¹ Omuyinza w'e bintu byonabyona kiki ekimulobera okugisa ebiseera? N'abo abamumaite kiki ekibalobera okubona enaku gye? ² Wabbaawo abaijulula obubonero bw'e nsalo; Banyaga embuli lw'a maani ne baziriikya. ³ Babbinga endogoyi ey'ababula itawabwe, Batwala ente ya namwandu okubba omusingo. ⁴ Bakyamya abeetaaga mu ngira: Abaavu ab'o mu nsi beegisa wamu. ⁵ Bona, ng'e ntulege mu idungu bafuluma eri omulimu gwabwe nga basagirira dala eby'o kulya; ensiko ebawa emere ya baana baabwe. ⁶ Basala emere ey'e nsolo gyabwe mu itale; era banoga eizabbibu ery'o mubbiibi. ⁷ Bagona ni bakyeesya obwire nga babulaku kye bavaire, so babulaku kye beebiika empewo nga gifuuwa. ⁸ Batoba n'o lufumyagali olw'o ku nsozi, Era bavumbagira olwazi nga bagoteibwe we begama. ⁹ Niiwo awo abakwakula ababula itawabwe okubatoola ku mabeere, ni batoola omusingo ku mwavu: ¹⁰ N'okutambula ni batambula bwereere nga babula kye bavaire, Era enjala ng'e balumire beetiika ebinywa; ¹¹ Bakamulira amafuta mu bisenge by'a basaiza abo; Baniina amasogolero gaabwe ni balumwa enyonta. ¹² Abantu basinda nga bali mu kibuga ekirimu abantu abangi, emeeme y'abo abafumitiibwe n'e kunga: Naye Katonda takibala okubba obusirusiru. ¹³ Abo bali ku muwendo gw'abo abajeemera omusana; tibamaite mangira gaagwo, So tebabbeerera mu mpenda gyagwo. ¹⁴ Omwiti agolokokera wamu n'o musana, aita omwavu ne yeetaaga; Era obwire aba ng'o mwibbi. ¹⁵ Era n'e riiso ly'o mwenzi lirindirira endikirirya, ng'a tumula nti Wabula liiso eryambona: Ni yeefuula amaiso ge. ¹⁶ Mu ndikirirya mwe basimiire enyumba: Beigalira emisana; Tebamaite musana. ¹⁷ Kubanga obw'a makeeri buli ng'e kiwolyo eky'okufa eri abo bonabona; Kubanga bamaite ebitiisya eby'ekiwolyo eky'o kufa. ¹⁸ Abawa embiro ng'a maizi; Omugabo gwabwe gulaamibwe ku nsi: Takyukira awali engira ey'e nsuku gy'e mizabbibu. ¹⁹ Ekyeya n'e ibbugumu bimalawo amaizi agava mu muzira: N'amagombe gatyo gamalawo abo abayonoona. ²⁰ Ekida kyamwerabiranga; eigino lyamulyanga ng'a liwomeirwe; Twijukirwenga ate: Kale obutali butuukirivu bwamenyekanga ng'o musaale. ²¹ Alya omugumba atazaala; So takola namwandu kusa. ²² Era awalula n'ab'amaani olw'obuyinza bwe: Ayimuka, so wabula muntu asuubira okubba omulamu. ²³ Katonda abawa okubba emirembe, ne beesigama okwo; N'a maiso ge gali ku mangira gaabwe. ²⁴ Bagulumizibwa; ni wabitawo eibbanga itono nga baabire; Niiwo awo, bakakanyilibwa, batoolebwa mu ngira ng'a bandi bonabona, era basalibwa ng'emitwe gy'ebiyemba by'e ŋaanu. ²⁵ Era oba nga ti niikyo bwe kiri atyanu, yani eyanumirirya nga ndi mubbeyi, n'afuula okutumula kwange obutabbaaku kye kugasa?