¹ Awo Yobu n'aleeta ate olugero lwe n’atumula nti ² Nga Katonda bw'ali omulamu aliire ensonga yange; Era Omuyinza w'ebintu byonabyona, eyeeraliikirirya emeeme yange; ³ (Kubanga obulamu bwange bukaali bulamba mu nze, n'omwoyo gwa Katonda guli mu nyindo gyange;) ⁴ Mazima emunwa gyange tegutumula butali butuukirivu, So n'olulimi lwange terwatule bubbeyi. ⁵ Katonda akiirirye edi nze okubawa obutuukirivu: Okutuusya lwe ndifa tindetoolaku obugolokofu bwange. ⁶ Obutuukirivu bwange mbunywezya so tinabulekulenga: Omutima gwange tegyesiisikyenga nga nkyali mulamu. ⁷ Omulabe wange abbe ng'omwibbi. N'oyo angolokokerako abbe ng'atali mutuukirivu. ⁸ Kubanga eisuubi ly'atamaite Katonda niikyo ki, waire nga yeefunira amagoba, Katonda bw'atoolawo obulamu bwe? ⁹ Katonda yawuliranga okukunga kwe, Enaku bwe gyamutuukangaku? ¹⁰ Yasanyukiranga Omuyinza w'ebintu byonabyona, N'akungira Katonda mu biseera byonabyona? ¹¹ N'abegeresya eby'omukono gwa Katonda; Ekiri n'Omuyinza w'ebintu byonabyona tinakigise. ¹² Bona, imwe mwenna imwe beene mukiboine; Kale kiki ekyabafuuliire dala ababulaku kye mugasa? ¹³ Guno niigwo mugabo gw'omuntu omubbiibi eri Katonda, N'obusika, bw'abajoogi bwe baweebwa Omuyinza w'ebintu byonabyona. ¹⁴ Abaana be bwe beeyongera, beeyongerera ekitala; N'enda ye teriikuta emere. ¹⁵ Abasigalangawo ku iye baziikibwanga mu kufa, na banamwandu be tebaakungubagenga. ¹⁶ Waire ng'atuuma feeza ng'enfuufu, n'ategeka ebivaalo ng'eitali; ¹⁷ Okutegeka asobola okubitegeka, naye omutuukirivu niiye alikivaala, Era abulaku musango niiye aligabana feeza. ¹⁸ Azimba enyumba ye ng'ekiwolyo, Era ng'ensiisira omukuumi gy'akola. ¹⁹ Agalamira nga mugaiga, naye taakungulwenga; Azibula amaiso, kale nga takaali aliwo. ²⁰ Ebitiisya bimukwata ng'a maizi; Empunga amutwala kyama obwire. ²¹ Empunga egy'e buvaisana gimutwalira dala n'ayaba; ni gimutoola mu kifo kye lwa maani. ²² Kubanga Katonda alimukasuukirira n'atasaasira: Yanditakire okwiruka mu mukono gwe. ²³ Abantu balimukubbira mu ngalo, Era balimunionsoola ave mu kifo kye. omukuumi gy'akola.