¹ Awo Yobu n'a iramu Mukama n'a tumula nti ² Maite nga iwe osobola byonabyona, Era nga wabula kigambo kye wateeserye ekiziyizika. ³ Yani ono agisa okuteesya awabula kumanya? Kyenaviire njatula ebyo bye ntategeire, ebigambo eby'e kitalo ebyanemere bye ntamaite. ⁴ Nkwegayiriire, wulira, nzena ka ntumule; Nakubuulya, weena ongiremu. ⁵ Nabbaire nkuwulireku n'o kuwulira kw'e kitu; Naye atyanu eriiso lyange likubona, ⁶ Kyenviire neetamwa ni neenenya Mu nfuufu n'eikoke. ⁷ Awo olwatuukiire Mukama bwe yamalire okukoba Yobu ebigambo ebyo, Mukama n'akoba Erifaazi Omutemani nti Obusungu bwange bukubuubuukiire iwe n'a bano bombiri: kubanga temuntumwireku ekigambo ekirina ensonga, ng'o mwidu wange Yobu bw'atumwire. ⁸ Kale mwetwalire ente enume musanvu n'entama enume musanvu, mwabe eri omwidu wange Yobu, muweeyo ekiweebwayo ekyokyebwa; era omwidu wange Yobu yabasabira; kubanga oyo gwe naikiriirye ndeke okubakola ng'o busirusiru bwanyu bwe buli; kubanga temuntumwireku kigambo ekirina ensonga ng'o mwidu wange Yobu bw'atumwire: ⁹ Awo Erifaazi Omutemani n'o Birudaadi Omusuki n'o Zofali Omunaamasi ni baaba ni bakola nga Mukama bw'a balagiire: kale Mukama n'aikirirya Yobu. ¹⁰ Awo Mukama n'akyusya obusibe bwa Yobu, bwe yasabiire mikwanu gye: Mukama n'awa Yobu okusinga emirundi ibiri ebyo bye yabbaire nabyo oluberyeberye. ¹¹ Awo bagande be bonabona ni baiza gy'ali na banyoko be bonabona n'abo bonabona niibo be yamanyagananga nabo oluberyeberye, ni baliira emere wamu naye mu nyumba ye: ni bamukungira ni bamukubbagizya olw'o bubbiibi bwonabona Mukama bwe yamuleetereku: era buli muntu n'a muwa ekitundu ekye feeza, na buli muntu empeta eye zaabu. ¹² Awo Mukama n'awa omukisa enkomerero ya Yobu okusinga entandikwa ye: n'abba n'e ntama mutwaalo gumu mu nkumi ina, n'eŋamira kakaaga, n'e migogo gy'e nte lukumi n'e ndogoyi enkali lukumi. ¹³ Era yabbaire n'abaana ab'o bubwisuka musanvu n'a b'o buwala basatu. ¹⁴ N'o w'o luberyeberye n’a mutuuma eriina Yemima; n'o w'o kubiri eriina lye Keeziya; n'o w'o kusatu eriina lye Kerenukapuki. ¹⁵ Awo mu nsi yonayona ne watabomeka abakali abasa okwekankana abawala ba Yobu: itawabwe n'a bawa obusika mu bagande baabwe. ¹⁶ Awo oluvannyuma lw'e byo Yobu n'a wangaala emyaka kikumi mu ana, n'a bona bataane be n'a baana ba bataane be, banakasatu. ¹⁷ Awo Yobu n'afa nga mukaire ng'awererye enaku nyingi.