¹ Naye atyanu atyo bw'atumula Mukama eyakutondere, iwe Yakobo, era eyakubbumbire, iwe Isiraeri, nti totya, kubanga nakunumwire; nakwetere eriina lyo, oli wange. ² Bwewabitanga mu maizi, naabbanga naiwe; n'o mu miiga, tegirikusaanyaawo: bw'ewatambulanga okubita mu musyo, toosiriirenga; so n'omusyo tegulyakira ku iwe. ³ Kubanga nze ndi Mukama Katonda wo, Omutukuvu wa Isiraeri, omulokozi wo; nawaireyo Misiri okubba ekinunulo kyo, Kuusi ne Seba ku lulwo. ⁴ Kubanga wabbaire wo muwendo mungi mu maiso gange, era w'e kitiibwa, nzena nakutakire; kyendiva mpaayo abasaiza ku lulwo n'amawanga ku lw'obulamu bwo. ⁵ Totya; kubanga nze ndi wamu naiwe: ndireeta eizaire lyo okulitoola ebuvaisana ne nkukuŋaanya okuva ebugwaisana; ⁶ ndikoba obukiika obugooda nti vaayo; n'obukiika obulyo nti Togaana nabo; leeta bataane bange okubatoola ewala n'abawala bange okuva ku nkomerero y'ensi; ⁷ buli muntu eyatuumibwa eriina lyange era gwe natondeire ekitiibwa kyange; ninze namubbumbire; Niiwo awo, namukolere. ⁸ Fulumya abawofu b'amaiso abalina amaiso n'abaigali b'amatu abalina amatu. ⁹ Amawanga gonagona gakuŋaanyizibwe wamu n'abantu beetabe: yani ku ibo asobola okubuulira ekyo n'atulaga ebyasookere okubbaawo? baleete abajulizi baabwe baweebwe obutuukirivu: oba bawulire batumule nti Bya mazima. ¹⁰ Imwe muli bajulizi bange, bw'atumula Mukama n'omuweererya wange gwe nalondere Kaisi mumanye munjikirirye mutegeere nga ninze oyo; Wabula Katonda eyabbumbiibwe okusooka nze, so tewalibba alinjiririra. ¹¹ Nze, ninze mwene, ninze Mukama so wabula mulokozi wabula nze. ¹² Nze nabuuliire era nalokoire era nalagiire, so tewabbanga mu imwe katonda gondi: kye mubbeereire abajulizi bange, bw'atumula Mukama, nzena ndi Katonda. ¹³ Niiwo awo, omusana kasookeire gubbaawo era ninze oyo; so wabula okuwonya mu mukono gwange: ndikola omulimu, era yani ali guziyizya? ¹⁴ Atyo bw'atumula Mukama omununuzi wanyu, Omutukuvu wa Isiraeri, nti ku lwanyu natumire e Babulooni, era ndibaserengetya bonabona ng'abairukire, niibo bakaludaaya, mu byombo eby'okusanyuka kwabwe. ¹⁵ Nze ndi Mukama Omutukuvu wanyu, Omutondi wa Isiraeri, Kabaka wanyu. ¹⁶ atyo bw'atumula Mukama akubba oluguudo mu nyanza N'engira mu maizi ag'amaani. ¹⁷ afulumya egyabbaire n'embalaasi eigye n'obuyinza; bagalamiire wamu, tebaligolokoka; bazikiriire, bazikiriire ng'enfuuzi: nti ¹⁸ Temwijukira ebyasookere okubbaawo, so temulowooza bigambo by'eira. ¹⁹ Bona, ndikola ekigambo ekiyaka atyanu kiriboneka; temulikimanya ndikubba oluguudo n'o mu lukoola, ne ndeeta emiiga mu Idungu. ²⁰ Ensolo egy'omu nsiko girintekamu ekitiibwa, ebibbe n'a bamaaya kubanga ngaba amaizi mu lukoola n'emiiga mu idungu, okunywisya abantu bange, abalonde bange: ²¹ abantu be neebumbiire nzenka boolesyenga eitendo lyange. ²² Naye tonkungiranga, iwe Yakobo; naye wantamirwe, iwe Isiraeri. ²³ Tondeeteranga nsolo ntono ey'ebibyo ebiweebwayo ebyokyebwa; so tontekamu kitiibwa ne saddaaka gyo. Tinakuweereresyenga n'ebiweebwayo so tinkukooyesyenga n'o musita. ²⁴ Tonguliranga ngada mpoomereri n'e feeza, so tongikutyanga na masavu ge sadaaka gyo naye iwe wampeerereserye n'ebibbiibi byo, wankooyeserye n'obutali butuukirivu bwo. ²⁵ Nze, ninze mwene, ninze oyo sangula ebyonoono byo ku lwange nze; so tindiijukira bibbiibi byo. ²⁶ Njijukirya; tuwozye fembiri: leeta ensonga yo kaisi oweebwe obutuukirivu. ²⁷ Itaawo eyasookere yayonoonere n'abategeezerye ibo bansoberye. ²⁸ Kyendiva nvumisya abakulu ab'omu watukuvu, era ndifuula Yakobo ekiraamo ne Isiraeri ekivumi