gye yakalirye mu maiso gaisu; okutuuka bwe twamalire okubita: ²⁴ amawanga gonagona ag'e nsi kaisi gamanye omukono gwa Mukama nga gwa maani; batyenga Mukama Katonda wanyu emirembe egitawaawo.