¹ Gisangire abasumba abazikirirya abasaasaanya entama egy'omu irisiryo lyange! bw'atumula Mukama. ² Mukama Katonda wa Isiraeri kyava atumula ati eri abasumba abaliisya abantu bange nti musaansaanirye ekisibo kyange ni mubabbinga, so timwabalambwire; bona, ndireeta ku imwe obubbiibi obw'ebikolwa byanyu, bw'atumula Mukama. ³ Era ndikuŋaanya abafiikirewo ku kisibo kyange okubatoola mu nsi gyonagyona gye nababbingiire, ne mbairyawo mu bisibo byabwe; era balyala balyeyongera. ⁴ Era ndibateekawo abasumba ku ibo abalibaliisya: kale nga tibakaali batya ate so tibalikeŋentererwa, so tewalibba baligota, bw'atumula Mukama. ⁵ Bona, enaku giiza, bw'atumula Mukama, lwe ndirotya eri Dawudi eitabi eituukirivu, era alifuga nga niiye kabaka, era alikola eby'amagezi, era alituukirirya emisango n'eby'ensonga mu nsi. ⁶ Mu mirembe gye Yuda alirokoka ne Isiraeri alibba mirembe: era lino niilyo liina iye ly'alituumibwa nti Mukama niibwo butuukirivu bwaisu. ⁷ bona, naku kyegiva giiza, bw'atumula Mukama, lwe batakaali batumula ate nti nga Mukama bw'ali omulamu eyatoire abaana ba Isiraeri mu nsi y'e Misiri; ⁸ naye nti nga Mukama bw'ali omulamu eyatoire eizaire ery'enyumba ya Isiraeri mu nsi ey'obukiika obugooda n'o mu nsi gyonagyona gye nababbingiire n'abaniinisirye n'abatwaire; era balibba mu nsi yaabwe ibo. ⁹ Ebya banabbi. Omwoyo gwange munda yange gumenyekere, amagumba gange gonagona gatengera; ninga omutamiivu, era ng'omuntu awangwirwe omwenge; ku lwa Mukama n'olw'ebigambo bye ebitukuvu. ¹⁰ Kubanga ensi eizwire abenzi; kubanga ensi ekungubaga olw'okulayira; amaliisiryo ag'omu idungu gakalire; n'amaaba gaabwe mabbiibi, n'amaani gaabwe ti masa. ¹¹ Kubanga nabbi era n'o kabona boonoonefu; niiwo awo, mu nyumba yange mwe naboneire obubbiibi bwabwe, bw'atumula Mukama. ¹² Amangira gaabwe kyegaliva gabba gye bali ng'obutyeereri mu ndikirirya: balisindikibwa ne bagwa omwo: kubanga ndibaleetaku obubbiibi, niigwo mwaka mwe balibonerezebwa, bw'atumula Mukama. ¹³ Era mboine obusirusiru ku banabbi ab'e Samaliya; balagula ku lwa Baali ne bakyamya abantu bange Isiraeri. ¹⁴ Era mboine ekigambo eky'ekiive n'o ku banabbi ab'e Yerusaalemi; benda era batambulira mu by'obubbeyi, ne banywezya emikono gy'abo abakola obubbiibi, ne watabba akyuka okuleka obubbiibi bwe: bonabona bafuukire gye ndi nga Sodomu, n'ababbaire omwo nga Gomola. ¹⁵ Mukama w'eigye kyava atumula ati ebya banabbi nti bona, ndibaliisya obusinso, era ndibanywisya amaizi ag'omususa: kubanga mu banabbi ab'e Yerusaalemi obwonoonefu mwe buviire okubuna ensi yonayona. ¹⁶ Ati bw'atumula Mukama w'eigye nti timuwuliranga bigambo bya banabbi ababalagula; babegeresya ebibulaku kye bigasa: batumula okwolesebwa okuviire mu mwoyo gwabwe ibo, so okutaviire mu munwa gwa Mukama. ¹⁷ Bakoba olutalekula abo abanyooma nti Mukama atumwire nti Mulibba n'emirembe; na buli muntu atambulira mu bukakanyali bw'omwoyo gwe iye bamukoba nti tiwalibba bubbiibi obulibaizira. ¹⁸ Kubanga yani eyabbaire ayimereire Mukama w'ateeserya ebigambo, ategeere awulire ekigambo kye? Yani eyabbaire yeetegerezerye ekigambo kyange n'akiwulira? ¹⁹ Bona, empunga ya Mukama, niikyo kiruyi kye, afulumire, niiwo awo, empunga y'akampusi: aligwa ku mutwe gw'ababbiibi. ²⁰ Obusungu bwa Mukama tibuliira okutuusya lw'alimala okutuukirirya, okutuusya lw'alikomenkererya omwoyo gwe bye gumaliriire: mu naku egy'oluvanyuma mulikitegeerera dala. ²¹ Tinatumire banabbi abo, naye ni bairuka mbiro: tinatumwire nabo, naye ne balagula. ²² Naye singa beemerera mu kuteesya kwange, kale bandiwulisirye abantu bange ebigambo byange, era bandibakyusirye okuleka engira yabwe embiibbi n'obubbiibi obw'ebikolwa byabwe. ²³ Nze ndi Katonda ali okumpi, bw'atumula Mukama, so tindi Katonda ali ewala? ²⁴ Waliwo Asobola okwegisa mu bifo eby'ekyama ni ntamubona? bw'atumula Mukama. Tingizula igulu n'ensi? bw'atumula Mukama. ²⁵ Mpuliire banabbi bye batumwire abeema mu liina lyange okulagula eby'obubbeyi, nga batumula nti ndootere, ndootere. ²⁶ Ebyo birituukya waina okubba mu mwoyo gwa banabbi abalagula eby'obubbeyi; banabbi ab'obukyamu obw'omu mwoyo gwabwe ibo? ²⁷ Abalowooza okwerabirya abantu bange eriina lyange olw'ebirooto byabwe bye babakoberanga buli muntu mwinaye, nga bazeizababwe bwe beerabiire eriina lyange olwa Baali. ²⁸ Nabbi aloota ekirooto akoberenga ekirooto, n'oyo alina ekigambo kyange atumulenga ekigambo kyange n'obwesigwa. Ebisusunku kiki okwekankana n'eŋaanu? bw'atumula Mukama. ²⁹ Ekigambo kyange tekifaanana musyo? bw'atumula Mukama; era tekifaanana nyundo eyasaayasa olwazi? ³⁰ Kale, bona, ndi mulabe wa banabbi, bw'atumula Mukama, abaibba ebigambo byange buli muntu ku mwinaye. ³¹ Bona, ndi mulabe wa banabbi, bw'atumula Mukama, abairira enimi gyabwe ne batumula nti atumula. ³² Bona, ndi mulabe w'abo abalagula ebirooto eby'obubbeyi bwabwe n'olw'okwenyumirirya kwabwe okubulamu: naye tinabatumire so tinabalagiire; so tebaligasa bantu bainawo n'akadiidiiri, bw'atumula Mukama. ³³ Awo abantu bano oba nabbi bwe balikubuulya nga batumula nti omugugu gwa Mukama niikyo ki? kale n'obakoba nti Mugugu ki! Ndibabbinga, bw'atumula Mukama. ³⁴ N'o nabbi no kabona n'abantu abalitumula nti omugugu gwa Mukama, ndibonererya omuntu oyo n'enyumba ye. ³⁵ Muti bwe mulikoba buli muntu mwinaye na buli muntu mugande we nti Mukama airiremu ki? era nti Mukama atumwire ki? ³⁶ N'omugugu gwa Mukama timukaali mugwatula ate: kubanga buli muntu ekigambo kye iye niikyo kiribba omugugu gwe; kubanga mwanyoire ebigambo bya Katonda omulamu, ebya Mukama w'eigye Katonda waisu. ³⁷ Oti bw'obba okoba nabbi nti Mukama akwiriremu ki? era nti Mukama atumwire ki? ³⁸ Naye bwe mulitumula nti omugugu gwa Mukama; Mukama kyava atumula ati nti Kubanga mutumula ekigambo ekyo, nti Omugugu gwa Mukama, nzena mbatumiire nga ntumula nti Temutumulanga nti omugugu gwa Mukama; ³⁹ kale, bona, ndibeerabirira dala, era ndibasuula n'ekibuga kye nabawaire imwe n'a bazeiza banyu okuviira dala we ndi: ⁴⁰ era ndibaleetaku ekivumi ekitaliwaawo n'ensoni egitalivaawo egitalyerabirwa.