¹ Omugugu gw'e Babulooni Isaaya mutaane wa Amozi gwe yaboine. ² Muwanike ebbendera ku lusozi olw'obweru, mubayimusirye eidoboozi, muwenye n'omukono, bayingire mu miryango egy'abakungu. ³ Ndagiire abawonge bange, niiwo awo, njetere abasaiza bange ab'amaani olw'obusungu bwange, abange abeenyumirirya n'amalala. ⁴ Oluyoogaanu lw'ekibiina ku nsozi ng'olweigwanga einene! oluyoogaanu olw'okuleekaana kw'obwakabaka obw'amawanga nga gakuŋaine! Mukama ow'eigye akuŋaanyirye eigye olw'olutalo. ⁵ Bava mu nsi y'ewala, ku nkomerero y'eigulu, Mukama n'ebyokulwanisya eby'okunyiiga kwe, okuzikirirya ensi yonayona. ⁶ Muwowogane; kubanga olunaku lwa Mukama luli kumpi luliiza ng'okuzikirira okuva eri Omuyinza w'ebintu byonabyona. ⁷ Emikono gyonagoyna kyegiriva giiririra na buli mwoyo gw'omuntu gulisaanuuka: ⁸ era balikeŋentererwa okusonsomolwa n'okubalagalwa kulibakwata; balirumwa ng'omukali alumwa okuzaala: baliwuniikirira bonka na boka; amaiso gaabwe galibba maiso g'o musyo. ⁹ Bona olunaku lwa Mukama lwiza, olukambwe, nga lulina obusungu n'ekiruyi; okuzikya ensi, n'okuzikirirya abalina ebibbiibi abaayo okubamalamu. ¹⁰ Kubanga emunyeenye egy'omu igulu n'ebibiina byagyo tebiryaka kwaki kwabyo: eisana lirizikizibwa ng'alivaayo, n'omwezi tegulyaka musana gwagwo. ¹¹ Nzena ndibonererya ensi olw'obubbiibi bwabwe n'ababoni olw'obutali butuukirivu bwabwe; era ndimalawo ekyeju eky'abalina amalala, era ndiikaikanya okwenyumirirya kw'abo abatiisya. ¹² Ndifuula omusaiza okubba ow'omuwendo okusinga ezaabu ensa omusaiza okusinga ezaabu ensa eye Ofiri. ¹³ Kyendiva ntengerya eigulu, n'ensi erisiisikibwa okuva mu kifo kyayo, mu busungu bwa Mukama ow'eigye, no ku lunaku olw'ekiruyi kye. ¹⁴ Awo olulituuka ng'empuuli ebbingibwa era ng'etama egibulaku musumba, balikyuka buli muntu okwira mu bantu b'ewaabwe iye, era baliiruka buli muntu mu nsi yaabwe iye. ¹⁵ Buli eyabonekanga yafumitibwanga; na buli eyawambibwanga yagwanga n'ekitala. ¹⁶ N'abaana baabwe abaibo balimenyerwamenyerwa mu maiso gaabwe; enyumba gyabwe girinyagibwa, n'abakali baabwe balikwatibwa lwa maani: ¹⁷ Bona, ndibaleetaku Abameedi, abataliteekayo mwoyo eri efeeza, n'ezaabu tebaligisanyukira. ¹⁸ N'emitego gyabwe girimenyaamenya abavubuka so tebalisaasira izaire ly'e kida; eriiso lyabwe teririsonyiwa baana batobato. ¹⁹ Ne Babulooni, ekitiibwa eky'obwakabaka, obusa obw'amalala ag'Abakaludaaya, kiribba nga Katonda bwe yaswire Sodomu ne Gomola. ²⁰ Tekiisulibwengamu enaku gyonagyona, so tekiibbeerwengamu emirembe n'emirembe: so n'Omuwalabu taasimbegayo weema; so n'abasumba tebaagalamiryengayo nbuli gyabwe. ²¹ Naye ensolo endalu egy'omu idungu niigyo gyagalamirangayo; n'enyumba gyabwe girizula ebintu ebisinga; na bamaaya baabbangayo, n'ebye zigeye byakiniranga eyo. ²² N'emisege gyakungiranga mu bigo byabwe, n'ebibbe mu manyumba gaabwe ag'ebinyumu: n'ekiseera kyakyo kiri kumpi n'okutuuka, so n'enaku gyakyo tegiritumulwaku.