¹ Era ate Mukama n'airamu Yobu n'atumula nti ² Aleeta ensonga egibulamu yatongania Omuyinza w'e bintu byonabyona? Awakanya Katonda amwiremu. ³ Awo Yobu kaisi nairamu Mukama n'a tumula nti ⁴ Bona, mbulamu k'o buntu; n'a kwiramu ntya? Nteeka omukono gwange ku munwa gwange. ⁵ Ntumwire omulundi gumu, so tingiremu; Niiwo awo, emirundi ibiri, naye tineeyongere ate. ⁶ Awo Mukama n'a iramu Yobu ng'ayema mu kampusi n'atumula nti ⁷ Weesibe inu ekimyu ng'o musaiza: Nakubuulya, weena ongiremu. ⁸ N'okukyusya wakyusya omusango gwe nsala? Iwe wansalira nze omusango obbe n'o butuukirivu? ⁹ Oba olina omukono nga Katonda? Era osobola okubwatuka n'e idoboozi erifaanana erirye? ¹⁰ Weeyonje n'o kuwooma n'o kutiibwa; vaala ekitiibwa n'o bukulu. ¹¹ Fuka obusungu bwo okusuukiriire: Olingirire buli muntu ow'a malala omujeezye. ¹² Lingilira buli muntu ow'a malala omwikaikanye; Oniinirire ababbiibi we bemerera. ¹³ Bagise wamu mu nfuufu; siba amaiso gaabwe mu kifo ekigisibwa. ¹⁴ Kale nzena kaisi ne njikirirya ku iwe ng'o mukono gwo niigwo gusobola okukulokola. ¹⁵ Bona embiri gye natondeire awamu naiwe; Erya omwido ng'e nte. ¹⁶ Bona amaani gaayo gali mu nkende yayo, N'amawaggali gaayo gali mu binywa eby'o mu kida kyayo. ¹⁷ Yeesaaga omukira ng'o muvule: Ebinywa eby'o mu nkende yakyo byegaita wamu. ¹⁸ Amagumba gaayo gali sooti nseke egy'e bikomo; Amagulu gaayo gali sooti byoma ebisiba. ¹⁹ Niiyo ekulira amangira ga Katonda: Niiye yenka eyagitondere asobola okugisembererya ekitala kye. ²⁰ Mazima ensozi gigizaalira eby'o kulya; Ensolo gyonagyona egy'o mu nsiko we gizanyira. ²¹ Egalamira wansi w'e biwolyo by'e misaale, Mu bwegisiro obw'o mu ndago n'o mu bitosi. ²² Ebiwolyo by'e misaale bigibiikaku; Emyerebu egy'o mu bwiga gigyetooloola. ²³ Bona, omwiga bwe gwanjaala, tetengera: Eguma omwoyo Yoludaani waire nga gwizula ni gutuuka ku munwa gwayo. ²⁴ Waliwo eyagikwata bw'ebba ng'e moga, Oba yawumwire enyindo gyayo n'e kyambika?