¹ Ku lunaku ludi olwembo luno lulyemberwa mu nsi y'e Yuda: nti Tulina ekibuga eky'amaani; obulokozi bw'aliteekawo okubba bugwe n'enkomera. ² Mwiguleewo enjigi, eigwanga eituukirivu erikwata amazima liyingire. ³ Wamukuumanga mirembe mirembe, eyeesigikya omwoyo gwe ku iwe: kubanga akwesiga iwe. ⁴ Mwesigenga Mukama enaku gyonagyona: kubanga mu Mukama Yakuwa niimwo muli olwazi alutaliwaawo. ⁵ Kubanga aikaikanyirye abo abatyama waigulu, ekibuga ekigulumivu: akiteeka wansi, akiteeka wansi okutuuka n'oku itakali; akiikaikanya okutuuka n'omu nfuufu. ⁶ Ekigere kirikiniiniirira; ebigere by'omwavu, n'ebisinde by'oyo abula ekintu. ⁷ Engira ey'omutuukirivu bugolokofu: iwe omugolokofu oluŋamya olugendo olw'omutuukirivu. ⁸ Niiwo awo, mu ngira ery'emisango gyo, ai Mukama, mwe twakulindiriranga; eri eriina lyo n'eri ekijjukiryo kyo niiyo eri okwoya kw'obulamu bwaisu. ⁹ Nakwoyanga n'obulamu bwange obwire; Niiwo awo, nawunanga mu makeeri okusagiranga n'omwoyo gwange munda mwange: kubanga emisango gyo bwe gibba mu nsi, abatyama ku itakali lwe beega obutuukirivu. ¹⁰ Omubbiibi ne bwe bamulaga ekisa, era talyega butuukirivu: mu nsi ey'obugolokofu mweyakoleranga ebitali bye nsonga, so talibona bukulu bwa Mukama. ¹¹ Mukama, omukono gwo guyimusiibwe, naye tebabona: naye balibona obunyiikivu bwo olw'abantu ne bakwatibwa ensoni; niiwo awo, omusyo gulyokya abalabe bo. ¹² Mukama, oliragira emirembe gye tuli: kubanga n'okukola watukoleire emirimu gyaisu gyonagyona. ¹³ Ai Mukama Katonda waisu, abaami abandi awali iwe batufuganga; naye iwe twayatulanga eriina lyo wenka. ¹⁴ Bafiire, tebalibba balamu; bazikiriire, tebalizuukira: kyewaviire obaizira n'obasangulawo n'obuulya okwijukirwa kwabwe kwonakwona. ¹⁵ Wayazirye eigwanga, ai Mukama, wayazirye eigwanga; ogulumiziibwe: ogaziyirye ensalo gyonagyona egy'ensi. ¹⁶ Mukama, lwe baboine enaku lwe bakwiziire, baafuka okusaba okukangavula kwo bwe kwabbaire ku ibo. ¹⁷ Ng'omukali ali ekida, ebiseera eby'okuzaala kwe nga biri kumpi okutuuka, bw'alumwa n'akunga ng'abalagalwa; tutyo bwe twabbanga mu maiso go, Ai Mukama. ¹⁸ Twabbaire kida, twalumirwe, twazaire mpewo; tetwaleetere kulokola kwonakwona mu nsi; so n'abatyama mu nsi tebagwire. ¹⁹ Abafu ibo balibba balamu; emirambo gyange girizuukira. Muzuuke mwembe, imwe ababba mu nfuufu: kubanga omusulo gwo guli ng'omusulo ogw'oku mwido, n'eitakali lirifuuja abafu. ²⁰ Iza, eigwanga lyange, oyingire mu bisenge byo, weigalire enjigi gyo: weegise akaseera katono, okutuusya okunyiiga lwe kuliwaawo. ²¹ Kubanga, bona, Mukama aiza ng'afuluma mu kifo kye okubonereza abatyama mu nsi olw'obutali butuukirivu bwabwe: n'eitakali lyoona liribiikula ku musaayi gwalyo; so tiriryeyongera kubiika ku baalyo abaitiibwe.