¹ Yoswa n'a wuna amakeeri n'a golokoka, ni bava mu Sitimu, nu batuuka ku Yoludaani, iye n'a baana ba Isiraeri bonabona; ni bagonawo nga bakaali kusomoka. ² Awo enaku isatu bwe gyabitire abaami ni babita wakati mu lusiisira; ³ ni balagira abantu, nga batumula nti bwe mwabona esanduuku ey'e ndagaanu ya Mukama Katonda wanyu; n'a bakabona Abaleevi nga bagyetikire, kaisi ni muva mu kifo kyanyu, ni mugisengererya. ⁴ Naye wabbbaawo eibbanga wakati wanyu nayo; ng'e mikono enkumi ibiri gigerebwa: temugisemberera, kaisi mumanye engira ebagwaniire okubitamu; kubanga okutuuka watyanu mukaali kubita mu ngira eno. ⁵ Yoswa n'a koba abantu nti Mwetukulye kubanga amakeeri Mukama yakola eby'a magero mu imwe. ⁶ Yoswa n'a koba bakabona, ng'a tumula nti musitule esanduuku ey'e ndagaanu, musomoke mutangire abantu. Ni basitula esanduuku ey'e ndagaanu n'e batangira abantu. ⁷ Mukama n'a koba Yoswa nti watyanu naatandiika okukugulumilya mu maiso ga Baisiraeri bonabona, bamanye nti, nga bwe nabbaire n'e Musa, ntyo bwe nabbanga naiwe. ⁸ Era walagira bakabona abasitula esanduuku ey'e ndagaanu, ng'o tumula nti bwe mwatuuka ku mbali kw'a maizi aga Yoludaani, mwayemerera mu Yoludaani. ⁹ Yoswa n'a koba abaana ba Isiraeri nti mwize wano, muwulire ebigambo bya Mukama Katonda wanyu. ¹⁰ Yoswa n'a tumula nti ku kino kwe mwamanyira nga Katonda omulamu ali mu imwe, era nga talireka kubbinga mu maiso ganyu Abakanani, n'Abakiiti, n'Abakiivi, n'Abaperizi, n'Abagirugaasi, n'Abamoli, n'Abayebusi. ¹¹ Bona, esanduuku ey'e ndagaanu ya Mukama w'e nsi gyonagyona, ebatangira okusomoka Yoludaani. ¹² Kale atyanu mwerondere Abasaiza ikumi na babiri mu bika bya Isiraeri, buli kika mumu. ¹³ Owo, ebigere bya bakabona abasitwire esanduuku ya Mukama, Mukama w'e nsi gyonagyona bwe biribba mu maizi ga Yoludaani, amaizi ga Yoludaani kaisi ni gawaawo, niigo maizi agava engulu; ni gemerera entuumu wamu. ¹⁴ Awo, abantu bwe baaviire mu weema gyabwe, okusomoka Yoludaani, bakabona abasitwire esanduuku ey'e ndagaanu nga batangiire abantu; ¹⁵ era abaasitwire esanduuku bwe batuukire ku Yoludaani, ebigere bya bakabona abasitwire esanduuku ni byeinika ku mbali kw'a maizi (kubanga Yoludaani gwanjaala ku itale lyagwo lyonalyona mu biseera byonabyona eby'a makungula,) ¹⁶ amaizi agaaviire engulu kaisi ni gemerera ni getuuma entuumu wamu, wala inu, ku Adamu, ekibuga ekiriraine e Zalesani: n'ago agaikire ku nyanza eye Alaba, niiyo nyanza ey'o munyu, ni gaweerawo dala: abantu ni basomokera awaliraine e Yeriko. ¹⁷ Bakabona abasitwire esanduuku ey'e ndagaanu ya Mukama ni bemerera ni banywira ku lukalu wakati mu Yoludaani, n'Abaisiraeri bonabona ni babita awakalu, okutuusya eigwanga lyonalyona lwe lyabitiire dala mu Yoludaani.