¹ Awo olwatuukire Musa omuweererya wa Mukama bwe yamalire okufa, Mukama n’akoba Yoswa, omwana wa Nuni, omuweererya wa Musa, ng'atumula nti ² Musa, omuweererya wange, afiire; kale watyanu golokoka, osomoke omwiga guno Yoludaani, iwe, n'a bantu bano bonabona, muyingire mu nsi gye mbawa ibo, abaana ba Isiraeri. ³ Buli kifo kye muliniinamu ekigere kyanyu, nkibawaire imwe, nga bwe nakobere Musa. ⁴ Okuva mu idungu n'o lusozi luno Lebanooni, okutuuka ku mwiga omunene, niigwo mwiga Fulaati, ensi yonayona ey'Abakiiti, era n'o kutuuka ku nyanza enene ku luuyi olw'e bugwaisana, niiwo walibba ensalo yanyu. ⁵ Tiwalibba muntu yenayena alisobola okwemerera mu maiso go enaku gyonagyona egy'o bulamu bwo: nga bwe nabbanga n'o Musa, ntyo bwe nabbanga naiwe; tinakwabulirenga so tinakulekenga. ⁶ Iraamu amaani guma omwoyo: kubanga niiwe olibasikisya abantu bano ensi eno gye nalayiriire Bazeiza baabwe okugibawa. ⁷ Naye mala okwiramu amaani n'o kuguma einu omwoyo, okwekuumanga okukola ng'a mateeka gonagona bwe gali, Musa, omuweererya wange ge yakulagiire: tokyamanga okugaleka ku mukono omulyo waire omugooda, Kaisi oweebwenga omukisa buli gy'e wayabanga yonnayona. ⁸ Ekitabo kino eky'a mateeka tikyavenga mu munwa gwo, naye wakirowoozeryangamu emisana n'o bwire, Kaisi weekuumenga okukola nga byonabyona bwe biri ebiwandiikiibwemu: kubanga bwewaterezanga otyo engira yo, era bwewaweebwanga omukisa otyo. ⁹ Ti ninze nkulagiire? Iraamu amaani, guma omwoyo; totyanga, so tiweekanganga kubanga Mukama Katonda wo ali naiwe buli gyewayabanga yonayona. ¹⁰ Yoswa Kaisi n'a lagira abaami b'a bantu, ng'a tumula nti ¹¹ Mubite wakati mu lusiisira, mulagire abantu, nga mutumula nti mweteekereteekere emere; kubbanga enaku eisatu nga gikaali kubita mwaba, okusomoka omwiga guno Yoludaani, okuyingira okulya ensi, Mukama Katonda wanyu gy'abawa okugirya. ¹² Era Abalewubeeni, n'Abagaadi, n'e kitundu eky'e kika kya Manase Yoswa n'abakoba, ng'atumula nti ¹³ Mwijukire ekigambo Musa omuweererya wa Mukama kye yabalagiire, ng'a tumula nti Mukama Katonda wanyu abawa ekiwumulo, era alibawa ensi eno. ¹⁴ Bakali banyu, n'a baana banyu abatobato, n'e bisibo byanyu, balityama mu nsi Musa gye yabawaire emitala wa Yoludaani; naye imwe mulisomoka mu maiso ga bagande banyu nga mulina eby'o kulwanisya, abazira mwenamwena Ab'a maani, mulibabbeera; ¹⁵ okutuusya Mukama lw'a limala okubawa bagande banyu ekiwumulo, nga bw'awaire imwe, era boona lwe balimala okulya ensi Mukama Katonda wanyu gy'a bawa ibo: Kaisi ni mwirayo mu nsi gye mwalya, mugirye, Musa omuweererya wa Mukama gye yabawaire emitala wa Yoludaani ku luuyi olw'ebuvaisana. ¹⁶ Ne bamwiramu Yoswa, nga batumula nti byonabyona by'otulagiire tulibikola, era buli gye watutumanga twayabanga. ¹⁷ Nga bwe twawuliranga Musa mu bigambo byonabyona, weena twakuwuliranga tutyo: kyoka Mukama Katonda wo abbe naiwe, nga bwe yabbaire n'o Musa. ¹⁸ Buli muntu yenayena eyajeemeranga ekiragiro kyo, era ataawulirenga bigambo byo mu byonabyona bye wamulagiranga, yaitibwanga: naye iraamu amaani, guma omwoyo.