¹ Ekigambo kya Mukama ekyaiziire Yeremiya nabbi ku mawanga. ² Ku Misiri: eby'eigye lya Falaawoneko kabaka w’e Misiri eryabbaire ku lubalama lw'omwiga Fulaati e Kalukemisi, Nebukaduneeza kabaka w’e Babulooni lye yakubbire mu mwaka ogw'okuna ogwa Yekoyakimu mutaane wa Yosiya kabaka we Yuda. ³ Muteeketeeke akagabo n'engabo, musembere okulwana. ⁴ Muteeke amatandiiko ku mbalaasi, muniine, imwe abeebagala embalaasi, mwemerere mu maiso nga mulina enkoofiira gyanyu egy'ebyoma; muzigule amasimu, muvaale ebizibawo eby'ebyoma. ⁵ Nkibobeire ki? bakeŋentereibwe, baizire enyuma; n'abasaiza baabwe ab'amaani basuuliibwe wansi, era bairukire mbiro, so tebalingire nyuma: entiisya eri ku njuyi gyonagyona, bw'atumula Mukama. ⁶ Ab'embiro baleke okwiruka so n'omusaiza ow'amaani aleke okuwona; obukiika obugooda ku lubalama lw'omwiga Fulaati beesitaire bagwire. ⁷ Yani ono agolokokere nga Kiyira, amaizi ge geesuukunda ng'emiiga? ⁸ Misiri yagolokokere nga Kiyira, n'amaizi ge geesuukunda ng'emiiga: natumula nti nagolokoka, naabiika ku nsi gyonagyona; ndizikirirya ekibuga n'abo abakityamamu. ⁹ Mwambuke, imwe embalaasi; mulaluke, imwe amagaali; n'abasaiza ab'amaani bafulume: Kuusi ne Puti abakwata engabo; n'Abaluudi abakwata abanaanuula omutego. ¹⁰ Kubanga olunaku olwo lunaku lwa Mukama, Mukama w'eigye, olunaku olw'okuwalaniraku eigwanga awalane eigwanga ku balabe be: n’ekitala kirirya ne kiikuta, era kirinywa ku musaayi gwabwe ne kiikuta: kubanga Mukama, Mukama w’eigye, alina saddaaka gy'asalira mu nsi ey'obukiika obugooda ku lubalama lw'omwiga Fulaati. ¹¹ Yambuka e Gireyaadi, oirire obulezi, iwe omuwala w'e Misiri atamaite musaiza: onywira bwereere obulezi obw'engeri enyingi; wabula kulama eri iwe. ¹² Amawanga gawuliire okuwemuka kwo, n'ensi eizwire okukunga kwo: kubanga omusaiza ow'amaani yeesitaire ku w'amaani, bagwiriire wamu bombiri. ¹³ Ekigambo Mukama kye yakobere Yeremiya nabbi Nebukaduneeza kabaka w'e Babulooni bw'ayaba okwiza n'akubba ensi y'e Misiri. ¹⁴ Mukobere mu Misiri, mulangirire mu Migudooli, era mulangirire mu Noofu ne Tapanesi: mutumule nti Fuluma oyemerere, weeteeketeeke; kubanga ekitala kiriire okwetooloola enjuyi gyonagyona. ¹⁵ Ababo ab'amaani kiki ekibatwalisya olw'amaani? tibeemerera, kubanga Mukama niiye yababbingire. ¹⁶ Yabeesitairye bangi, niiwo awo, baagwaŋanaku: ne batumula nti Golokoka twireyo eri abantu ab'ewaisu n'o mu nsi gye twazaaliirwemu okuva eri ekitala ekijooga. ¹⁷ Batumuliire eyo nti Falaawo kabaka w'e Misiri luyoogaano buyoogaano; asobeerye entuuko egyalagiirwe. ¹⁸ Nga bwe ndi omulamu, bw'atumula Kabaka, eriina lye Mukama w'eigye, mazima nga Taboli mu nsozi era nga Kalumeeri ku lubalama lw'enyanza, bw'aliiza atyo. ¹⁹ Ai omuwala abba mu Misiri, weesibirire okwaba mu busibe: kubanga Noofu kirifuuka matongo, era kiryokyebwa obutabbaamu abeeramu. ²⁰ Misiri nte nduusi nsa inu; naye okuzikirira okuviire mu bukiika obugooda kutuukire, kutuukire. ²¹ N'abasaiza be b'agulirira abali wakati we bali ng'enyana egy'omu kisibo; kubanga bona baizire enyuma, bairukiire wamu, tibeemereire: kubanga olunaku olw'okuboneramu obwinike bwabwe lubatuukireku, ebiseera eby'okwizirwa kwabwe. ²² Eidoboozi lyakwo liritambula ng'omusota; kubanga balitambula nga balina eigye, ne bamutabaala nga balina empasa, ng'abatema Emisaale. ²³ Balitema ekibira kye, bw'atumula Mukama, waire nga tikisagirikika; kubanga basinga enzige obungi, so tebabalika. ²⁴ Omuwala we Misiri alikwatibwa ensoni; aliweewayo mu mukono gw'abantu ab'obukiika obugooda. ²⁵ Mukama w'eigye, Katonda wa Isiraeri, atumula nti bona, ndibonererya Amoni w'e n'o Falaawo, ne Misiri n'a bakatonda be n'a bakabaka be; Falaawo n'abo abamwesiga: ²⁶ era ndibagabula mu mukono gw'abo abasaagira obulamu bwabwe, n'o mu mukono gwa Nebukaduneeza kabaka w'e Babulooni, n'o mu mukono gw'abaidu be: kale oluvanyuma erityamibwamu nga mu naku egyeira, bw'atumula Mukama. ²⁷ Naye totya iwe, Yakobo omwidu wange, so tokeŋentererwa, iwe Isirarei: kubanga, bona, ndikulokola nga nyema wala, n'eizaire lyo nga nyema mu nsi y'obusibe bwabwe; kale Yakobo aliirawo, era alitereera era alyeteeka, so tiwalibba alimutiisya. ²⁸ Totya iwe, ai Yakobo omwidu wange, bw’atumula Mukama; kubanga nze ndi wamu naiwe: kubanga ndimalirawo dala amawanga gonagona gye nakubbingiire, naye iwe tindikumalirawo dala; naye ndikukangavula mpola, so tindikuleka n'akadiidiiri nga tobonerezeibwe.