¹ Waaliwo omusaiza mu nsi Uzi, eriina lye Yobu; era omusaiza oyo yatuukiriire era nga wa mazima, era ng'atya Katonda ne yeewalanga obubbiibi. ² N'a zaalirwa abaana ab'o bwisuka musanvu n'a b'o buwala basatu. ³ Era ebintu bye byabbaire entama kasanvu n'e ŋamira enkumi isatu n'e migogo gy'e nte bitaanu n'e ndogoyi enkali bitaanu n'a baidu bangi inu dala; omusaiza oyo n'abba mukulu okusinga abaana bonabona ab'e buvaisana. ⁴ Bataane be ne baabanga ne bafumba embaga mu nyumba ya buli muntu ku lunaku lwe; ni batumanga ne babitanga bamawabwe abasatu okulya n'o kunywa nabo. ⁵ Awo olwatuukiire enaku ng'e mbaga yaabwe bwe gyabitirewo, Yobu n'a tumanga n'a batukulyanga n'a golokokanga amakeeri mu makeeri, n'a wangayo ebiweebwayo ebyokyebwa ng'o muwendo gwabwe bonagwona bwe gwabbaire: kubanga Yobu yatumwire nti Koizi bataane bange boonoonere, ne beegaana Katonda mu myoyo gyabwe. Atyo Yobu bwe yakolanga olutalekula. ⁶ Awo olunaku lwabbaire lumu abaana ba Katonda ni baiza okukiika mu maiso ga Mukama, n'o Setaani yeena n'a izira mu ibo. ⁷ Mukama n'a koba Setaani nti Ova waina? Awo, Setaani n'a iramu Mukama n'a tumula nti nva kwiraŋana mu nsi n'o kutambulatambula omwo eruuyi n'e ruuyi. ⁸ Mukama n’a koba Setaani nti Olowoozerye ku mwidu wange Yobu? kubanga wabula amufaanana mu nsi, omusaiza eyatuukiriire era ow'a mazima, atya Katonda ne yeewala obubbiibi: ⁹ Awo Setaani n'a iramu Mukama n'atumula nti Yobu atiira bwereere Katonda? ¹⁰ Tomukomeire lukomera okumwetooloola iye n'e nyumba ye ne Byonabyona by'alinabyo, enjuyi gyonagyona? owaire omukisa omulimu gw'e ngalo gye, n'e bintu bye byalire mu nsi: ¹¹ Naye atyanu golola omukono gwo okome ku byonabyona by'alina, kale alikwegaanira mu maiso go. ¹² Mukama n'a koba Setaani nti bona, byonabyona by'alina biri mu mukono gwo; kyooka ku iye mwene togolola mukono gwo, awo Setaani n'ava awali Mukama. ¹³ Awo olunaku lwabbaire lumu bataane be n'a bawala be bwe, babbaire nga baliira era nga banywira omwenge mu nyumba ya mugande waabwe omukulu, ¹⁴ omubaka n'a iza, eri Yobu n'a tumula nti ente gibbaire nga girima, n'e ndogoyi nga gigiriraine nga girya; ¹⁵ Abaseba ne bagigwaku ne bagitwala; niilwo awo, baitire abaidu n'o bwogi bw'e kitala; nzena nzenka ninze mponerewo omuntu omumu okukukobera. ¹⁶ Yabbaire ng'a kaali atumula, ogondi n'a iza naye n'a tumula nti omusyo gwa Katonda gugwire nga guva mu igulu, era gwokyerye entama n'a baidu ne gubazikirirya; nzena nzenka nze mponerewo omuntu omumu okukukobera. ¹⁷ Yabbaire ng'a kaali atumula, ogondi n'a iza yena n'a tumula nti Abakaludaaya beefiire ebibiina bisatu, ne bagwa ku ŋamira, era bagitwaire, niiwo awo, era baitire abaidu n'o bwogi bw'e kitala; nzena nzenka ninze mponerewo omuntu omumu okukukobera: ¹⁸ Yabbaire ng'a tumula, ogondi n'a iza yeena n'atumula nti bataane bo n'a bawala bo babbaire nga baliira era nga banywira omwenge mu nyumba ya mugande waabwe omukulu: ¹⁹ kale, bona, empunga nyingi ne giiza nga giva mu idungu, ne gikubba ensonda ina egy'e nyumba, n'e gwa ku baisuka, era bafiire; nzena nzenka ninze mponerewo omuntu omumu okukukobera: ²⁰ Awo Yobu n'a golokoka n'a kanula omunagiro gwe n'a mwa omutwe n'avuunama ku itakali n'a sinza; ²¹ n'a tumula nti naviire mu kida kya mawange nga ndi mwereere, era ndiirayo nga ndi mwereere: Mukama niiye awa, era Mukama niiye atoolawo; eriina lya Mukama lyebazibwe. ²² Mu biseera byonabyona Yobu teyayonoonanga, so teyavuma Katonda busirusiru.