¹ Awo Mukama kaisi na iramu Yobu ng'ayema mu kampuusi n'a tumula nti ² Yani ono aleeta endikirirya mu kuteesya N'ebigambo ebibulamu kumanya? ³ Kale weesibe ekimyu ng'o musaiza; Kubanga nakubuulya, weena ongiremu. ⁴ Wabbaire oli waina bwe natekerewo emisingi gy'e nsi? Yatula oba olina okutegeera. ⁵ Yani eyateeserye ebigera byayo, oba nga omaite? Oba yani eyagireegeire omuguwa? ⁶ Emisingi gyayo gyasibiirwe ku ki? Oba yani eyatekerewo eibbaale lyayo eikulu ery'o ku nsonda; ⁷ Emunyenye egy'a makeeri bwe gyayembeire awamu, N'abaana ba Katonda bonabona ni batumulira waigulu olw'e isanyu? ⁸ Oba yani eyasibire enyanza n'e njigi, bwe yawaguzirye ng'e kiva mu kida; ⁹ Bwe nafiire ekireri okubba ekivaalo kyayo, n'endikirirya ekwaite okubba ebiwero eby'okubiika, ¹⁰ Bwe nagiragiire eiteeka lyange, ni nteekawo ebisiba n'e njigi, ¹¹ Ni ntumula nti Wano w'okomanga so tosuukangawo; era wano amayengo go ag'amalala we gaziyirizibwanga? ¹² Wabbaire olagiire amakeeri enaku gyo kasookeire gibaawo, Wabbaire omanyisirye emakeeri ekifo kyayo; ¹³ Gakwate enkomerero gy'e nsi, Era ababbiibi bakunkumulwe okugivaamu? ¹⁴ Ewaanyisibwa ng'e ibbumba wansi w'a kabonero; n'e bintu byonabyona bikukunuka ng'e kivaalo: ¹⁵ N'a babbiibi omusana gwabwe gubatoolebwaku, n'o mukono ogugulumizibwa gumenyeka. ¹⁶ Wabbaire oyingiire mu nsulo egy'e nyanza? Oba wabbaire otambwire mu kugweera okw'o buliba? ¹⁷ Enjigi egy'okufa gyabbaire gikubikuliirwe? Oba wabbaire oboine enjigi egy'e kiwolyo eky'okufa? ¹⁸ Wabbaire otegeire ensi bw'eri engazi? Yatula, oba nga obimaite byonabyona. ¹⁹ Engira eri waina? mu nyumba ey'o musana, n'endikirirya ekifo kyakyo kiri waina; ²⁰ Iwe okukiwerekera ku mbibi yaakyo? Era otegeere okutuuka ku nyumba yaakyo? ²¹ Omaite, kubanga wabbaire ozaaliibwe mu biseera ebyo; n'o muwendo gw'e naku gyo mungi! ²² Wabbaire oyingiire mu mawanika g'a maizi amakwafu, Oba wabbaire oboine amawanika ag'o muzira, ²³ Ge nagisiire ebiseera eby'o kuboneramu enaku, Olunaku olw'o lutalo n'obulwa? ²⁴ Mu ngira ki omusana mwe gwawukanira, Oba empunga egy'e buvaisana mwe gisaansaanira ku nsi? ²⁵ Yani eyasaliire amataba olusalosalo, Oba engira ey'e njota egy'o kubwatuka; ²⁶ Okutonyesya amaizi ku nsi okubula muntu; mu idungu omubula muntu n'o mumu; ²⁷ Okwikutya eitakali eryazikire eryalekeibwe; n'okulokesya omwido omutomuto? ²⁸ Amaizi agalina itaaye waago? Oba yani eyazaire amatondo ag'o musulo? ²⁹ Mu kida ky'ani omwaviire amaizi amakwafu? N'omusulo omukwafu omweru ogw'o mu igulu yani eyaguzaire? ³⁰ Amaizi gagisibwa nga gagisiibwe n'a mabbaale. N'o kungulu ku buliba nga kukwaite. ³¹ Osobola okusiba ekikuukuulu kya Kakaiga, Oba okusumulula olukoba lw'Entungalugoye? ³² Osobola okufulumya emunyenye mu ntuuko gyayo? Oba osobola okuluŋamya Nabaliyo n'a baana be? ³³ Omaite ebiragiro eby'o mu igulu? Osobola okunywezya okufuga kwalyo mu nsi? ³⁴ Osobola okuyimusya eidoboozi lyo eri ebireri, amaizi amangi einu gakubikeku? ³⁵ Osobola okuweererya enjota gitambule, ni gikukoba nti ife tuuno? ³⁶ Yani eyateekere amagezi mu bitundu eby'o munda? Oba yani eyawaire emeeme okutegeera? ³⁷ Yani asobola okubala ebireri olw'a magezi? Oba yani asobola okwitulula amawu ag'omu igulu, ³⁸ Enfuufu bw'e kulukuta n'ebba eifunfugu, Amafunfugu ni geegaitira dala? ³⁹ Waiyigiira empologoma enkali omuyiigo? Oba waikutya okwegomba kw'a baana b'e mpologoma, ⁴⁰ Bwe gigona mu mpuku gyagyo, ni gibba mu bisaka okuteega? ⁴¹ Yani alabirira waikoova emere ye, Abaana be bwe bakungira Katonda, ni batambulatambula olw'okubulwa ebyokulya?